Is 59 - Mam Ostuncalco Bible

Kyil aj Israel ex tz'e'ysb'il tywitz

1Na'mx tkub'ajte Qman Dyos tipumal

tu'nwt lay b'ent tkolon,

ex min xkub' chkyinixte'

tu'nwt lay che tzajb'i'ne' tu'n.

2Naq aju' ati jun maqb'il kyxole' tuk'i'l Dyos

tu'nju' il ẍeb'aj kyb'incha'ne'

tu'nju' kyile' nxa'tjpu'n twitz

tu'n lalun che tzajb'i'ne' tu'n.

3B'ajni txa'j kyq'ob'e' tu'n kychk'el xjal

b'ajniqe' txa'j twikyq'ob'e' kyu'n taq'wix,

chajyolil inkyma'ne',

myab'a'n yol nb'je'tz toj kytziye'.

4Mix-a'lo' inq'mante til juntl toj tnik'alti'j,

ex mya toj tnik'alti'j noka' toj xjel.

Atzu' nqeya'xi'x kyk'u'je' ti'ju' chajyolil

ex kyi'ju' yol mya ax,

nojniqe'ye' tu'n taq'wixil

ex axju' taq'wixil nkyb'incha'ne'.

5Iky kyximju'ye' kse'n tjos q'antin

ex nkyb'incha'ne' se'n tchemoj xin;

qa ati jun xxich'yonteju' jos lu, kkyimel,

qatzun makub' qwab'e'n, che eletz kan tuk'i'l kyb'iyb'il toj.

6Lay che okju' kychemuj xin lu te xb'alun;

layx tz'ajb'enju' nkychmo'n tu'n jun xjal.

Mixyab'an tkyaqilju' nkyb'incha'n

naq'liqe' kyq'ob' tu'n kyb'yon xjal,

7nche ajb'en kyqan b'inchalte myab'a'n,

ojqel kyel tu'n kykub' kyb'yo'n xjal mixti' til.

Majxtokx b'yojxjali'n toj kywi',

naqx xitul ta'qe' jachaq nche b'eta'.

8Mixti'x nak'b'il kyxole' kyuk'i'l xjal,

mixya toj tu'me'lju' nkyb'incha'ne'.

Mixya tzinunju' kyb'eye' ljo'n,

mixti'x nak'b'il kyeju' nche b'et toj.

9Qu'mtzun matz'el lq'eju' kolb'il qi'j

ex min nulkanunju' tzaqpib'l qk'etz;

intoq qo ayon ti'ju' spik'un, ex naqx qlolj ati;

qajb'iltoq spik'un, ex toj qlolj nqo b'eta'.

10In qxmaka'n qb'e kse'n moẍ twitz jun tapi,

kuxi'xtej mixti' qwitz;

tojxi'x wanq'ij q'ij nqo jawa' tz'aq naku'j qonik'an;

b'a'nqo' extzun naku'j kyimniqo'.

11Qkyaqil nqo ẍch'in kse'n txkup oso,

nqo oq' naku'j paloms;

nqo ayon ti'ju' kolb'il ex min nul kanun;

nqo ayon ti'ju' tzaqpib'l, ex najchaq ta'.

12Matxi' qb'inchaye' myab'a'n twitza Dyos,

axju' qile' inq'mante;

nche tzaj qna'ne' qb'inchb'aje' twitza

ex qojtzqi'ne' qile' myab'a'n.

13Matxi' qo oke' pi's ex min nqo b'ine' teya Nman Dyos,

min xqaje' tu'n qoklpeye' ti'ja

matxi' qmaye' tu'n qb'yon xjale' ex matz'el qpa'nqib'e' ti'ja,

makub' qxima'ne' tu'n qsb'u'ne' kyi'j txqantl.

14Min nb'inchanjtztlte' tnik'alilti'j

najchaq ta'tlte' tojxi'x tu'me'l,

naq njatokpajte' axxi'x kyxol xjal

ex mixti'tlte tnik'alilti'j.

15Matxi' kub'najte' ax,

ex alkye neltpa'ntib' ti'j taq'wix inkub' alq'a'n.

Myab'a'n sela' toj twitz Qman Dyos

tej xtka'yinte min nb'inchanjtz tnik'alilti'j.

16Jaw lab'ti Qman Dyos

tej tka'yinte mix-a'lo'te nonin toju' lu;

jawtzun tiq'i'ntib' tu'nx tipumal

ex axte kanb'an

17Mab'aj tktxu'ntib' naku'j tu'n kton k'uxb'il,

matz'ok toksa'n kolb'il naku'j kutxb'il toj twi'

mab'jo'k tu'me'l t-xel tu'n naku'j nok tq'o'n t-xb'alun xjo'w

ex tzaj tq'oj b'a'nxi'x.

18Ktq'a' Qman Dyos tu'me'l t-xel teyile junjun kse'nxchaq til;

kb'el ttz'e'ysa'n kywitzju' tajq'oj.

Ktq'a' tu'me'l t-xel kyeju' nche el ik'onte;

exqepe' najlqe' kyoj tnam toj ninnjab'.

19Kykyaqil xjal tzajx tjawetzq'ij ponx tkub'exq'ij,

che nimal te Qman Dyos ajkyka'yinte toklen,

qu'n tzul kse'n jun tnimal a'

lmo'n tu'n jun kyq'iq' nimtipumal.

20Tzul tzaqpilte tnam Syon

kyuk'ilxi' kykyaqil tyajajil Jakob'

aye' qama tz'anjtzti'j kyanmi tu'nju' kyil.

Aku' Qman Dyos inq'mante ja'lu.

21A ntma'n Qman Dyos ja'lu:

Kjel b'entti'j jun nyole' kyuk'i'le' ex kntziya'ye'

lay che elwiq'i'ne' wipumale' ex nxnaq'tzb'ile'

xinq'o'ne' kyeye' ex kye kyyajajile' tejumajx, chi Dyos.