Lv 4 - Mam Ostuncalco Bible

Chojb'il tu'ntpaj il

1Tzaj tma'n Qman Dyos te Moyses tu'n t-xitma'n kye aj Israel kjalu:

2Qa ati jun xb'inchan il ex mya xima'nju' tu'n, tu'n tik' tib'aju' nchaq'b'ile', a kb'inchetel ja'lu:

3Qa aju' kynejel pale xb'inchan il ex makub' tz'aqju' til tib'aju' tnam, ati tu'n tkub' tq'o'n jun tman wakx mixti' ttzakajil nwitze', te jun chojb'il tu'n tpaju' il xtb'incha.

4Ktzajel tiq'i'n nwitze' ttziju' Ja te Mujb'ab'ltib'il, atzuntzu' kb'el tq'o'na' tq'ob' tib'aj twi'ju' wakx, kb'el tb'yo'ntzuntz nwitze'.

5Yajxi'tzuntel axte ktzajel q'inte ch'i'n tchk'elju' wakx ex kxe'l tiq'i'n toju' Ja te Mujb'ab'ltib'il;

6atzuntzu' kb'elixa' tq'o'nju' tq'ob' toju' chik', ex kb'el twitxk'a'n wuq maj nwitze' tu'me'lju' xb'alun teju' ja xjan.

7Ex k'okel t-sun ch'i'nju' chik' kyi'ju' tuk'a q'olb'eb'l tz'e'ysb'il sturak, ju' ati nwitze' toju' Ja te Mujb'ab'ltib'il, atzunju' txqantl chik' kb'el tqo'n t-xeju' q'olb'eb'l tz'e'ysb'il chojb'il k'ok'sb'il, ju' ati ttziju' Ja te Mujb'ab'ltib'il.

8Yajxi'tzuntel k'elel tiq'i'n tkyaqilju' unt kyi'j t-xqintxaju' tal tman wakx kb'eltq'o'n te chojb'il tu'n tpaj il,

9ex kyi'ju' kab'e' tchinaq' exju' unt tok kyi'j, exju' ati twittze'lti'j, exju' unt ati kyi'ju' twab'l, ju' ati tu'n kyel tiq'i'n junx kyuk'i'lju' tchinaq',

10kse'n in b'inchet ti'ju' tman wakx inkub' q'et te chojb'il te mujb'ab'ltib'il, kb'el ttz'e'ysa'ntzun paletz tib'aju' q'olb'eb'l tz'e'ysb'il chojb'il k'ok'sb'il.

11Atzu'n ttz'umalju' tal tman wakx ex tkyaqilju' tchib'jil, tuk'i'lju' twi', tkux, t-xqintxa exju' ttxa

12—mujqa tkyaqilju' wakx—, k'elex tiq'i'n ti'jxi'ju' najb'il toj jun plaj ẍtilun jankub' q'eta' tza'j, tib'ajtzunju' txqan tza'j kb'el tb'incha'n si, k'okel tq'o'ntzun tq'aq'altz.

13Qatzun kykyaqil aj Israel makyb'incha jun il ex myate xima'nju' kyu'n, exqa mix-a'lo'x jun sel tnik' ti'ju' kyb'inchb'aj mya q'o'n tu'n kyb'inchante toju' nchaq'b'ile' ex iktzu'n sela' yal kyil,

14ajtzun tb'injtzju' kyil xkyb'incha, ati tu'n tkub' tq'o'n teyle junjun jun qpoj tman wakx te chojb'il tu'n tpaj il. Kxe'l kyiq'i'n twitzju' Ja te Mujb'ab'ltib'il,

15aye'tzunju' tijwnaq te tnam kb'el kyq'o'n kyq'ob' tib'aj twi'ju' qpoj tman wakx, nwitze', axtzuntzu' kb'ela' kyb'yo'n.

16Atzuntlju' kynejel pale kxe'l tiq'i'n ch'i'n tchk'elju' qpoj tman wakx toju' Ja te Mujb'ab'ltib'il,

17kb'elex tq'o'n twitq'ob' toju' chik' ex kxel twitxk'a'n wuq maj nwitze' twitzju' xb'alun te aq'pub'l.

18Ex k'okel t-sun ch'i'nju' chik' kyi'j tuk'a q'olb'eb'l, ju' ati nwitze' toju' Ja te Mujb'ab'ltib'il. Atzunju' txqantl chik' kb'el tqo'n t-xeju' q'olb'eb'l tz'e'ysb'il chojb'il k'ok'sb'il, ju' ati ttziju' Ja te Mujb'ab'ltib'il.

19Ex k'elel tiq'i'n t-untilju' qpoj tman wakx ex kb'el ttz'e'ysa'n tib'aju' q'olb'eb'l;

20axte kb'inchetilju' ti'ju' qpoj tman wakx lu kse'nx nb'inchet ti'j qpoj tman wakx nkub' q'et te chojb'il tu'n tpaj il; ikytzu'n kb'ela' nk'u'je' tu'nju' pale, kb'el nnajsa'ntzun kyiltze'.

21K'elextzun tiq'i'n qpoj tman wakxtz ti'jxi' najb'il, kse'nxju' nb'inchet ti'ju' tnejel qpoj tman wakx, qu'n a chojb'ilju' tu'n tpaj kyilju' tnam.

22Qa ati jun nejenel matb'incha jun il min q'o'n tu'n tb'inchet toj nchaq'b'ile', jun aj il te' maskye mixtoqti' xima'n tu'n, tu'n tb'inchante.

23Ajtzun teltnik' ti'ju' il xtb'incha, kxe'l tiq'i'n jun chib' mixti' ttzakajil te chojb'il tu'n tpaju' til.

24Kb'eltq'o'n tq'ob' tib'aj twi'ju' chib' ex kb'el tb'yo'n nwitze' ja inche kub'a' b'yeta'ju' alu'mj tu'n kykub' tz'e'yset, qu'n chojb'ilte' tu'n tpaj il.

25Atzunju' pale kjawil tiq'i'n ch'i'n tchk'elju' alu'mj xkub' q'et te chojb'il tu'n tpaj il tu'n twitq'ob', k'okel t-suntzuntz kyi'j tuk'a q'olb'eb'l tz'e'ysb'il chojb'il k'ok'sb'il, atzu'n txqantl chik' kb'el tqo'n t-xe q'olb'eb'l.

26Ex kb'el ttz'e'ysa'n tkyaqilju' unt tib'aj q'olb'eb'l, kse'nxju' in b'inchet ti'ju' unt teju' chojb'il te mujb'ab'ltib'il. Iktzu'n kb'ela' nk'u'je' tu'nju' pale, kb'el nnajsa'ntzun til nejeneltze'.

27Qama b'inchan il jun xjal prow ex mya xima'nju' tu'n, tu'ntzunju' lu matz'elyal ati tpaj, qu'n min q'o'n toj nchaq'b'ile',

28ajtzun teltnik' ti'ju' il xtb'incha, kxe'l tiq'i'n jun ttxu chib' mixti' ttzakajil te chojb'il tu'n tpaju' il xtb'incha.

29Kb'el tq'o'nju' tq'ob' tib'aj twi'ju' alu'mj, ju' kb'eltq'o'n te chojb'il tu'n tpaj il, kb'el tb'yo'ntzuntz ja inkub' q'eta' chojb'il k'ok'sb'il.

30Atzunju' pale kjawil tiq'i'n ch'i'n chik' tu'n twitq'ob' ex k'okel t-sun kyi'j tuk'a q'olb'eb'l tz'e'ysb'il chojb'il k'ok'sb'il, atzunju' txqantl chik' kb'el tqo'n t-xeju' q'olb'eb'l.

31Ex ikx k'elel tiq'i'n tkyaqilju' unt ti'j kse'n inel iq'et ti'ju' chojb'il te mujb'ab'ltib'il ex kb'el ttz'e'ysa'n unt lu tib'aju' q'olb'eb'l te jun tk'ok'jal tb'anilxi'x weye'. Iktzu'n kb'ela' nk'u'je' tu'nju' pale, ex kb'el nnajsa'ne' tilju' xjal lu.

32Qatzun aju' xjal lu matzaj tiq'i'n jun rit te chojb'il tu'n tpaju' il, jun ttxu mixti' ttzakajil ktzajel tiq'i'n.

33Kb'el tq'o'nju' tq'ob' tib'aj twi'ju' rit, kb'el tb'yo'ntzuntz te jun chojb'il tu'n tpaj il ja inche kub'a' b'yeta'ju' alu'mj tu'n kytz'e'yset.

34Atzunju' pale kjawil tiq'i'n ch'i'n tchk'elju' alu'mj xkub' q'et te chojb'il tu'n tpaj il tu'n twitq'ob' ex k'okel t-sun kyi'j tuk'a q'olb'eb'l tz'e'ysb'il chojb'il k'ok'sb'il, atzunju' txqantl chik' kb'el tqo'n t-xeju' q'olb'eb'l.

35Ex k'elel tiq'i'n tkyaqilju' unt ti'j kse'n inel iq'et ti'ju' qpoj tman wakx nkub' q'et te chojb'il te mujb'ab'ltib'il, ex kb'el ttz'e'ysa'n unt tib'aj q'olb'eb'l junx kyuk'i'lju' oyaj tz'e'ysa'n te ninb'ilweye'. Ikytzu'n kb'ela' nk'u'je' tu'nju' pale, kb'el nnajsa'ne' tilju' xjal lu.