Ez 27 - Mam Ostuncalco Bible

B'itz te kyimni ti'j Tiro

1Tzaj yolin Qman Dyos weye', ex tma:

2Ichan, b'itzanxa b'itz lu te kyimni

3ti'j Tiro, ju' nintnam ati ttzi ninnjab' nxk'aẍlen kyuk'i'lju' nimaqtnam, kyuk'i'l txqan tx'otx' ttzi ninnjab'. Q'manxa te qa a nma'nju'ye' ayine' Dyos Manb'aj:

Tiro, nok tq'o'ntib'a kse'n jun b'ark

xa'wanku'xi'x ex b'a'n ttzinunal;

4npon kanunju' tkawb'ila tzmax toj tk'u'j ninnjab',

xa'wanku'xi'xa jawb'incha'na kyu'n b'inchalteya.

5B'ajb'incha'n tkyaqilju' ttz'lanila

kyi'j tzaj e'tzaj q'i'n twi' witz Senir;

xi'tzaja' ttzeyila ti'ju' k'ute twi' Lib'ano;

6ti'j k'ol toj B'asan eb'inchanjtza' linb'ilteya toj a';

aye'tzu'n jupb'ilteya b'incha'n ti'j tzis

b'ajtzajq'i'n mlaj Chipre

b'incha'n tilb'ilal marpil.

7Intoq ajb'en t-xb'aluna sed,

tz'so'n tilb'ilal toj tzajni Ejipt, te lmulteya;

xb'alun toqju' jupb'il ti'ja morad ka'yin ex kyeq

tzajni q'i'nqe' mlaj Elisa.

8Aj Sidon ex aj Arb'ad qe'toqu' lmulteya,

b'a'nxi'x kyu'n ichan xyotx'ilteya.

9Kyexi'xtoq kyximante ichan tijwnaq aj Kyeb'al

tu'n kyb'inchetju' xitjni teya.

Kykyaqilju' b'arkyil toj ninnjab'

intoq che xk'aẍlen ti'ju' tk'a'ẍa.

10Intoq che ajb'en ichan aj Persya, aj Lidya ex aj Lib'ya

te q'ojil kyxolju' t-xjala te q'oj;

intoq wiqonjtza tu'n kykolb'il ex k'o'ẍ toj kywi',

inxi'xtoq qoptz'aja kyu'n.

11Ate'toq xjal aj Arb'ad, junx kyuk'i'l t-xjala te q'oj, kyib'aju' nintapi ti'jileya, ex ate'toq ichan aj Kamad kyoju' tjaya nimaq kywe'. Intoq che jaw kyyob'a'nile kykolb'il ti'jele tnuqub' ninttapiya, xa'wankuxi'x nela'ya kyu'n.

12Nimtoq txqan tq'inumala, intoq t-xk'aẍle'n Tarsis tuk'i'la, ex intoq tzajq'o'n saqpwaq, k'uxb'il stayn ex plom teya ti'ju' tk'a'ẍa.

13Ex intoq che xk'aẍlin Kresya, Tub'al ex Mesek tuk'i'la, nche tzaj tq'o'n xjal lq'o'n majin e'ti'xti' q'ank'uxb'il teya chojb'ilte twi' tk'a'ẍa.

14Aye'tzu'n aj B'et-tokarma ntoq kychjo'n teya kyu'n chej te aq'untl ex iqal xjal, ex kyu'n chej mul.

15Intoq che xk'aẍlin xjal aj Rodas tuk'i'la. Intoq xk'aẍlina kyuk'i'l txqan tx'otx' toj ninnjab', ntoq kychjo'n twi' tk'a'ẍa kyu'n ab'j marpil ex eb'ano.

16Intoq xk'aẍlen Edom tuk'i'la, ex tu'nju' nim tk'a'ẍa: intoq tzaj kyiq'i'n ab'j kranate, e'xb'alun uk'tza'n tu'n kyeq, tz'so'n tilb'ilal kyoj, sed xb'alun, ex ab'j koral ex rub'ye.

17Ex intoq che xk'aẍlin aj Juda ex aj Israel tuk'i'la, intoq kychjo'n teya tu'n triy njaw Minit, ex tu'n pastel, ta'lkab', aseyt ex k'ok'sb'il.

18Intoq kylq'o'n aj Damask nim ti'xti' ex q'inumal teya; intoq kychjo'n tu'n b'in njaw Elb'on ex lalun ntzaj Saar.

19Tzmax Usal ntzaj kyiq'i'na' b'in teya, e'k'uxb'il tx'no'n, kanel ex ptz'an k'o'k'jxi'x, te t-xelju' tk'a'ẍa.

20Intoq xk'aẍlen kyiqb'il chej Dedan tuk'i'la.

21Intoq che loq'on aj Arab'ya ex kykyaqil nejenel toj tnam Kyedar teya; intoq kychjo'n kyu'n qpoj tman rit, rit ex chib'.

22Intoq che loq'on ẍk'uẍta'l aj Sab'a ex aj Raama teya, intoq kychjo'n kyu'n k'ok'sb'il tb'anilxi'x, e'tb'anil ab'j ex q'anpwaq.

23Intoq che xk'aẍlen Aran, Kane, Eden tuk'i'la, exqe' ẍk'uẍta'l aj Sab'a, aj Asirya ex kykyaqil aj Medya;

24Intoq che kyk'ayi'n xb'alun tz'umin, e'xb'alun kyeq smo'n tk'i' cha'x, tz'so'n tilb'ilal kyoj, e'xb'alun toj plaji'n chukchaq che ka'yin e'kuw ky'jaj xpa'tx'i'n.

25Intoq che ul b'ark tzajniqe' Tarsis lepchitz juntl ti'j juntl, nche tzaj kyiq'i'n k'aẍjel teya.

Ikyju'ya kse'n jun b'ark ajtokx toj tk'u'j ninnjab',

nim q'inumal iqa'n tu'n.

26Xi'ya tib'aj a' nim t-xe kyu'n lmulteya

kyajtzun toqi'na toj tk'u'j ninnjab' tu'n kyq'iq' ntzaj tjawetzq'ij.

27Che b'elex tz'aqju' tq'inumala,

tk'a'ẍa, e'lmulteya exqe' lmulpalet ti'ja,

e'aq'unal ti'j ttzeyila, e't-xk'aẍlela,

e'tq'ojila, ex kykyaqilju' taq'unala,

tzmajx t-xe ninnjab',

toju' q'ij ajt-ximulq'aja toj ninnjab'.

28Che lu'lulju' ttolob' ninnjab'

ajkyjaw ẍch'in nche b'et toja toj ninnjab'.

29Che b'eletzju' lmul b'ark toj kyb'ark;

kykyaqilju' xyotx'il b'ark exqe' nche b'et kyoj b'ark che eletz xlik'pun twitz tx'otx'.

30Che jawil ẍch'in

ex che oq'el b'a'nxi'x ti'ja.

Kjawix kyq'o'n quq toj kywi'

ex kb'el kyxtoli'nkyib' toj tza'j.

31K'elel kyjon kywi' naq tu'nela,

k'okyel kyq'o'n kyxb'alun te b'is

ex okxi'x che oq'el ti'ja.

32kyb'itza' jun b'itz te kyimni ti'ja,

nche b'isun ajkymante toju' kyb'itz:

¿Alkye b'a'n qmante qa ikju' kse'n Tiro,

ju' nintnam atitoq ttzi ninnjab'?

33Nimtoq nimaqtnam nqe kyk'u'j tu'na,

aj kyb'ju'lju' tk'a'ẍa tib'aj ninnjab'.

Intoq che q'inumax nimaqkawil twitz tx'otx' tu'na

tu'nju' nim tq'inumala ex tk'a'ẍa.

34Tb'uchub'tla ja'lo toj ninnjab',

xini mulq'aja t-xe a'.

Mache b'ajx mulq'aj tkyaqilju' tk'a'ẍa

exqe' aq'unal teya tuk'i'la t-xe ninnjab'.

35Mqu'nkyib' kykyaqilju' xjal

najlqe' kyoj tnam ttzi ninnjab' tu'n tpaja;

b'jo'knitl tchi kyi'ju' kynimaqkawil,

q'ancha'l kywitz xob'jni.

36Nche kyej xob'ju' xk'aẍlel

kye txqantl tx'otx' ajtka'yinjtza kyu'n.

Matxi' tz'oka xob'ajilx;

majx makyej najsa'na.