1Intma'n Qman Dyos:
A nq'uqb'ilju'ye' kya'j
atzu'n tx'otx' kykub'el nqane'.
¿Jatzun kb'entela' tjaw kyb'incha'ne' jun njaye'?
¿Jatzun kb'entela' tkub' kyb'incha'n jun najb'ile' jatu'n wojlana'ye'?
2¡Ayinku'ye' nb'inchante tkyaqilju' ti'xti' lu,
ikytzu'n tzyeta' kyten!
Ayine' Dyos Manb'aj nchin q'mante.
Aweju'ye' xjal noknka'yi'n
aju' prow nnanjtzti'j tanmi
intnima'n nyole'.
3Ate'tzunkye xjal nkub' kyq'o'n jun tman wakx te chojb'il,
ex nkub' kyb'yo'n jun xjal;
nokx kyxyu'n tqul jun rit ex nel kytoqi'n twi' jun tx'yan;
nkub' kyq'o'n kyoyaj twitz awal k'ok'e'kywitz ex nkub' kyqo'n tchk'el b'och;
nkub' kytz'e'ysa'n sturak, ex nche k'ulun te jun witzleb'.
Aye' e'sk'onte kyb'e lu inxi'x kub' toj kywitz,
tu'n kyb'inchante tkyaqil ja'lu.
4Ikxwe' knsk'a'ye' yajb'ilkye,
ktzajel nq'o'ne' nxi'x che xob' te kyib'aj.
Qu'n e'tzaj ntxko'ne' ex mix-a'lo' tzaj tzaq'wi,
nyoline' kye ex mix-a'lo' kub'inte;
xikyb'incha'nju' min nkub' toj nwitze',
a jawkysk'o'nju' nnel wik'o'ne', chi Dyos.
Tz'e'ysb'il witzb'aj ex tzaqpib'l5Kyb'inku'ye' tyol Qman Dyos,
aye'ye' nkynima'ne' tyol, kjalu:
Ate' junjun kywnaqile', aye' nche ik'onkyeye',
ljo'n toj kyq'ije' kyu'n tu'nju' nche k'ulune' weye', inkyma'n kjalu:
Yek'umtzun Qman Dyos tajwalil;
qajb'ile' tu'n qka'yinteye' nche tzalaje', chechij.
Naqtzun che b'el ch'ixwitl.
6Ate' inxi'x jukin ntzaj toju' nintnam,
aju' tq'ojq'ojil ntzaj toju' ja te k'u'lb'il,
tq'ojq'ojil twi' Qman Dyos te'
ajttz'e'ysante kywitzju' tajq'oj toj kyil.
7Itz'ji tal Syon toj junkmuj
na'mxtoq ttzyet tch'yon taq'lenal.
8¿Alkye oje b'inte kse'n lu?
¿Alkye oje lonte kse'n ja'lu?
¿Ma jawb'ent jun nintnam toj jun q'ijx?
¿Ma naq toj jun kmujx jawa' b'ent jun tnam?
Atzunte Syon tej ttzyet tna'nte k'ixk'oj
lwiyxi'x e'itz'ji tal.
9¿Se'n taq'witzun ajnmqonte toqwe' tu'n lalun che itz'ji,
extzun wu'ne' nche itz'ja'?, chij.
Aku' Qman Dyos inq'mante.
10Che tzalajxe' tuk'i'l Jerusalen,
che tzalajxe' tuk'i'l, kykyaqile' nkyk'u'jla'ne',
kymujb'am kyib'e' toju' ttzalajb'il
kykyaqile' matxi' che oq'e' ti'j.
11Ex ktq'uqb'a' kyk'u'je'
kse'n jun txub'aj
tzmax ajkykyaj tzalaje' tu'n
12Qu'n ayine' Dyos Manb'aj nchin yolin.
Knb'incha'ye' tu'n tul nak'b'il te
kse'n jun nin a',
ex kyq'inumal nimaqtnam
kse'n jun tnimal a' nxi'x piq'chaj.
Che k'a'chanjtzele' tu'n,
che kxel tchle'ne' toj tq'ob'
ex che b'ajel tz'u'li'ne' tu'n kyib'aj tqan.
13Oknq'uqb'a'ye' kyk'u'je'
kse'n ntq'uqb'a'n jun txub'aj kyk'u'ju' tal,
ex kqeb'el kyk'u'je' toj Jerusalen.
14Che tzalajele' ajkyka'yinteju'ye' lu,
che tzalajel junmajtl kyxmilale' kse'n itzaj
Ktyek'u'te Qman Dyos tipumal kyxolu' tmajin
Exju' tq'oj kyi'ju' tajq'oj.
15Qu'n toj q'aq' tzula' Qman Dyos,
naku'j xkyeqchanpach kykarwaj,
majx ktzajel tb'ajsa'n tk'ayil ttx'u'jil
ex naku'j q'aq' tz'e'ysb'il witzb'aj tzultq'o'n.
16Che okyel tq'o'n Qman Dyos kykyaqil xjal toj xjel tuk'i'l q'aq',
kb'el ttz'e'ysa'n kywitz kykyaqil xjal tu'n tk'uẍtx'e'nb'il
ex nim che kb'el tb'yo'n.
17-18Intma'n Qman Dyos kjalu:
Aye'kye' nkyxjansa'nkyib' ex nkyẍtilsa'nkyib'
tu'n kyok toj k'u'lb'il kye witzleb' kyoj awal
lepchqe'x ti'ju' jun nb'et kyxol,
aye' nche ch'yon kychib'jil b'och ex ich'
mujqa kychib'jil txqantl txkup
majx che b'elnajset tejumajx,
qu'n wojtzqi'ne' kyb'inchb'aj ex kyxinb'e'tz.
Chin ultzuntze' ayinku'ye'
b'uyilkye kykyaqilju' tnam ex nimaqtnam,
che ultzuntz ex kyka'yi' wajwalile'.
19Kxe'l nq'o'n jun techlale'
knq'a'ye' anb'il tu'n kytzaqpaj junjun
ex che kxe'lnchq'o'ne' kyoju' nimaqtnam:
toj Tarsis, toj Lib'ya,
toj Lidya, aju' tx'otx' ja b'a'n che smajin xjal,
toj Tub'al, toj Kresya
ex kyoju' tx'otx' najchaq toj ninnjab',
aye' b'ajx kyb'iya' jun pakb'ab'l wi'je'
ex b'ajx kyila' wajwalile';
aye'tzun che kxelq'mante wajwalilju'ye' kyxol nimaqtnam.
20Che ul kykyaqilju' kywnaqile' kyu'n
che b'ajtzajel kyoj kykyaqil nimaqtnam,
kyi'j b'anchej, kyoj karwaj, kyi'j literas,
kyi'j chej mul, ex kyi'j kamey.
Che ul te jun oyaj weye'
toj Jerusalen, ju' witz xjan weye',
kse'nqe' oyaj nche tzaj kyiq'i'n aj Israel
kyoj b'itidor ẍnu'l toju' njaye' te k'u'lb'il.
Ayine' Dyos Manb'aj matxi' chin q'mante.
21Che jawil nsk'o'ne' junjun kyxol
tu'n kyok te pale ex onilkye pale.
Ayine' Dyos Manb'aj matxi' chin q'mante.
22Ex intma'n Qman Dyos kjalu:
Kse'n ak'a'j kya'j ex ak'a'j tx'otx'
kb'el nb'incha'ne'
che tenb'el tejumajx,
ex ikx che tenb'elju' tyajajila exju' tb'iya tejumajx.
23ex atl junjun xjaw toju' q'ij ak'a'j xjaw,
ex atl junjun sman toju' q'ij te ojlab'l,
kykyaqil ichan che ul kub'sal tziplqe' nwitze'.
Ayine' Dyos Manb'aj matxi' chin q'mante.
24Che b'ju'l ex che kyla' woqo'j qe'tlju' kyimni
tu'n tpaj b'ajkub' kypi'sa'n kyib' nwitze'.
Lay che kyimju' ẍchuq' che ch'yolkye,
ex lay yupju' q'aq' ntz'e'ysankye.
¡Iky'b'ilxi'x che elela' kye kykyaqil xjal!, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
