1 Cr 29 - Mam Ostuncalco Bible

1Yajxi'tzuntl xitma'n Dab'i kye kykyaqilju' tnam: Naq o'kxku' nk'wale' Salomon xjaw t-sk'o'n Dyos, tzma ku'xun, namx tok tnab'l, atzu'n aq'untl nim, qu'n tu'n tb'inchetju' ja te Qman Dyos, mya jun ja te tkawb'il jun ichan.

2Matz'oktilil wu'ne' tu'n tb'u'yetju' nojqelan ti'ju' ja te Qman Dyos: e'q'anpwaq, saqpwaq, q'ank'uxb'il, k'uxb'il ex tze tu'n kyb'inchet junjun ti'xti'. Ex tb'anil ab'j kornalina tb'i, ab'j tu'n kymojb'et toj kykb'el, tlo', ab'j nche qoptz'aj ex chukchaq che ka'yin, chukchaq ab'j tb'anilqexi'x ex txqan poqlaj.

3Tib'ajxi'tzu'n tkyaqilju' matxi' b'aj nb'u'yine' teju' tja Dyos, kxe'l nq'o'ne' q'anpwaq ex saqpwaqju' we'ku'ye', tu'nju' nk'u'jlalile' ti'ju' tja Qman Dyos:

4jo'k'al lajnaq (2,200) kyintal q'anpwaq tb'anilxi'x, kab'lajk'al oxlajnaq (5,060) kyintal saqpwaq tb'anilxi'x tu'n kyb'aj ktxetu' kytapiyilju' ja.

5Tkyaqilju' q'anpwaq ex saqpwaq tu'n kyb'inchet tkyaqilju' ti'xti' chukchaq k'uxb'il kytx'otx'al in ojqelan, ex te tkyaqilju' aq'untl tu'n kyb'inchante aq'unal. Atzu'n ja'lo, ¿alkye jun tajb'il tu'n tq'onte jun toyaj tu'n tk'u'j te Qman Dyos? chi nimaqkawil Dab'i.

6Aye'tzu'n nejenel kye junjun ja xjal, nejenel kye junjun tnej kyyajajil aj Israel, nejenel kye b'a'npun tnej xjal te q'oj, ex kye nimaq tnej, exqe' nejenel kyi'ju' aq'untl te nimaqkawil, kub' kyq'o'n kyoyaj tu'n kyk'u'j,

7b'eljojk'al junaq lajoj (3,630) kyintal q'anpwaq ex junmutx' jok'al (10,000) medi q'anpwaq xikyq'o'n tu'n tb'inchetju' aq'untl ti'j tja Dyos, wajxaqlajk'al oxnaq (7,260) kyintal saqpwaq, ex ch'inxmi junmutx' oxlajk'al (13,200) kyintal q'ank'uxb'il ex b'eljojmutx' junk'al lajnaq (72,600) kyintal k'uxb'il.

8Exqe' atitoq tb'anil kyab'aj xikyq'o'n toju' k'ub'l pwaq toj tja Dyos, ju' atitoq toj tq'ob' Jeyel, tyajajil Werson.

9E' tzalaju' xjal tu'n kyoyaj, qu'n b'ajkub' kyq'o'n ti'xti' lu tu'n tkyaqil kyk'u'j te Qman Dyos. Ex ojexi'x tzalaju' nimaqkawil Dab'i.

10Jawtzun tnima'n Dab'i Qman Dyos kywitz kykyaqilju' tnam, tma: ¡Nimanjtzxwita Nman Dyos tejumajx, ju' xk'lunjtza tu'n ojtxi' qyajilb'ene' Israel!

11¡Taye, te teju'ya ninb'il, ipumalj, ajwalil, kawb'il ex aya kawil! Qu'n teya tkyaqilju' ati twitz kya'j ex twitz tx'otx'. Ex teju'ya kawb'il, qu'n aya Nman Dyos, nimxi'x toklena kywitz kykyaqil.

12Aya ntzaj q'onte q'inumal ex oklenj. Aya nkawina tib'aj tkyaqil. Toj tq'ob'a ta' ipumalj ex oklenj, ex aya ntzaj q'onte kyipumal ex kyoklen kykyaqil xjal.

13Qu'mtzun in qq'o'ne' chjonte teya ja'lo Nman Dyos ex in qajwali'ne' tb'iya nim toklen;

14qu'n, ¿titi' woklene' ex titi' tik'lenju' ntaname' tu'n tb'ent txi' qq'o'ne' txqan ti'xti' teya? Axxi'x, tkyaqil aya intzaj q'onte ex o'kx inxi' qq'o'nju'ye' teya aju' intzaj tq'o'na qeye'.

15Ik qo'ju'ye' kse'nqe' ajb'etun twitza, naq inche ik' anj, kse'n ẍe' b'jik'a' ojtxi' qyajilb'ene', ex iky qchwinqlale' twitz tx'otx' kse'n leku'n, mixti'x q'uqli tk'u'jlalil.

16¡Nman Dyos, te teya tkyaqil ex aya saj q'onte tkyaqilju' q'inumal matxi' b'aj qb'u'yi'ne' tu'n tjaw b'inchet jun ja te tb'iya xjan!

17B'i'n wu'ne' Taye, inb'aj tka'yi'na ati toj qanmiye' ex intzalaja kyi'ju' toj tu'me'l nche b'eta'. Qu'mtzun, tu'n tkyaqil nk'u'je' xxi' nq'o'ne' tkyaqil ja'lu teya. Ex inchin tzalaje' kyi'ju' ttanama b'uyi'nkyib' tzalu, in nka'yine' matxi' kub' kyq'o'n kyoyaj tu'n tkyaqil kyk'u'j.

18Nman Dyos, teya ẍe k'uluna' Ab'raam, Isaak ex Israel, ju' ojtxi' qyajilb'ene', q'onkju'ya b'a'n xim lu kukxu' toj kyanmiju' ttanama ex ẍaqluma kynab'l tu'n kyoklpe ti'ja.

19Ex q'onku'ya jun b'a'n xim toj tanmiju' nk'wale' Salomon, tu'ntzun kyjapunju' tchaq'b'ila, tnuk'b'ila ex tkawb'ila tu'n, tu'n tanq'inte ex tu'n tjaw tb'incha'n ja teya xb'aj nb'uyi'ne' nnojqelan te, chi Dab'i toj tna'j Dyos.

20Ex xitma'ntl Dab'i kye kykyaqilju' tnam b'u'yi'nkyib': Kyajwali'nktze' Qman Dyos ja'lo, chij. Kykyaqiltzunju' tnam jawkyajwali'n Qman Dyos jaẍe k'uluna' ojtxi' kyyajilb'en, ex mejlqe' majx ku'punju' kyplaj twitz tx'otx' twitz Qman Dyos ex twitzju' nimaqkawil.

21Tojtzu'n jun q'ijtel, b'ajkub' kyq'o'n chojb'il ex chojb'il k'ok'sb'il twitz Qman Dyos: kab'k'al lajnaq (1,000) qpoj tman wakx, kab'k'al lajnaq (1,000) rit ex kab'k'al lajnaq (1,000) qpoj tal rit, kyuk'i'lju' oyaj b'in ex txqan chojb'il kyu'n kykyaqil aj Israel.

22E'wan toju' q'ij lu ex e'k'wan tu'n kytzalajb'il twitz Qman Dyos. Yajxi'tzuntl, okkyq'o'n jumajtl toklen Salomon, tk'wal Dab'i, te nimaqkawil, ex kub' kyxjansa'n twitz Qman Dyos tu'n tok nimaq toklen, ex ikx Sadok te pale.

23Ikytzu'n, okx qe Salomon te nimaqkawil toju' q'uqb'il toj tkawb'il Qman Dyos te t-xel Dab'i, ju' tman, ex b'a'n xa'ya' toj tkyaqil. Kykyaqil aj Israel eb'in te.

24Kykyaqiltzu'n nejenel ex nimaq q'ojil, ex kykyaqilju' tk'wal nimaqkawil Dab'i xi'ktziya'n qa nche tzalaj ti'ju' nimaqkawil Salomon.

25Tb'incha Qman Dyos tu'n tjaw nima'nxi'x Salomon kywitz kykyaqil aj Israel, ex mixti'xi'toq jun nimaqkawil toj Israel tenwit tkawb'il ikyju'.

Kyim Dab'i(1 R 2.10-12)

26Kawin Dab'i, tk'wal Jese, tib'aj tkyaqil Israel.

27Kab'naq (40) ab'q'i ten te nimaqkawil tib'aj Israel, wuq ab'q'i kawin toj Eb'ron atzun junaq oxlajoj (33) ab'q'i toj Jerusalen.

28B'a'n kyima' tu'n tijil, nim tab'q'iyil tchwinqlal, txqan tq'inumal ex toklen. Atl Salomon ju' tk'wal kawin te t-xel.

29Tz'ib'a'n tqanil ti'ju' nimaqkawil Dab'i, tej ttzaj qe ex tpon b'aj, kyoju' tu'jil tqanil ti'j Samwel ju' t-sanjelal Dyos, kyoju' tu'jil tqanil ti'j Natan t-sanjelal Dyos, ex kyoju' te Kad ju' sanjelal,

30tuk'i'lxi' tqanil ti'j tkyaqilju' tkawb'il ex tipumal, exqe'ju' b'aji ti'j, kyi'j aj Israel ex kyi'j txqantl tnam.