1Nman Dyos,
tzaq'wentzju'ya nna'j Dyose',
2qu'n aye' chalyol ex b'inchal myab'a'n
inche yolin taq'wix wi'je' tuk'i'l chajyolil
3Nim txqan kyjk'ujyolil tuk'i'l tx'a'lti'jk'u'jb'aj wi'je';
¡inche q'ojink wi'je' extzun mixti' wile' kye!
4Inche okmiltz'uj wi'je' te t-xelju' nk'u'jlalile' kyi'j;
ayintzunwe' nchin na'n Dyose'.
5Taq'wix xkyb'incha weye', tu'nju' b'a'n xnb'inchaye' kye,
nchinel kyik'o'ne' te t-xelju' nk'u'jlalile' kyi'j.
6Q'onk jun xjala aj ilxi'x te ajkawil kyib'aj,
ex axwitju' yolil kyi'j poqonkye;
7che elxwit yal toj kyil ajkyok toj xjel;
tu'nxwitju' kyyol te kolb'ilkye che'xa' toj q'aq'.
8¡Noqwit jte' q'ijxju' kychwinqlal
junxi'tlwit kyejten tib'aju' kyq'inumal!
9¡Che kyajxwitju' kyk'wal meb'a
ex che kyajxwitju' kyxu'jil mixti' kychmil!
10¡Naqxwit che b'etenje kyk'wal mol najchaq!
¡Kyajxwitju' kyja naq tik'lentl!
11Awtju' q'ol ch'ex medi
txi'q'inte tkyaqilju' ati kye.
Junxi'tlwit xjal
txi' elq'anteju' twitz kyaq'unb'en.
12Mixwit alo'x tzaj q'aq'an tk'u'j kyi'j
ex kyi'ju' kyk'wal meb'aqe'.
13Kyejxwitju' kyja mutztelaq,
kub'xwit naju' kyb'i tejumajx.
14Tzajxwit tna'n Qman Dyos myab'a'n xkyb'inchaju' kyman
mixwit tzik'a' tna'l kyilju' kytxu tu'n;
15kukxwit ttzaj na'n kyilju' tu'n Qman Dyos
mixwit che tzaj na'ntl twitz tx'otx'.
16Qu'n mixti'x saj q'aq'an kyk'u'j
kyi'ju' prow ex kyi'ju' me's ex nche b'isun
matz'ok kyljo'n toj kyq'ij ex mache kub' kyb'yo'n.
17Anatzu' soka' kyxon kyk'u'j ti'ju' taq'wixil, ¡tzajxwittzun q'o'n taq'wixil kyib'aj!
Matz'el kyik'o'nju' ky'i'wb'il, ¡mixwittzun che tzaja' ky'i'wla'n!
18Che ktxet-xwit tu'n myab'a'n kse'n jun xb'alun;
tz'exwit meq'eq'en toj kywinqil;
naku'j tu'n aseyt mujqa a'.
19¡tz'okxwit te kutxb'ilkye
ex k'alb'il kyk'u'j!
20¡Awttzun tz'e'ysb'il kywitz wajq'oju'ye' tzaj tq'o'n Qman Dyos
ex kyeju' nche jk'un yol wi'je'!
21Atzunta Nman Dyos,
b'a'nxwit wilwiye' tu'na tu'n tnimanjtzju' tb'iya.
¡Chin tkloma, noqx tu'nju' tk'u'jlalila!
22Prowqine' ex nchin yajtiye',
matxb'aj k'ixb'i wanmiye',
23xi' nkub'aje' kse'n leku'n,
¡inchinx iqane' tu'n kyq'iq' kse'n jun ẍt'ikt'u'l!
24Inche lu'lun nch'ekye' tu'n min nchin wane';
matxi' tz'okwi'je' tu'nju' min nchin wane'.
25¡Matxi' chin okye' te kytzeb'e'tz xjal!
¡Inche jaw xpak'lin ajntzaj kyka'yi'ne'!
26Chin tonima Nman Dyos;
¡chin tkloma tu'nju' tk'u'jlalila!
27Nman Dyos, tz'elxwit kynik',
qa tu'n tq'ob'a xb'incheta' ja'lu.
28B'a'n qama chin b'aj kyyasu'ne',
naqqa nchin tky'i'wla'nta.
Che kub'xwit ch'ixwi
ayintzunwe' chin tzalajele'.
29¡Tz'elxwit kych'ixawju' wajq'oje!
¡Che kub'xwit ẍkyaqax tu'n kych'ixaw!
30Kchin q'ol chjonteye' kukxju' te Qman Dyos;
¡kjawil wajwali'ne' kyxol tnam xjal!
31Qu'n inok yolil kyi'ju' prow
ex nche tklo'n kyeju' poqolkye. Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
