2 S 23 - Mam Ostuncalco Bible

Mankb'il tyol Dab'i

1Aye' mankb'il tyol Dab'i ja'lu:

Aju' Dab'i tk'wal Jese

ju' ichan jaw nima'n tu'n Dyos

ju' nimaqkawil sk'o'n tu'n Qman Dyos ja k'uluna' Jakob',

tb'anilxi'xtoq b'itzan b'itz toj Israel,

tchik'b'a kjalu:

2Nyolin t-xew Qman Dyos toj ntziye',

atiju' tyol toj ntziye'.

3Oje yolinte Qman Dyos janche k'uluna' aj Israel;

oje tzaj tma'n Xq'uqilkye aj Israel weye':

Alkyete makawin kyxol xjal tuk'i'l tnik'alilti'j,

ex toj tchiylal Qman Dyos,

4K'okyel kse'n ajttzaj t-xe kya'j,

kse'n q'ij in k'enti te prim qa ẍtilun twitz kya'j,

in ch'iyju' itzaj tu'n tkub'lenxi' jb'al.

5Qu'mtzun majx atiju' nyajajile' twitz Qman Dyos,

qu'n kyej b'entti'j jun tyol tejumajx wuk'i'le',

majx kyej nk'etti'j ex axxi'x.

Intzaj tq'o'n tkyaqil kanb'ab'l weye'

ex intb'incha'n tu'n kyjapun tkyaqilju' wajb'ile'.

6Aye'tzunkye' b'inchal myab'a'n

kykyaqil che okyel kse'n ch'i'x inex xoyit,

ex mix-a'lo' injaw tzyunkye.

7Tu'n jun k'uxb'il mujqa jun ch'ut in che'xa' ptxo'n,

tu'n kyokxq'et toj q'aq'

tu'ntzun kyb'aj patj kykyaqilx, chi Dab'i.

E'nimaq q'ojil kyxol t-xjal Dab'i(1 Cr 11.10-47)

8Aye' b'a'nxi'x che q'ojin ja'lu kyxolju' t-xjal Dab'i: A Is-b'oset, ju' akmonit, nejenel kyeju' oxe' kuwqexi'x, e'kub' tb'yo'n kab'k'al (800) ichan tu'nju' tch'ut toj jun q'oj.

9Ti'jxi'tzun atl Eleasar tk'wal Dodo, aj Aoyit, kyxolju' oxe' kuwqe'xi'x. Ten tuk'i'l Dab'i toj Pas-damim, tej kyb'uyinte kyib' pilistey atzu' tu'n kyq'ojin, aye'tzuntlkye aj Israel eb'jik' b'et.

10Atzunte Eleasar kub' twab'a'ntib' b'a'nxi'x ex okten b'yolkye pilistey tzmaxi'j kykub' siktiju' tq'ob' ex mixti' el ttzaqpi'nju' tk'uẍtx'e'nb'il. Jun nin kanb'ab'l tb'incha Qman Dyos toju' q'ij lu. Exi'tzun lpe xjaltz te q'oj ti'j Eleasar tu'n tkub' kyetza'nju' b'je'l kye ajq'oj.

11Ti'jxi'tzuntl Eleasar atl Sama, tk'wal Awe, ju' ararit. Tej kyb'uyinte kyib' pilistey toj Ley, jata' jun kojb'il awa'n karb'ans toj, e'kub' oqu' aj Israel te q'oj kywitzu' pilistey.

12Atzunte Sama kub' twab'a'ntib' toju' kojb'il ex e'tkol, ekub'ju' pilistey tu'n. Iktzu'n kanb'ana' Qman Dyos.

13Oxe'tzun kyxolju' junaq lajoj (30) xjal te q'oj min nche xob', exi' tk'etz Dab'i toju' jyom toj Adulam, toj tq'ij b'uyit twitz awal. Aye'tzu'n xjal pilistey te q'oj atoqtzu' ta' kyxmuj toju' b'ya' Repaym.

14Atoqtzu' ta' Dab'i toju' ja kuwsa'n, tej tkub' kyq'o'n jun tnej pilistey kyxmuj toj B'elen.

15Atzunte Dab'i tma: ¡Naqwit ati jun tzaj q'inte nk'wa'ye' ti'ju' a' toju' xoch ttzi B'elen!, chij.

16Aye'tzu'n oxe' xjal te q'oj min nche xob' eb'jo'kx kyxolju' xjal pilistey te q'oj, ex jatzkyiq'i'n a' toju' xoch ttzi B'elen, xikyiq'i'ntzuntz te Dab'i. Atzunte Dab'i el tqo'n te chojb'il twitz Qman Dyos ex mixti' xitk'wa'n,

17tmatzuntz: ¡Awt Qman Dyos klonweye' tu'n lalun txi' nk'wa'ne'! ¡Qu'n naku'j kychk'elku' ichan ja'lu ju' ẍe'x q'elte, qu'n jaku'toq che kub' b'yo'n tej ẍe tx'anj q'elte! chij. Mixti'x xitk'wa'n. Aye' oxe' ichan min nche xob' ex kuwqe' eb'inchanteju' lu.

18Atoq Ab'isay, titz'in mo ttzik Joab', tk'wal Sarb'ya, nejenel kye junaq lajoj (30) ichan min nche xob'. Junmaj oktzaqpaj q'ojil kyi'j o'lajnaq (300) ichan tuk'i'lju' tch'ut, ex e'kub' tb'yo'n. Iktzu'n jawa' nima'na' kyxolju' junaq lajoj (30),

19ok nim toklen kywitzju' txqantl, qu'n okq'o'n te nejenel kye. Mixti' pon kse'nqe' oxe' tnejel.

20Atzunte B'enayiy, tk'wal Joyada, tzajni toju' tnam Kab'seel, mixtoqti' nxob' qu'n tb'incha txqan ti'xti'. A kub' b'yo'nkye kab'e' tk'wal Aryel aj Moab', ex jun q'ij intoq kub' che'w, ku'x toj jun jul ex kub' tb'yo'n jun b'alun.

21Ex kub' tb'yo'n jun aj Ejipt ttxlak'e iq'i'n jun tch'ut: ok tzaqpaj B'enayiy b'yolte tuk'i'l jun tze, el txk'a'yi'nju' tch'ut toj tq'ob' ex kub' tb'yo'n tu'nxju' tch'ut.

22Tu'ntzunju' lu, jaw nima'n B'enayiy, tk'wal Joyada, kyxolju' junaq lajoj (30) ichan min nche xob';

23ex ok nim toklen kywitzju' txqantl, ex mixti' pon kse'nqe' oxe' tnejel. Ex oktq'o'n Dab'i te nejenel kyeju' xq'uqilte.

24Aye'tzun junaq lajoj (30) xjalju' min nche xob' lu: A Asael, titz'in Joab'; ex Elanan, tk'wal Dodo aj B'elen;

25ex Sama, aj Arod; ex Elika, aj Arodx;

26ex Eles, ju' paltita; ex Ira, tk'wal Ikyes aj Tekoa;

27ex Ab'yeser, aj Anatot; ex Sib'ekay, aj Usa;

28ex Salmon, aj Aoyit; ex Maaray, aj Netopa;

29ex Eled, tk'wal B'aana, aj Netopax; ex Itay, tk'wal Rib'ay, aj Wib'ea, ju' ati toj kytx'otx' tyajajil B'enjamin;

30ex B'enayiy, aj Piraton; ex Iday, najli ttzi a' Kaas;

31ex Ab'i-alb'on, ju' arb'atit; ex Asmab'et, aj B'awrim;

32ex Elyab'a, ju' saalb'onita; exqe'ju' tk'wal Jasen; ex Jonatan;

33ex Sama, ju' ararit; ex Ayam, tk'wal Sarar, ararit-x;

34ex Elipelet, tk'wal Aasb'ay, tk'walju' aj Maaka; ex Elyam, tk'wal Aytopel, aj Wilo;

35ex Esray, aj Karmel; ex Paaray, ju' arb'it;

36ex Iwal tk'wal Natan, aj Sob'a; ex B'ani, aj Kad;

37ex Selek, aj Amon; aj Naaray, aj B'eerot, onilte Joab', tk'wal Sarb'ya;

38ex Ira, aj Jatir; ex Wareb', aj Jatirx;

39ex Uriy, itit. Junaq wuqlajoj (37) tu'n kykyaqil.