Est 5 - Mam Ostuncalco Bible

Okxu' Ster twitz nimaqkawil

1Tb'ajlenxi'tzun oxe' q'ij, oktq'o'n Ster t-xb'alun tex nimaqkawb'il, okxtzuntz tojxi' tpe'nju' nin ja te kawb'il, kub' we' twitzju' ja jatoq q'uqlokxa' nimaqkawil toj tkawb'il, ju' tkub' twitzu' tjpel ja.

2Tetzunj tetz ka'yi'n nimaqkawil ti'j Ster ju' t-xu'jil twi' pe'n, jaw tzalaj ti'j ex etztnuqpi'n tb'ar q'anpwaq tzyu'ntoq tu'n te. Okxtzun lq'e Ster ex okttzyu'n twi'ju' tb'ar nimaqkawil,

3xi'tzun tqani'n nimaqkawil te:

—¿Titi' tajb'ila Ster, nxu'jil? Kxe'l nq'o'nwe' teya titi' matqaniya, ¡Kpena' kxe'l nq'o'we' teya qa matqaniya nik'janju' tx'otx' nkawi'ne'! chij.

Xi'tzun ttzaq'we'n Ster te:

4—Qa b'a'n toj twitza nimaqkawil, nchin kub'sane' teya tu'n txi'ya toj jun ninwan matxi' kub' nb'incha'ne' te ninb'ilteya, ex tu'n tpon tiq'ina Aman, chij.

Tchaq'tzun nimaqkawil:

5—Kyjyome' Aman, tu'n qxi'ye' toju' txokb'il tu'n nxu'jile' Ster, chij.

Xi'tzun nimaqkawil tuk'i'l Aman toju' ninwan matxi'toq kub' tb'incha'n t-xu'jil.

6Tojtzu'n ninwan lu, xitma'n nimaqkawil te Ster.

—¡Qanintza aju' tajb'ila, kxe'l nq'o'nwe', maskye matzaj tqani'na nik'janju' tx'otx' ati tjaq' nkawb'ile'! chij.

7Xi'tzun ttzaq'we'n Ster te:

—Naq okx tb'is nk'u'ju'ye' ex a nqani'ne' teya:

8Qa nchin tk'u'jla'na exqa matzaj tq'o'nju'ya tb'is nk'u'je' exu' kxe'l nqani'ne', kuttzaja najchij, tuk'i'l Aman, toj juntl ninwan kub'ni nb'incha'ne' te ninb'ilteya. Atzuntzu' kxe'la' nmanju'ye' tajb'ila tu'n txi' nqani'ne' teya, chij.

B'aj tb'incha'n Aman jun tze tu'n tjaw jtz'et tqul Mardokyey

9Oje tzalaj Aman tej tetz toju' ninwan; atzu'n tej t-xitka'yi'n Mardokyey atitoq ttziju' nin tja kawb'il, miẍtoqti'x njawe' ex mixti' niman te tej txi' tka'yi'n tik', tzajwal ti'tk'u'j ti'j.

10Mixtzunti' tyek'u toju' kmoj lu qa intoq tx'a'lti'j tk'u'j; atzu'n tej tpon tja eb'aj tzaj ttxko'n tamiw ex Seres, ju' t-xu'jil,

11Jawtzun tnima'tib'tz ti'ju' txqan tq'inumal, kyi'jqe' txqan tk'wal ate'toq, ex se'n tu'me'l jawa' nima'n tu'n nimaqkawil kyxolju' nche kawin tuk'i'l exqe' ajb'el te, tej tokq'o'n toj jun oklenj nimxi'x kyekywitz.

12Ex xitma'ntl:

—Expe', oqinkxe' ẍinx txko'ne' tu'n Ster t-xu'jil nimaqkawil toju' ninwan xkub' tb'incha'n teju' nimaqkawil ja'lo; ex machin ttxok jumajtle' toju' ninwan kb'eltq'o'n najchi'j teju' nimaqkawil.

13Naqtzun aju' mixti'x tab'en tkyaqil ja'lu weye' tu'n tpaju' kukx txi' nka'yi'ne' ma' aj Juda Mardokyey q'uqli ttziju' tja nimaqkawb'il, chi Aman.

14Xi'tzun kyma'n t-xu'jil ex kykyaqilju' tamiw te:

—Q'onx b'incha'ya jun jitz'b'il te junaq kab'e' (22) metr twe', ex qaninxa najchi'j prim teju' nimaqkawil tu'n tjaw jtz'o'n Mardokyey ti'j. Kxe'l tzuntza toj tzalajb'il tuk'i'lu' nimaqkawil toju' ninwan, chechij te.

Kub'ju' nab'l lu toj twitz Aman, ex xitq'a' b'incha'ju' jitzb'il te b'iyb'il.