Os 10 - Mam Ostuncalco Bible

B'ajkub' xitu'n kyq'olb'eb'l aj Israel

1Ikyqe' aj Israel kse'n junwi' tqan ub'a txijli toj twitz

tu'ntzu'n txijlixi'xtoq

txqanxi'xtl q'olb'eb'l nche kyb'incha'n;

tu'nju' tb'anilxi'xju' kytx'otx',

ex tb'anilqe'xi'xtlju' kyab'aj xjansa'nqe'.

2Kyajb'il aj Israel tu'n kyk'u'jlante Dyos, ex kyeju' mya dyos qe'

atzun ja'lo kkychja' kyil.

Che b'elt-xitu'n Qman Dyos kyq'olb'eb'l ex kyab'aj xjansa'nqe'.

3Kkyma'tzuntz:

Mixti' qnimaqkawil

qu'n min nqo niman te Qman Dyos.

ex naqwit ati ¿Ti'wttzuloti' kb'antel tu'n nimaqkawil qe?

4Noq nyolin ex nyolin,

nxittziya'n jun ti'xti' mya ax ex nkyaj b'enttij jun yol kyu'n;

ikytzu'n nch'iyju' taq'wixil

kse'n junwi' k'ul b'iyul toj kojb'il.

5Nche lu'lunju' xjal aj Samarya;

nche' oq' tu'n tpaj kywitzleb' tal wakx matz'exq'i'n B'et-ab'en.

Tu'ntzunju' nche oq'a' tnam exqe' pale,

qu'n matxi' kub' naju' ninb'ilkye.

6Aku'pe' tal wakx kxe'l q'in Asirya.

tu'n txi' q'o'n teju' nin nimaqkawil.

Extzun majx k'elel tch'ixaw Eprayin:

Kb'el ch'ixwi Israel tu'n tpaj kxe'l q'i'n twitzleb'.

7Kb'el naju' nimaqkawil toj Samarya

kse'n jun xpe'lb'en ntananje tib'aj a'.

8Che b'ajel xitu'n najb'il xjan te witzileb'i'n

ja xb'inchana' il tnam Israel.

Che b'ajel ch'iy txo'k ex ch'i'x kyib'aju' kyq'olb'eb'l,

aye'tzu'n xjal kxe'l kyma'n kyeju' nimaq witz:

¡Kukytzaj niq'je' qib'aje'!,

ex kxe'l kyma'n kye k'ok'e' witz:

¡ktzaj tz'aqe' qib'aje'!

Tz'e'ysb'il twitz Israel tu'n Dyos

9Chi Qman Dyos kjalu:

Aj Israel, na'mx tkyej kytzaqpine' tu'n kyb'inchan ile'

ttzajtlenx kyb'inchan ile' toj Kib'ey.

¡Kukx kytenju'ye' toj il!

Qu'mtzun kb'elkyi'je' tu'n q'oj

aye'ye' b'inchal taq'wix toj Kib'ey.

10Kb'el ntz'e'ysa'n twitzju'ye' tnam lu.

Kb'ajel kyb'u'yi'n kyib' nimaqtnam q'ojil ti'j.

Ajtkub' ntz'e'ysa'ne' twitz tu'n tpaju' myab'a'n xtb'incha.

11Ikytoq Eprayin kse'n jun wakx mansi'ntl

ex tajb'ilxi'x tu'n ttriyin.

Atzu'n ja'lo matxi' jax nq'o'ne' tiqb'il

tib'aju' tqul tb'anilxi'x,

tu'n txi' tjk'u'n karwaj;

atzunte Juda matxi' kjol kyuk'i'l wakx,

atzuntlte Jakob' kb'ajel txijinte tq'ub'en.

12Ex xinma'ne' kye: kyawanku'xe' tnik'alilti'j

tu'n kyb'uyinteye' tk'u'jlalil.

Kyaq'unanku'ye' tx'otx' tu'n toktl tawal,

qu'n a tq'ijlalilu' ja'lo tu'n kyjyonteye' Qman Dyos.

tzmax ajtul tq'o'n

kolb'ilkyeye' nakuj jb'al.

13Aye'tzunkye' ma ku'x kyawa'ne' taq'wix,

naqx xitb'il xkyk'ame'.

naqx chajyolil tokx toj kytziye' naku'j kywaye'.

Tu'n tpaj xi' soka' qe kyk'u'je' ti'j kykarwaje' te q'oj

ex kyi'j txqan kyxjale' te q'oj,

14kche jawil tilju' kyxjale'

ex kykyaqilju' kyjaye' kuwsa'nqe' che b'elxitj,

kse'n kub'a' xitu'n B'et-arb'el tu'n nimaqkawil Salman

toju' q'oj tej tkub' b'yo'n txub'aj kyuk'i'lxi' tal.

15Ikxtzun che okyela'ju'ye',

najlqe'ye' toj B'etel,

tu'n tpaj txqan taq'wix xkyb'inchaye'.

Kb'ajelte' nimaqkawil aj Israel ajtjawu'l q'ij.