Lv 18 - Mam Ostuncalco Bible

Mya kyuk'i'l alkyexku' qya tu'n kykub' kẍe ichan

1-2Tzaj tma'n Qman Dyos te Moyses tu'n t-xitma'n kye aj Israel kjalu:

Ayinwe' Dyos Manb'aj.

3Lalun txikyb'incha'nju'ye' nkyb'incha'n aj Ejipt jaẍe najana'ye'.

Lalun che'x lpeye' ti'ju' nkyb'incha'n aj Kanaan toju' tx'otx' ja che kxe'la' wiq'i'ne', lalun che oklpeye' kyi'ju' kykawb'il.

4Che japunxju' nnuk'b'ile' kyu'ne'; kyb'inchanqe'xe' nkawb'ile'; che anq'ine' kse'nxju' nkyma'n. Ayine' Dyos Manb'aj.

5Kyb'inchanqe'xe' nkawb'ile' ex nnuk'b'ile'. K'anq'ilte' xjal mache japun tu'n. Qu'n ayine' Dyos Manb'aj.

6Mixti' tu'n tkub' kẍe jun ichan tuk'i'l jun qya twitze'lx. Qu'n ayine' Dyos Manb'aj inchin q'mante.

7Lalun tz'el kyiq'i'n tch'ixaw kymane' tu'nwt kykub'kẍeye' tuk'i'l kytxuye'; lalun kyb'inchaye' tuk'i'l qu'n kytxuna'ye'.

8Ex lalun tz'el kyiq'i'n tch'ixaw kymane' tu'nwt kykub'kẍeye' tuk'i'l junju' juntl t-xu'jil.

9Lalun che kub' kẍeye' tuk'i'l kyanab'e', qa o'kx kymane' junx tuk'i'l mujqa o'kx kytxuye'; qa itz'ji tuja mujqa ttzija k'wal, lalun che kub' kẍeye' tuk'i'l.

10Lalun che elsan ch'xawe' tuk'i'l kychmane' txin, tmyal kyk'wale' mujqa tal kymyale', lalun che kub' kẍeye' tuk'i'l.

11Lalun che kub' kẍeye' tuk'i'l talju' t-xu'jil kymane', qu'n kyanab'e'. Lalun kub' kyajine'.

12Lalun che kub' kẍeye' tuk'i'l tanab' kymane', qu'n ax tchk'el kymanju'ye'.

13Lalun che kub' kẍeye' tuk'i'l titz'in kytxuye', qu'n ax tchk'el kytxuju'ye'.

14Lalun tz'el kyiq'i'n tch'ixaw kytiye' tu'nwt kykub'kẍeye' tuk'i'l t-xu'jil, qu'n kytiyxe' t-xu'jil.

15Lalun che kub' kẍeye' tuk'i'l kylib'e', qu'n t-xu'jilna' kyk'wale'.

16Lalun tz'el kyiq'i'ne' tch'ixaw kytzikye' tu'nwt kykub'kẍeye' tuk'i'lju' t-xu'jil.

17Lalun che kub' kẍeye' tuk'i'l jun qya tojx kyjakyib'e' tuk'i'l, ex tuk'i'l jun tal, mujqa jun tchman, qa tmyal tal mujqa tal tal. Qu'n taq'wixi'xte' tu'n kyb'inchanteye' lu.

18Lalun kub'kyxu'jila'ne' titz'in kyxu'jile', ex lalun che kub' kẍeye' tuk'i'l itz'ku'xju' kyxu'jile', tu'ntzun lalun tzaj q'oj kyxol.

19Lalun che kub' kẍeye' tuk'i'l jun qya toju' tq'ijlalil ajtkb'u'l ttx'ajin.

20Lalun che kub' kẍeye' tuk'i'l t-xu'jil kywnaqile' tu'n lalun che tz'ilixe' tu'n tpaj.

21Lalun txikyq'o'n junju'ye' kyk'wale' te oyaj teju' dyos Molok. Lalun kyb'inchaye' taq'wix lu ti'ju' nb'iye'. Qu'n ayine' Dyos Manb'aj.

22Lalun che kub' kẍeye' tuk'i'l jun ichan kse'n tuk'i'l jun qya. Qu'n mixyab'a'nte' lu qama b'inchet.

23Lalun che kub' kẍeye' tuk'i'l jun txkup, tu'n lalun che kyaje' tz'il tu'n tpaj. Ex ikxqe' qya lalun txikyq'o'nkyib' te jun txkup. Qu'n mixyab'a'nte' lu.

24Lalun kytz'ilsa kyib'e' tu'n junju' ti'xti' lu, qu'n kyu'nju' lu matxi' kytz'ilsa kyib'ju' tnam che eletz wu'ne' toju' kytanam kywitze',

25ex kyej tz'ilixju' kytx'otx'; xi'tzun nxjelu'ne' kye ti'ju' kyb'inchb'aj, ex eb'je'tz xon tu'nju' tx'otx' janajlqe'toq.

26Aye'tzunkye' aj Israel, exqe' najchaq xjal najliqe' kyxole', kyb'inchanqe'xe' nkawb'ile' exqe' nnuk'b'ile', lalun kyb'incha junju'ye' ti'xti' taq'wixi'x lu,

27qu'n kykyaqilju' taq'wix lu makyb'inchaju' ẍenajanteju' tx'otx' nejl kywitze', ex makyej tz'ilixju' tx'otx' kyu'n.

28¡Laywit che etz xla'ja'ne' tu'nju' tx'otx' tu'n kpaju' tz'il lu, kse'n eb'je'tza' t-xla'ja'nju' xjal e'najan atzu' nejl kywitze'.!

29Alkyexku' mab'inchanteju' ti'xti' taq'wixi'x lu, k'elex iq'et kyxolju' ttanam.

30Qu'mtzun kyb'inchanxju'ye' nchaq'b'ile' ex lalun che kub' tz'aqe' kyoju' taq'wixi'x intoq che eb'inchanjtz na'mxtoq kypone', ex lalun kytz'ilsa kyib'e' toj. Qu'n ayine' Dyos Manb'aj, chi Dyos.