Os 5 - Mam Ostuncalco Bible

1Kyb'intzju'ye' lu, pale;

kyb'intzpeye' tnam aj Israel;

kyb'intze' aye'ye' toj tja nimaqkawil:

Kye nakye' tzula' xjel,

qu'n matxi' che oke' te xpatxab' toj Mispa,

jun xpatxab' tkub' twi' witz Tab'or,

2Kse'n xoch kyejni leb'a'n toj b'ya' Sitim.

Qu'mtzun kb'el ntz'e'ysa'ne' kywitze'.

3Wojtzqi'na Eprayin;

ex wojtzqina Israel.

Matz'oka Eprayin te ajpajil;

ex matxi' b'aj ttxa'ju'ntib'a Israel.

4Axju' tb'inchb'aja tnam myab'a'n,

min najonte tu'n tanjtzkyi'je' tuk'i'l Dyos.

Matxi kub'ti'ja tu'n ajpaji'n,

qu'mtzun min nel tnik'a ti'j Dyos.

5Axju' kyninb'il kyib'a' aj Israel nyek'unte kyila';

Njaw trakpuja Eprayin ti'jxju' tila,

¡expe' axjuna Juda kjawel trakpuja kyuk'i'l!

6Okpe' che jyole' wi'je'

kyuk'i'l kyrite' ex kywakyixe',

ex lay chin knete' kyu'ne'

qu'n che kjel nleb'a'ne'.

7Mache oke' naku'j qya ajpajil,

qu'n machin kub'kysb'u'ne' tej ẍe k'ulune' kye txqantl dyos.

Tu'ntzu'n min nche nimane' weye'

noq ch'inxtl tkub' xitu'n kytx'otx'e'.

Tz'e'ysb'il kywitz Israel ex Juda

8¡Kyq'ajtzanxu'ye' xux te q'oj toj Kyib'ea,

exju' chun toj Rama!

¡Kyq'onxe' tqanil xob'ajil toj B'et-ab'en!

¡Tu'n t-xob' B'enjamin!

9Kxe'l nma'ne' tpakb'alil kyxole' tnej tyajajil Israel

aju' kb'ajel ilxi'xti'j:

Majx che kb'el nxitu'ne' Eprayin toju' tq'ijlalil ajtkub' ntz'e'ysa'ne' kywitze'.

10Chi Qman Dyos kjalu:

Ikqe'kye' kynejel aj Juda kse'nqe' xjal

nche' laq'b'an nqach.

¡Ex majx che kb'el nnajsa'ne' tu'n ntx'u'jile'!

11Jtz'o'nte Eprayin ja'lo

mixti'tl nnimanjtzu' toklen,

qu'n xi' soka' tq'o'na'tl twitz,

kyi'j junxi'tl dyos.

12Qu'mtzun kb'el nxitu'ne' tkawb'ilju' tnam lu exju' tkawb'il Juda

kse'n pok' nokten walte tze.

13Ajtzun tkayinte Eprayin qa matxitoq b'o'lj,

ex ajtka'yinte Juda matxitoq tak',

che kxe'ltzuntz qanil o'nb'il teju' nimaqkawil aj Asirya;

extzun lay b'ent kyq'anit tu'n nimaqkawil lu.

14Chin xe'l tzaqpaje' b'yolte Eprayin ex Juda

kse'n jun b'alun aj txi' t-xontib' b'iyul;

ayinku'ye' chin b'ajel tzaqunkye ex chin oqele'

txab' kytzyet wu'ne' ex mix-a'lo' kb'entel tklonkye' toj nq'ob'e'.

15K'anjeltzun wi'jtze' toj nnajb'ile'

tzmaxi'j ajtel kynik' ti'ju' kyil

ex ajkyul jyolweye'.

¡Tojtzunju' yajb'ilkye chin kyjya'ye'!