Is 5 - Mam Ostuncalco Bible

Techlal ti'ju' awal tqan ub'a

1Kxel nb'itza'ne' b'itz toj tb'iju' tb'anil wamiwe'

nyolin ti'ju' tawal.

Atitoq jun tnej tawal wamiwe'

toj jun tb'anil tx'otx'.

2Jaw tq'u'n tokel, ex b'jaw t-sk'o'n ab'j toj.

tb'anil ij xitawa'n.

Jawtb'incha'n jun tal pach nimin twe' toj nky'ajchaq awal

ex jawtb'incha'n jun tkub'ilu' lob'j jatu'n tb'incheta' b'in.

Atoq tajb'ilju' tu'n tel chi' tawal,

atzunte' twitz lob'j el k'a.

3Kymantz tzune' ja'lo alkye ati tpaj,

aye'ye' najlqe' Jerusalen, ex aj Juda,

qa aju' awal mujqa ayine'

4¿Ti'toqtzunlo juntl ti'xti' tu'n tb'inchet ti'ju' wawale'?

¿Mujqa ati jun ti'xti' min xinb'incha'ne' ti'j?

Wajb'iltoqe' tu'n tel chi'ju' twitz,

¿Tiquntzunlo sela' k'a?

5Kxe'l nma'ne' kyeye'

titi' knb'incha'ye' ti'ju' wawale':

k'elel nxitu'ne' ch'laj tu'n tb'aj yajti;

k'elel ntx'u'yi'ne' tapi tu'n tb'aj wab'e'n;

6kjel ntzaqpi'ne'.

Lay b'je'l tq'ob' ex lay jaw xb'oqet k'ul toj,

kb'el k'ulixtzuntz ex lay tz'aq'unettel.

Kxel nma'ne te muj tu'n lalun tzaj tq'o'n jb'al tib'aj, chi Dyos.

7Ate' tawal Qman Dyos nimtipumal

ju' nlaqj ti'j,

aju' tnam aj Israel,

aju' tnam aj Juda.

Atoq tajb'il Qman Dyos tu'n kynimanteju' tkawb'il,

extzun naq b'yojwnaqi'n nb'aj toj;

tajb'iltoq tu'n tb'inchanjtz tnik'alilti'j,

ex naq sich' te k'ixk'oj ntzaj tb'i'n.

Xob'tzb'il kyeju' b'inchal myab'a'n

8¡Qab'anx kywitze', naq nche b'aj lq'on kyjaye',

naq nche' lq'on txqan kytx'otx'e',

mixpeti' tkub'el juntl kyu'ne',

nche najane' nakuj oqe'kxe' ate' toju' tnam!

9Matzajttziya'nte Qman Dyos nimtipumal weye':

Che b'elxitit nim ti'xti';

b'a'nqa nimaq ex tb'anilqe',

mix-a'lo'xte knajal kyoj.

10Ch'inxmi jun kyjaj ub'a

naq jun b'aril ta'l k'elil.

Lajoj kostal ij triy, noq jun kostatl ktq'a'.

11¡Qab'anx kywitze', b'a'n prim nche tx'ujtiye',

tu'n q'e'n nche kyaja'tene' nb'aj qonik'an!

12Ati chnab' arpa kukxju', e'tzintzin, e'tunk'al ex e'xux,

nim q'e'n atl junjun nimaqwan kyu'ne';

mixtzunti' nxikyka'yi'ne' tb'inchb'aj Qman Dyos,

ex min nche' ti'ju' taq'un.

13Qu'mtzun k'elex q'i'n ntaname' ti'jxi'ju' tx'otx', tu'n tpaj min kyajb'il tu'n telkynik'.

Tkyaqilju' tnam kyuk'i'lxi' nejenel,

che kyimel tu'n we'yaj ex k'waj.

14Inxi'x xitk'ab'a'n muqb'il toj ttzi, naku'j jun txkup,

tu'n t-xitb'ilq'u'n tnam kyuk'ilxi' nejenel,

aye' ate' toj achb'il ex toj kytzalajb'il.

15Majx che kjel me'sa'nju' xjal;

che kb'el tzipeju' nkynima'n kyib'.

16Ktyek'u' Qman Dyos nimtipumal tajwalil ajkyok xjal tu'n toj xjel;

ktyek'u' Qman Dyos t-xjanb'il ajtb'inchante tnik'alilti'j.

17Che b'ajel xitju' nimaqtnam

rit qekye' che wal kyoju' ttx'anqa'n ja.

18Qab'anx kywitze' tu'nju' q'i'n taq'wixil kyu'ne' tuk'i'l chajyolil,

k'lo'nqe'ye' tu'n il, kse'n taq'e'l jun karet jwob'lte.

19Aye'ye' nkyma'ne': tb'inchaxwit Dyos tkyaqilju' ti'xti',

tu'ntzun qka'yinte;

tb'inchaxwit Dyos Xjan toj Israel ojqel,

tu'ntzun qlonte, chechije'.

20¡Qab'anx kywitze', aye'ye' inokkyq'o'ne' myab'a'n te b'a'n,

atzunju' b'a'n te myab'a'n,

nokkyq'o'nju'ye' spik'un te qxopin,

atzu'n qxopin te spik'un;

nokkyq'o'ne' k'a te chi',

atzu'n chi' te k'a!

21¡Qab'anx kywitze', aye'ye' ati kynab'le' toj kywitze'

ex b'a'n kyximanteye' toj kywitze'!

22¡Qab'anx kywitze', aye'ye' kuw che k'wan q'e'ne',

ex mix-alo' nb'ent q'e'n tu'n kse'n nkyb'incha'ne'!

23Aye'ye', naq tu'n pwaq nok kyq'o'ne' xjal mixti' til

ex mixti' nok kyq'o'ne' toklenju' mixti' til.

24Qu'mtzun, kse'n q'aq' nb'aj ttz'e'ysa'n ttxa triy

atzu'n taq' q'aq' nb'aj tjamu'n maj,

ikxtzun che b'ajelaju'ye',

kse'n awal inb'aj q'ayj tlok'

exqe' tb'echil nche kub' q'ulj nakuj quq.

qu'n nelkyik'une' t-xnaq'tzb'il ex tchaq'b'il Qman Dyos nimtipumal,

ju' xjan Dyos toj Israel.

25Tu'ntzun tpaju' lu matzaj ttx'u'jil Qman Dyos ti'ju' ttanam,

ex matzaq'pon tq'ob' tu'n ttz'e'yset kywitz.

Eb'jaw lu'lunju' witz,

eb'ajkyaj xonju' kyimni toj b'e naku'j tz'is.

Na'mxpetzun tqjenju' ttx'u'jil Qman Dyos;

kukx tjawtiq'i'n tq'ob'ju' tu'n tq'ojin.

26Majaw tq'o'n Qman Dyos jun t-sut tnam

ex matxi' t-ẍut'in juntl tnam najchaq ta';

nche tzaj tiq'i'nju' najchaqxi'x ta'qe'.

Nche tzajtzuntz ojqelxi'x;

27mix-a'lo'x jun numjni ex siktni kyxol,

mix-alo' jun mya'wit itz' b'a'nxi'x,

mix-a'lo' jun mya'wit jtz'o'n tk'u'j b'a'nxi'x,

ex mix-a'lo' jun ẍla'qwit taq'i'l t-xajab'.

28Ch'ut-xi'x kywi' tal kysmaj

ex jtz'o'n kysmaj b'a'nxi'x.

Tx'e'ju' k'uxb'il toj kyqan kychej naku'j ab'j,

exju' tul tqan kykarwaj naku'j xkyeqchanpach;

29Iky tq'ojq'ojelju' kse'n ntzanun jun b'alun,

ntzanun ajttzyet tchi',

mix-a'lo'x kb'antel tel q'inte te.

30Ajtponju' q'ij q'ma'ntl,

ktinulju' nintnam lu kse'n ninnjab' ti'j Israel;

qatzun a'lo' nka'yinte tx'otx',

ktla' kyajni toj qlolj

kb'el jupe'qwitz tu'n txqan muj.