Ez 45 - Mam Ostuncalco Bible

Aju' tx'otx' pa'n te Qman Dyos(Ez 48.9-20)

1Ajtb'ajx kysipa'ne' tx'otx' jachaq matxa' kye junjun tnej kyyajajile', ati tu'n tkyaj kypa'ne' jun tnej tx'otx' masch'i'n oxe' ajlab' (12.5 Km.) tnuqub', atzun kab'e' ajlab' tk'i' nik'jan (10 Km.) twitz, k'okyel te Qman Dyos. Tkyaqilju' tx'otx' lu kxjansetel.

2Ti'jtzu'n tx'otx' lu k'elel pa'yit jun tnej tkb'elju' ja te k'u'lb'il, junelni twitz te kyaje' ttx'u'k, kab'lajnaq lajoj (250) metr twitz toj junjun plaj, awa'n twa wakx ti'jile te junaqjo' (25) metr twitz.

3K'elel pa'yet jun tx'otx' ti'ju' pa'n te Dyos, te masch'i'n oxe' ajlab' (12.5 Km.) tnuqub', atzun mas jun ajlab' (5 Km.) twitz, atzun tx'otx'ju' xjanxi'x: atzuntzu' ktenb'ela' ja te k'u'lb'il.

4Kxe'lju' tnej tx'otx' lu kye pale nche ajb'en toju' tja Dyos ex nche pon lq'e ajb'el te. Atzuntzu' kjawila' kyb'incha'n kyja. K'okyel te jun najb'il xjan, klo'n te tkb'el tja Dyos.

5Expe' ktenb'el jun tnejtl tx'otx' te masch'i'n oxe' ajlab' (12.5 Km.) tnuqub', atzun mas jun ajlab' (5 Km.) twitz, klo'n te kyetzb'il aj Leb'i nche ajb'en toj tja Dyos, tu'n kyten nimaqkytanam jatu'n kynajana'.

6Te b'ajsb'iltzun, ati tu'n tkyaj klet jun tx'otx' te tkb'el nintnam, masch'i'n oxe' ajlab' (12.5 Km.) tnuqub', atzun mas nik'jan ajlab' (2.5 Km.) twitz, tk'etzju' tx'otx' xjan. K'okyelju' tx'otx' lu te tkyaqilju' tnam Israel.

Ttx'otx' kawil klo'n(Ez 48.21-22)

7Ex kjel klet jun tx'otx' teju' kawil. Kjel jun tnej toj tjawetzq'ij atzun jun tnejtl tkub'exq'ij, te jun plaj ex te jun plajtl teju' tx'otx' xjan ex teju' tx'otx' klo'n te nintnam. Toj tjawetzq'ij ex tkub'exq'ij, kyinx tnuqub' kse'n jun tnej tx'otx' kye jun tnej kyyajajil.

8Kxe'lju' tx'otx' lu teju' kawil toj Israel; laytzun che oktentl kawiltz yajulte ntaname', kjel q'et kytx'otx' kye aj Israel kse'nxju' tnej kyyajajil.

Nuk'b'il teju' kawil

9Ayine' Dyos Manb'aj nchin q'mante: ¡Tk'i'xtzun kyajunju'ye' ex tu'n kyb'iyone' kawil toj Israel! ¡Kyb'inchame' tnik'alilti'j ex ttzinunal! ¡Lalun tz'el kyelq'a'ntle' kytx'otx' ntaname'! Ayine' Dyos Manb'aj nchin chaq'unte.

10Tz'ajb'en tkyaqil malb'il tz'aqli kyu'ne'.

11Ati tu'n tten malb'il triy ikxju' kse'n malb'il a' twitz. A malb'ilju' k'ajb'el aju' omer, te junlajnaq (220) litr toj. Jun b'ato a' twitz aju' jun tlajoji'n teju' malb'il omer, ex jun epa triy axju' jun tlajoji'n teju' omer.

12Ex ikxju' malb'il talal: Winqi'n keras tu'n jun piẍ ch'intlmi nik'jan lib'r; tu'n oxnaq piẍ, junaq oxe' (23) lib'r.

13Aye' oyaj ja'lu tu'n kyb'inchet: Kb'el kyaq'pu'n twitz kyawal, triy ex seb'ad, toj oxnaq (60) mlon junelni, jun mlontzun kb'el kyq'o'n te kyoyaj.

14Ikxju' aseyt qama jaw kyu'n, kb'el kyaq'pu'n toj jo'naq (100) mlon junelni, jun mlontzun kb'el kyq'o'n te kyoyaj.

15Atzu'n jun rit kb'el kyq'o'n kyi'j lajnaq (200) rit majx tb'anilqe' toj Israel. Atzun nuk'b'ilju' kyi'ju' oyaj ti'j triy, chojb'il k'ok'sb'il, ex chojb'il te b'inchjtib'il nche kub'q'et te najsb'il il. Ayine' Dyos Manb'aj, nchin q'mante.

16Kykyaqil xjal toju' tx'otx' ilti'j tu'n kyq'onteju' oyaj lu teju' kawil toj Israel,

17atzunte kb'el q'onkye alu'mj te chojb'il k'ok'sb'il, exju' nojqelan te oyaj twitz awal k'ok'e'kywitz ex b'in atl ak'a'j xjaw, kyoj q'ij te ojlab'l ex kyoj kykyaqilu' ninq'ij toj Israel. Ex ati tu'n kykub' tq'o'n chojb'il tu'n tpaj il, e'oyaj twitz awal k'ok'e'kywitz, e'chojb'il k'ok'sb'il exqe' chojb'il te b'inchjtib'il, tu'n tkub' najset kyil aj Israel.

Tq'ij tzaqpib'l

18Ayine' Dyos Manb'aj nchin yolin: Kb'el kyq'o'ne' jun qpoj tman wakx mixti' ttzakajil te chojb'il toj jun tajlalju' tnejel xjaw, tu'n t-ẍtilsetju' ja te k'u'lb'il te il.

19Ktzajel tiq'i'n pale ch'i'n tchk'elju' alu'mj nkub' te chojb'il tu'n tpaj il, k'okyel t-sun ti'j tqan tjpelju' ja te k'u'lb'il, kyi'ju' kyaje' ttx'u'k q'olb'eb'l ex kyi'ju' tqan tjpelju' pe'n tojxi'.

20Ikx kb'inchetelju' toj wuq tajlal xjaw kyi'ju' makyb'incha jun il mya xima'n kyu'n mujqa minxkyil. Ikytzu'n kẍtilsetela' ja te k'u'lb'il.

21Ktzyetel kyik'santeye' tq'ij tzaqpib'l toj kyajlajoj tajlal tnejel xjaw, ex che wal wab'je' mixti' ttx'amal toj wuq q'ij.

22Kb'eltq'o'n kawil jun qpoj tman wakx te chojb'il toju' q'ij lu, tu'n kypaj til ex tu'n tpaj kyil tkyaqilju' tnam,

23ex che kb'eltq'o'n wuq qpoj tman wakx ex wuq tman rit mixti' kytzakaj, atl junjun q'ij toju' wuq q'ij ninq'ij, te chojb'il k'ok'sb'il weye' ayine' Dyos Manb'aj. Expe' kb'eltq'o'n jun chib' atl junjun q'ij te chojb'il tu'n tpaj il.

24Ex kb'el jun oyaj te winqi'n litr twitz awal k'ok'e'kywitz ex oxe' litr tk'i' nik'jan aseyt tmoj junjun qpoj tman wakx ex tmoj junjun tman rit.

Kyq'ij pach tq'ob' tze

25Ex ikx toj kyq'ij pach tq'ob' tze, nkub' ik'set toj o'lajoj tajlal twuqi'n xjaw, ati tu'n kykub' tq'o'n kawil chojb'il junelni tu'n tpaj il toju' wuq q'ij, ikyx kyajlal alu'mju' che b'eltz'e'yset ex ax kyajlal oyaju' kywitz awal k'ok'e'kywitz ex aseyt.