Sal 64 - Mam Ostuncalco Bible

Na'j Dyos qanb'il kolb'il te Dyos

1Nman Dyos, b'intzju'ya tq'ojq'ojel nwi'ye',

klomju'ya nchwinqlale' kyeju' wajq'oje xob'ajilqe'xi'x.

2Chin tewanku'ya kywitzju' b'inchal myab'a'n

ex teju' kyxim nk'u'n toj ewaj;

chin tkloma kye b'inchal myab'a'n xjaw kyb'u'yi'n kyib' wi'je',

3Naku'j k'uẍtx'e'nb'ilju' kyaq' jqu'n twitzte

inkylanu'n kyyol te k'ixb'sab'l kse'n smaj.

4Inche tzaj xon tzmajx toj kyewb'il ti'ju' xjal mixti' til;

naq myanim ajkytzaj xon ex min nche xob'.

5Inkyoni'nkyib' kyxolilex tu'n kyb'inchante myab'a'n;

inkub' kyxima'n tu'n tkub' kyq'o'n kyxpatxab' toj ewaj

ex toj kynab'l qa mix-a'lo' kka'yilkye,

6qa mix-a'lo' kxpich'ulteju' kyb'inchb'en myab'a'n.

Ate kxpich'ulkyeju'

aju' inel tnik' ti'j tkyaqilju' t-xim xjal toj tanmi.

7Ate Dyos kk'ixb'salkye kyu'n t-smaj,

naq minab'en ajkyok tk'ixb'sa'n.

8Che kb'eltz'aq tu'nxju' kyol,

aye'tzu'n che okyel ka'yinkye kche xmayil kyi'j.

9Kykyaqiltzuntz kche nimal te Dyos

ex kche yolil ti'ju' tb'inchb'en;

k'elelkynik' ti'ju' matxi' b'aj tb'incha'n.

10Ktzalajelju' b'a'n xjal ti'j Qman Dyos

ex ktjya' kolb'il tuk'i'l,

ex kykyaqilju' xjal tnik'alkyi'j

kqeb'el kyk'u'j tu'n, chiju' b'itzal.