2 S 14 - Mam Ostuncalco Bible

Anjtzti'j Ab'salon tu'n Joab'

1B'i'ntoq tu'n Joab' tk'wal Sarb'ya, qa intoq ximan nimaqkawil ti'j Ab'salon,

2tchaq'tzuntz tu'n t-xitxokb'aj jun qya tx'yanxi'x tuk'i'l toj Tekoa. Xitma'ntzuntz te: Q'onk ti'ja te b'is naku'xwitloj in b'isuna; ex lalun tz'ok tq'o'na k'ok'sb'il ti'ja, tu'n tq'ancha'lin qa matxi' b'et q'ij in b'isuna ti'j jun kyimni.

3Kutxi'tzuntza twitzju' nimaqkawil ex q'manxa te kse'nxju' kxe'l nma'ne' teya, chij.

Tb'ajlenxi'tzun tma'n Joab' te, ti'ju' kxe'l tma'n,

4xi'tzun qyatz aj Tekoa twitzju' nimaqkawil, majx kub'joqe twitz tx'otx' te ninb'il, ex xitma'n te:

—¡Q'aq'antz tk'u'ja wi'je' nimaqkawil, chin tonima! chij.

5Xi'tzun tqani'n nimaqkawil te:

—¿Ti'tzun in niq'ina?, chij.

Atzunte xittzaq'we'n:

—Mixti'we' nchmil, oje kyim,

6ate'toqtzun kab'e' wale' ayine' ju' ajb'el teya, e'jaw q'ojin toj kojb'il; tu'ntzunju' mix-a'lo' kub' pa'nkye, k'ixb'iju' jun tu'nju' juntl ex majx kyim.

7Atzun ja'lo kykyaqilu' nwitze'le' matxi' jawkyi'nkyib' wi'je' ex kyajb'il tu'n txi' nq'o'ne' xb'iyun toj kyq'ob', tu'n tkub' kyb'yo'n kse'nxju' xtb'incha te titz'in, extzun o'kxku' walju'ye' ati toklen ti'ju' etzb'il. Kyajb'il tu'n tkub' kynajsa'n o'kxku' jun twitztl wale' atix, tu'n lalun kyejten tyajajilju' qtzan nchmile' twitzju' tx'otx', chij.

8Xittzaq'we'ntzun nimaqkawiltz teju' qya:

—Kuna' txi'ya tjaya, kxe'l nchq'o'nwe' klolteya, chij.

9Atzunju' qya xittzaq'we'n te:

—Qatzun matzaju' taq'wix, tu'n tkub' tz'aq wib'aje' ex kyib'aju' toj tja nmane', ex mya tib'aja nimaqkawil mujqa tib'aju' tkawb'ila, chij.

10Xi'tzun ttzaq'we'n nimaqkawil:

—Qa ati jun tajb'il tu'n tb'inchante jun taq'wix ti'ja, q'intza nk'etze' ex lalunx yajuntl ti'ja, chij.

11Atzunte qya ilxi'xtoqti'j tu'n, xitma'n:

—¡Chin kub'sale' teya nimaqkawil, kub'san ch'i'nta wi'je' twitz Dyos, tu'n lalun tz'ok tu'me'l t-xel tkamik qtzan wale' tu'nju' nwitze'le', qu'n nimxi'xtlju' xitb'il tzul qama kub' b'yo'nju' juntl!, chij.

Xi'tzun tma'nju' nimaqkawil:

—¡Lu Qman Dyos in ka'yin, laype' ku'tz tz'aq jun t-xya'mal twi'ju' tala!, chij.

12Xitma'n jumajtlju' qya te:

—Najsamxi'xa, nimaqkawil, q'ontza anb'il tu'n txi' nma'n juntl nyole', ayine' ju' ajb'el teya, chij.

—Q'mantzna'ya, chiju' nimaqkawil te.

13Xi' tqani'ntzun qyatz te:

—¿Tiqu'ntzun tajb'ila'ya nimaqkawil tu'n tb'inchanteju'ya lu ti'ju' ttanam Qman Dyos? Tu'nxtzunju' tyola matxi' tmaya nimaqkawil, ati tila, qu'n min tjo'na tu'n tanjtzti'ju' tk'wala exni oq.

14Qkyaqil ati tu'n qkyim; ikyqo'ju' kse'n a' ajtel qojl twitz tx'otx', layx b'ent tjaw iq'etl. A pena'te' Qman Dyos ntzaj yek'unte tu'me'l tu'n tanjtzti'ju' xjal exni oq, mya tu'nwt tel tiq'i'nju' tchwinqlal.

15Qu'mtzun machin nule' q'malte lu teya nimaqkawil, qu'n machin xob'e' kye xjal. Machin tzaje' yolil tuk'i'la, qu'n makub' nximane' qaj minab'en matzaj ttzaq'we'nju'ya xinqanine' teya.

16Qama chin tzaj ttzaq'we'na nimaqkawil, qo kletele' tu'na tuk'i'lju' wale' twitzju' tx'otx' lu, ttx'otx' Qman Dyos.

17Qu'mtzun ayine' ju' ajb'el teya nimaqkawil, inchin nayone' tu'n tqe nk'u'je' ti'ju' tzaq'web'l tu'na, qu'n ina' nelta tniky' ti'ju' b'a'n ex ti'ju' myab'a'n, kse'n jun tanjl Qman Dyos. ¡Kyajxwit ten Qman Dyos tuk'i'la nimaqkawil!, chiju' qya te.

18Xi'tzun ttzaq'we'n nimaqkawil teju' qya:

—B'inchama xtalb'il, lalun kub' tewu'n jun ti'xti'ya ti'ju' kxe'l nqani'ne' teya, chij.

—Qanintza, chiju' qya xittzaq'we'n.

19Xi'tzun tqani'nju' nimaqkawil te:

—¿A Joab' xiq'manteju' lu teya, ax?, chij.

Atzunju' qya xittzaq'we'n:

—Lu Qman Dyos in ka'yin, ikxi'xte' kse'n xtmaya. Ana'tzun Joab' ju' nejenel kye t-xjala, saj chq'onweye' tu'n ntzaje', ex aku' saj q'mante tkyaqilju' tu'n nmanteye'.

20Matb'incha, naqwitlo tu'n tb'aj nk'et ch'i'naqtlju' ti'xti'. Tojtzqina'ta nimaqkawil, tkyaqilju' inb'aj toju' tnam, qu'n atixi'x tnab'la kse'n jun tanjl Qman Dyos, chij te.

21Tu'ntzunju' yol lu, xitma'n nimaqkawil te Joab':

—Matxi' b'aj nik'ette' ti'xti' lu wu'ne'. Kutxi'ya ex k'lentza ku'xun Ab'salon, chij.

22Kub'tzun joqe Joab'tz twitz tx'otx' te ninb'il, xitqani'n k'i'wb'il tib'aju' nimaqkawil ex xitma'n te:

—Matxi' tz'el nnik'e' ja'lo nimaqkawil qa b'a'n wilwiye' tu'na, qu'n matxi' tb'inchaya kse'n jun tyolju' ajb'el lu teya, chij te.

23Xi'tzun Joab'tz q'ilte Ab'salon toj Kyesur tu'n tpon Jerusalen.

24Atzunte nimaqkawil tchaq' tu'n t-xiyal tja ex mixti' tu'n tpon q'i'n twitz; qu'mtzun xi' Ab'salon tja ex min tilju' nimaqkawil.

25Mixtoqti' jun xjal toj tkyaqil Israel tb'anilxi'x ka'yin kse'n Ab'salon, ex tu'nju' lu inxi'xtoq jaw nima'n. Mixtoqti' jun ttzakajil tzajx t-xe tqan japunx toj twi'.

26Ajtel tjon Ab'salon twi' ajtjapunchaq junjun ab'q'i, qu'n myab'a'n in tna'n toj, kyaje' lib'r tk'i' nik'jan talalju' twi', kse'nxju' malb'il toju' kawb'il.

27Ate'toqtzun oxe' tk'wal Ab'salon ex jun tmyal, Tamar tb'i, tb'anilxi'x ka'yin.

28Kab'e' Ab'q'i ten Ab'salon toj Jerusalen ex mixti'x b'ent tpon jumaj twitzju' nimaqkawil,

29xi'tzun tqani'n Ab'salon xtalb'il te Joab' tu'n txi' te t-xel tk'etzju' nimaqkawil; atzunte Joab' min taj. Xitkub'sa'n jumajtl Ab'salon tu'n txi' ex mixjun taj.

30Xitma'ntzun Ab'salontz kyeju' tmajin:

—¡Kukyxi'ye' ex kyq'onke' tq'aq'al t-seb'ad Joab' awa'n tu'n toju' ttx'otx' ati tk'etzju' we'!, chij kye.

Ku, chechiju' tmajin Ab'salon exi' q'olokte tq'aq'al tawal Joab',

31atzunte Joab' lwiyxi'x xi' ojqelan tja Ab'salon, ex xitma'n te:

—¿Tiqu'n soka' kyq'o'na' tmajina tq'aq'al wawale'?, chij te.

32Atzunte Ab'salon xittzaq'we'n te:

—Xinma'ne' tq'umli teya tu'n ttzaja, tu'nwtzunlo txi'ya te nxele' tk'etzju' nimaqkawil ex tu'n txitma'na te qa mixti'x ttx'o'lajil tu'nju' ẍin netze' toj Kyesur; awtlote b'a'n axtzu' ẍin kyeja' tene'. Wajb'ilwe' tu'n nxi'ye' tk'etzju' nimaqkawil, exqa ati wile', chin tb'yo'nku'tzuntze', chij.

33Xi'tzun Joab'tz tk'etzu' nimaqkawil ex xitma'n kse'n xitma'n Ab'salon te, atzunte nimaqkawil tchaq' tu'n t-xitxokb'aj. Atzunj tpon Ab'salon twitzju' nimaqkawil, majx kub'joqe twitz tx'otx' te ninb'il. Atzunte' nimaqkawil tk'am ex oktma'tzi'n.