Jue 13 - Mam Ostuncalco Bible

Titz'jlen Sanson

1E'aq'wi jumajtl aj Israel b'inchal taq'wix twitz Qman Dyos, atzunte Qman Dyos exi' tq'o'n kab'naq (40) ab'q'i toj kyq'ob' pilistey.

2Atitoqtzun jun ichan Manoa tb'i toj tnam Sora, tyajajil Dan. B'ajxtoq tzula' talju' t-xu'jil, qu'n mixtoqti' nalan.

3Kub'tzun tyek'u'ntib'ju' tanjl Qman Dyos twitzju' qya ex tzaj tma'n te ikjalu: Layxtoq tz'alana, atzu'n ja'lo kjel ta ch'onwi' ex k'itz'jel jun tala q'a.

4Lantzun k'wan q'e'na mo jun tx'amsa'n k'wab'j, ex lay txi' twana jun ti'xti' tz'il kse'nx ntma'n chaq'b'il,

5qu'n ktiqa' twi' jun tala ex k'itz'jel jun tala q'a, mixti' tu'n tel joyet twi', qu'n kxjansetelte' twitz Qman Dyos na'mxtoq titz'ji, tu'ntzun ttzyet kykletju' aj Israel tu'n toj kyq'ob' pilistey, chij.

6Xi'tzun qyatz q'malte te tchmil ikjalu: Matzul jun t-sanjel Qman Dyos jatoq ta'qine' ex machin jaw lab'tiye' ti'j, qu'n naku'j tanjl Qman Dyoste'. Mixti'we' xxinqani'n te jasaja', ex mixti'te saj tma'n alkye.

7A saj tma'nju' weye' qa ktenb'il jun wale' q'a, ex mixti' tu'n t-xink'wa'ntl q'e'ne' mo juntl tx'amsa'n k'wab'j, ex mixti' tu'n t-xitnik'b'e'ntl jun ti'xti'ye' mya ẍnu'lxi'x kse'nx ntma'n chaq'b'il, qu'n kxjansetelte' k'wal lu twitz Qman Dyos na'mxtoq titz'ji ex tzmax ajtkyim, chij.

8Xitzun tma'n Manoa te Qman Dyos toj tna'j Dyos ikjalu: B'inchama xtalb'il Nman Dyos, smantz jumajtla ichan lu qk'etze' tu'n ttzaj tma'n qeye' titi' qb'incha'ye' tu'n tch'isetju' ne'ẍ k'itz'jel, chij.

9Ex tzaj ttzaq'we'n Qman Dyos tqanb'e'tz Manoa, ex kub' tyek'u'n jumajtltib'ju' tanjl twitzju' t-xu'jil tej atitoq toj kojb'il. Mixtoqtzun a'lo' Manoa atzu',

10xi' ojqelanju' t-xu'jil q'malte te ikjalu:

—¡Ka'yintzpe'ya, matxi' kub' tyek'u'n jumajtltib'ju' ichan kub' tkyek'untib' nwitze' jumaj! chij.

11Jawtzun we' Manoa ex xi' tuk'i'lju' t-xu'jil jata'ju' ichan, ex xitma'n te ikjalu:

—¿Ma aya yolin tuk'i'lju' nxu'jile' tzqeku'? chij.

Tzajtzun ttzaq'we'nju' ichan:

—Ayinatzune', chij.

12Xi'tzun tma'n Manoa te:

—¿Se'ntzun tu'n qch'iysanteye' ne'ẍ ajtjapunju' saj tma'na qeye'? ¿Titi' kqb'incha'ye' ti'j? chij.

13Tzaj ttzaq'we'n tanjl Qman Dyos te kjalu:

—Tu'n tb'inchante t-xu'jila tkyaqilju' matxi' b'ajxnma'ne' te:

14mixti'x tu'n tk'wan q'e'n mo juntl tx'amsa'n k'wab'j mujqa jun tjaq' twa, o'kx tu'n twanteju' ti'xti' ẍnu'l kse'n ntma'n chaq'b'il. O'kxte tu'n tb'inchanteju' matxi' nchaq'e' te', chij.

15-16Mixtoqtzunti' b'i'n tu'n Manoa qa atoq tanjl Qman Dyosu' ichan lu, xitma'n te:

—B'inchama xtalb'il kutkyaja tu'n twana quk'i'le' ti'j jun qpoj tman chib' kb'el qb'incha'ne', chij.

Atzunju' anjl tzaj ttzaq'we'n te:

—Maskye machin kyajtene', lay b'ent nwane' ti'ju' kywaye'. Ate b'a'n q'onku'ya qpoj tman chib' te chojb'il k'ok'sb'il te Qman Dyos, chij.

17Xitzun tma'ntl Manoa teju' anjl kjalu:

—Naqna' o'kxju' tb'iya q'mantza tu'n tjaw qnima'na ajtjapunju' matxi' tmaya qeye', chij.

18Atzunju' anjl tzaj ttzaq'we'n te:

—¿Tiqu'n ntzaj tqani'na'ya nb'iye'? Xjan na'we' nb'i, chij.

19Tzajtzun tiq'i'n Manoa tal chib' exju' oyaj twitz awal k'ok'e'kywitz, e'kub' tq'o'n tib'aj jun pik te chojb'il k'ok'sb'il te Qman Dyos. Atzunte Qman Dyos tb'incha jun ti'xti' tb'anilxi'x kywitz:

20tej tjaw k'antju' q'aq' tib'aj q'olb'eb'l, jawu' tanjl Qman Dyos toju' tqan taq' q'aq' ex xi' toj kya'j. Tej kyka'yinte julu, ekub' mejetzuntz majx ekub' joqe twitz tx'otx'.

21Eltnik' Manoa qa atoq tanjl Qman Dyosu' ichan lu, qu'n min kub' tyek'u'ntltib' kywitz;

22xitma'ntzuntz te' t-xu'jil:

—Qo b'ajelte' ja'lo, qu'n matxi' qil Dyos, chij.

23Atzunte' t-xu'jil xittzaq'we'n:

—Naqwit tajb'il Qman Dyos tu'n qkub'tb'yo'n, Miwtlo jun xitk'mo'nju' chojb'il k'ok'sb'il exju' qoyaj xkub' qq'o'n, exwitlo min xtaj tu'n qlonteju' lu. Exwitlo min saj tma'n tkyaqilju' ti'xti' lu qe, chij.

24Tetzunj tpon tq'ijlalil, itz'ji talju' qya, Sanson tb'i oktq'o'n. Intoq ch'iyju' k'wal, ex intoq k'i'wlantz tu'n Qman Dyos.

25Pon jun q'ij atitoq Sanson toj kynajb'il tyajajil Dan, kyxol Sora tuk'i'l Estaol, ten tipumal tu'n t-xew Qman Dyos.