Ez 3 - Mam Ostuncalco Bible

1Ex tzaj tma'n weye':

Ichan, wanxju'ya u'j tz'ib'a'n lu, ex kuxtxi'ya yolil tuk'i'lju' nintnam aj Israel, chij.

2Xink'ab'u'ne' ntziye' ex tb'incha tu'n t-xinwanju'ye' u'j tz'ib'a'n twitz.

3Tzaj tma'ntzuntz weye': B'ilq'unxju'ya u'j tz'ib'a'n twitz lu kxe'l nq'o'ne' teya ex nojx tk'u'ja tu'n, chij.

Xi'nwane' ex b'ajchi'yix toj ntziye' tu'n naku'j ta'lkab'.

4Tzaj tma'ntzuntz weye': Kuxtxi'ya ex q'manxa kye ntaname' aj Israel aju' kxe'l nma'ne'.

5Min nxinchq'o'na toj jun tnam inwt yolin toj jun yol junxi'tl mujqa min tojtzqi'na, inxinchq'o'na kyxolju' aj Israel.

6Min nxinchq'o'na kyoj nimaqtnam nim txqan kyajlal ex nche yolin yol ch'uẍ, aju' lay tz'el tnik'a ti'j. Expena' qama txi' nchq'o'na kyoju' tnam lu, jaku' txib'i'na kyu'n.

7Atzunte' tnam Israel lay taj tu'n txib'i'na tu'n, qu'n minxjun tajb'il tu'n nxitb'i'ne'. Kykyaqil aj Israel pi'sqe'xi'x ex xk'ub' kywi'.

8Ex k'okyela kuw ex pi's wu'ne' kse'nkye.

9K'okyela kuw wu'ne' kse'n ab'j dyamant, kuwxi'x kywitz txqantl ab'j. Lalun xob'a kye ex lalun sak'puja teju' kywitz kkyek'u', maskye pi'sqe'xi'x, chi Dyos weye'.

10Ex tzaj tma'n weye': B'inku'ya b'a'nxi'x tkyaqilju' kxe'l nma'ne' teya, ex q'onkja toj twi'ya.

11Kutxi'ya ka'yilkyeju' twnaqila ate'qe' toj juntl tnam, b'a'nqa matxib'i'na kyu'n mujqa min, q'manxa kye: A xtma Qman Dyos ja'lu, chiku'ya, chij.

12Njaw q'i'ntzuntze' tu'n tipumal Qman Dyos, ex xinb'i'ne' jun tq'ojq'ojel kuw wi'jxi'ye', kse'n jun kyajnajnab', tej tik'ju' tajwalil Qman Dyos ja ta'toq.

13Aju' tq'ojq'ojel tzaj tu'n kyxik'ju' naku'j wnaqqe' ajtik' tiqli t-xik' jun ti'j juntl, exqe' tul ate'k kyi'j; ikytq'ojq'ojel kse'n jun nin kyajnajnab'.

14Injaw tiq'i'ne' tipumal Dyos atzu', intoq chin b'isune' toj jun tk'ayil tej nxi'ye', tzyu'nqintoq' kuw tu'n tq'ob' Qman Dyos.

15Npontzuntze' Tel-Ab'ib', ttzi nin a' Kyeb'ar, janajla'qe'toq aj Israel b'ajxni q'i'nqe' toj juntl tnam, ex wuq q'ij nkyajtene' kyuk'i'l, mixti'xtoq nkane toj nwitze' titi' kxel nb'incha'ne' ex titi' kxe'l nma'ne'.

Oktq'o'n Dyos Esekyel kse'n jun xq'uqil(Ez 33.1-9)

16Tetzunj tb'aju' wuq q'ij, tzaj yolin Qman Dyos weye', ex tma:

17Aya, ichan, xkub' nq'o'na te xq'uqilteju' tnam Israel. Aj txinma'ne' jun tqanil teya, ati tu'n txitma'na qa ayine' nchin q'mante, tu'ntzun kyb'inte.

18Qama txinma'ne' jun tqanil tu'n ttz'e'yset twitz jun b'inchal myab'a'n tu'n kamik; qa min xxityolb'e'na b'inchal myab'a'n exqa min xxitma'na te tu'n tkyaj tq'o'nju' tchwinqlal myab'a'n tu'ntzun tanq'intl, kkyimel tu'n tpaju' til, ayintzunwe' kxe'l nqanine' teya tu'nju' tkamik.

19Qatzun matxitma'na teju' b'inchal myab'a'n, ex min nkyaj tq'o'nju' tchwinqlal myab'a'n, kkyimel tu'n tpajju' til, atzunta kkletela.

20Ex qati jun xjal b'a'n tchwinqlal extzunqa makyej ttzaqpi'nju' tchwinqlal ttxolilti'j ex matxi' b'inchalte myab'a'n, ex makub' nq'o'ne' toj xob'ajil; qatzun min xxitma'na te, kkyimel. Lay tz'okju' b'a'n matxi' tb'incha toj tajlal wu'ne', kkyimel toj til, tib'ajtzunta kjela' nq'o'ne' tkamik.

21Qatzun matxitma'na teju' xjal lu tu'n lalun b'inchan il, ex min xxi' b'inchal il, kb'el anq'in, qu'n mana' txitb'i'nju' xxitma'na te, ex ktkla' tib'a, chij.

Kyej menix Esekyel

22Axtzuntzu' kub'a' tq'o'n Qman Dyos tq'ob' toj nwi'ye', ex tzaj tma'n weye': We'ktza, kutexa toj plan tx'otx', atzuntzu' chin yolila'ye' tuk'i'la, chij.

23Njawe'ye' ex netze' toj plan tx'otx', atzuntzu' wila'ye' tajwalil Qman Dyos, kse'nxju' ojetoq wile' ttzi nin a' kyeb'er. Inkub' mejeye' kupon nplaje' twitz tx'otx',

24nk'amtzune' tipumal Qman Dyos ex nkub' twab'a'ne' b'a'nxi'x. Tzajtzun yolin Qman Dyos weye' kjalu: kuxtxi'ya ex jpunkxtib'a toj tjaya.

25Ka'ntzpe'ya, kb'el k'lo'na toj aqwil, lay b'ent tetza tu'n ttena tuk'i'lju' tnam.

26Expe' knb'incha'ye' tu'n tokx lak'eju' taq'a tojxi' ttziya ex kjeltena me. Lay b'ent kytzak'et tu'na, maskye jun tnam pi's.

27Qatzun ati nyole' tu'n txinma'ne' teya, kyolil jumajtla wu'ne', kxel tma'ntzuntza kye: Lu ntma'n Qman Dyos, chiku'ya. Aju' tajb'il tu'n tb'inte, kb'eltb'i, atzu'n min tajb'il, lay kub' tb'i'n. Qu'n jun tnam pi's.