Am 4 - Mam Ostuncalco Bible

1Kyb'intzpe'ye' lu, ttxu wakx te B'asan,

ju' ate'qe'ye' twi' witz te Samarya,

nche kub' kyjtz'o'nju'ye' prow

ex nche kub' kyyaju'ne' xjal ati nojqelan kye,

nche'x kychq'o'ne' kychmile'

q'il kyk'wa'ye' b'in.

2Tmate Qman Dyos xjan jun tyol tu'n tb'inchante kjalu:

Tzul tq'ijlalil che kxe'l q'i'ne' tuk'i'l ch'ok k'uxb'il,

ex kche tzyetelju' kyale' tu'n ch'ok k'uxb'il najb'en tzyub'l kyiẍ.

3Kche eletze' toj tal b'e txoli'n kytene',

ex che elex xla'jane' twi' witz Ermon.

Ikju' chi Qman Dyos.

Kuwyol ti'ju' nkyb'incha'n xjal

4Kukyxi'ye' B'etel, ex Kilkal;

¡Che b'inchanqe' ile', kychmomxi'x txqantl kyile'!

Kyiq'inxe' chojb'il te prim

ex kyiq'inxe' tlajoji'n tnej kab'jchaq.

5Ktz'e'ysanku' wab'je' mixti' ttx'amal te jun oyaj te aq'b'il chjonte,

ex kpakb'anxju'ye' kyoyaje' nkq'o'ne' tu'nx knab'le' jaxjaku',

qu'n ana' nche' tzalaju'ye' ti'j.

Iku' chi Qman Dyos.

Mixti'x nok kynab'l aj Israel maskye ntz'e'ysanjtz kywitz

6Ma nb'inchaye' tu'n kyik'e' toj we'yaj,

toj kykyaqil nimaqkytaname';

ma nb'inchaye' tu'n lalun kanun wab'j

toj tkyaqil ktaname',

¡aye'tzunkye' mixti' sanjtz kyi'je' wuk'i'le'!

Iku' chi Qman Dyos.

7Ex nb'inchaye' tu'n lalun tzaj jb'al

oxe' xjawtltaq tu'n tjawju' awal.

Kub' jb'al wu'ne' toj jun nintnam, atzun toj juntl mixti';

kub' jb'al toj jun tnej tx'otx' wu'ne', atzun juntl mixti';

8eb'ajxju' xjal jyol a' tojile junjun nimaqtnam,

ex mya nim knet kyu'n tu'n tik'ju' k'waj kyi'j,

¡aye'tzunkye' min anjtzkyi'je' wuk'i'le'!

Iku' chi Qman Dyos.

9Tzaj nq'o'ne' kyq'iq' inxi'x tz'e'y kyib'aje', ex tzaj nq'o'ne' soj,

ex nb'inchaye' tu'n tkub' tzqiju' kyawale' exju' kyawb'ile' tqan ub'a,

eb'aju' kylob'aje' iw ex olib'o kyu'n ẍt'ikt'u'l,

¡ex mixjun sanjtz kyi'je' wuk'i'le'!

Iku' chi Qman Dyos.

10Tzaj nq'o'ne' jun soj kyib'aje' kse'n tzaj nq'o'ne' tib'aj Ejipt;

nb'inchaye' tu'n kb'aj kyej kyimju' kyku'xune' toj q'oj

ex xinq'o'ne' anb'il kyeju' ajq'oj tu'n txi' kyiq'i'nju' kcheje';

ex nb'inchaye' tu'n ksqonteye' ktzu'wilju' eb'aj kyim toju' knajb'ile',

¡aye'tzunkye' minti' anjtzkyi'je' wuk'i'le'!

Iku' chi Qman Dyos.

11E'kub' nxitune' tu'n jun nin soj

kse'n tzaj nq'o'ne' tib'aj Sodom ex Komor;

ikytoq kyka'yinxju'ye' kse'n ttxalq'aq' matxi'toq b'aj patj toj q'aq',

¡aye'tzunkye' minti' anjtzkyi'je' wuk'i'le'!

Iku' chi Qman Dyos.

12Qu'mtzun, knb'incha'ye' ikju' teya Israel;

ex axxi'x knb'incha'ye',

¡b'inchamtib'a qu'n tzul Qman Dyos nojqelan!

13Ate Qman Dyos, aju' b'inchankye witz ex kyq'iq',

aju' ntzaj yek'unte t-xim te xjal,

a njaw b'inchante spik'un te qxopin,

aju' nb'et kwi'ju' witz nimaqxi'x kywe' toj tkyaqil twitz tx'otx',

a Qman Dyos, a tb'iju': Dyos nimtipumal.