Pr 31 - Mam Ostuncalco Bible

Tyol Lemwel

1Aye'ju' yol q'umli tu'n nimaqkawil Lemwel aj Masa, aye'j yol ajb'en tu'n ttxu xnaq'tzalte:

2Aya wal, jun oyaja weye',

ex jun tzaq'web'l kye nkub'sb'ile' tu'n Dyos,

¿titi'tzuntl tu'n txi' nma'n teya?

3Lalun kub' tena yajulte tipumala kyuk'i'l qya,

qu'n kyu'nkye qya, inche tzpetju' nimaqkawil.

4Lemwel, myab'a'nte' kyeju' nejenel ex kyeju' nimaqkawil

tu'n kyk'wan q'e'n ex tu'n kytx'ujti,

5Qu'n jaku' tzik'tna'lu' kawb'il kyu'n

ex jaku' mixti'tl kyilwiju' me's kyu'n.

6Q'onxta' q'e'n

kyeju' nche janinje ex kyeju' nche' yajti;

7¡che tx'ujtiku'j

tu'ntzun tik'tna'l kyu'n qa inche yajti ex ẍji'lqe'!

8Ati tu'n tyolina kyi'ju' min nb'ent kyolin;

¡ex ati tu'n tkolona kyi'j mixti' klol kye!

9Yolina kyi'j, ex b'inchama tnik'alilti'j;

¡klomqe'juya prowqe' exqe' me'sqe'!

Ninb'ilte qya b'a'n xjal

10Jun qya b'a'n xjal ch'uẍ tu'n tjyet;

¡qama tze'lyal, tb'anilxi'xte' kyekywitz txqan tb'anil ab'j!

11Majx q'uqlok tk'u'ju' tchmil ti'j,

ex ate nb'inchante tkyaqilju' nojqelan te tchmil.

12B'a'nile ntb'incha'n te tchmil

tkyaqil q'ij.

13Nxi' jyol noq' ex xb'alin sed tb'i,

ex tuk'i'l tzalajb'il nxa' tchmo'na' xb'alun.

14Najchaq nxa' jyolte nojqelan,

kse'nqe' ẍk'uẍta'l najchaq ntzaja' kyk'aẍ toj b'ark.

15Primxtoq ajtjawe'

b'inchal kywa tal ex q'ol kyyaq'u'n tmajen qya.

16Ajtka'yinte jun ky'jaj tx'otx' intlq'o'n,

tu'ntzun tkanb'ab'l noka' tawal toj.

17Primtzun njawe'

ex tuk'i'l tzalajb'il naq'unana'.

18In xitka'yi'n qa b'a'n telu' tk'a'ẍ,

inx aq'unan qonik'an.

19in chqon noq',

ex ax b'inchalkye t-xb'alun.

20kukx nb'inchan xtalb'il kye prow

ex kyeju' meb'a.

21Minti' nxi' b'ajte' tk'u'j toj tq'ijlalil che'w,

kykyaqilju' toj tja atiyile kyxb'alun kutxb'ilkye.

22Axte b'inchalkye ttxo'w,

exju' ti'j nche b'jo'k tq'o'n tb'anil ex tz'uminqexi'x.

23Ojtzqi'nxi'xu' tchmil toj tnam,

qu'n junte kyxolju' ati kyoklen toju' nintnam.

24Inche'x tb'incha'n xb'alun

kyeju' ẍk'uẍta'l

tu'n txi' kyk'a'yi'n najchaq.

25jun qya kuw ex sak',

mixti' nb'ajx tk'u'j ti'ju' te najchi'j, te kab'j.

26Nyolin tuk'i'l nab'l,

ex nten tk'u'jlalil

27Inxi' tka'yi'nju' nojqelan toj tja,

ex mlayx wan qa na'mx tkanb'ante.

28In nimanjtz tu'n tchmil ex kyu'nju' tal.

ex a kyyolju':

29B'a'npunte' qya b'a'n xjal ex twi' aq'unal,

atzunta majx tb'anilxi'xu' taq'unb'ena kyekywitz.

30Noqpelo qak'a'nte nok toj qwitz ti'ju' qya tb'anil ka'yin,

ate' qya nxob' twitz Qman Dyos,

atzunte' b'a'nju'

31¡Knimanktze' kwitz kykyaqil tnam!

¡ex kymanxe' tkyaqilju' tb'inchb'en!.