1Che kub'sanqe'ye' twitz Qman Dyos b'a'n xjal;
tb'anilxi'xte' b'itz inetz toj kytziju' b'a'n xjal.
2Kyq'onx chjonteye' te Qman Dyos tuk'i'l chnab' arpa,
kyb'itzanxe' b'itz tuk'i'l tq'ojq'ojel chnab' tzintzin,
3kyb'itzanxe' jun ak'a'j b'itz,
¡kyq'ajtzanx kychinab'e' nk'u'n tb'anilxi'x aj kyb'itzane'!
4Axxi'xte' tyol Qman Dyos;
kyu'nju' tb'inchb'en nq'ancha'lixa'.
5Intk'u'jla'nte Qman Dyos tnik'alilti'j exju' tzinun;
¡ati tk'u'jlalil toj tkyaqil twitz tx'otx'!
6B'aj b'entju' kya'j ex kykyaqilju' che'w
tu'n tyol Qman Dyos
tu'nju' t-xew xit-xupi'n.
7Ate Dyos k'u'lteju' a'
toju' ninnjab' nim t-xe.
8Kynimanktze' Qman Dyos kykyaqile' ate'ye' twitz tx'otx';
¡che nimane' te, kykyaqile' najlqe'ye' toj tkyaqil twitz tx'otx'!
9Qu'n yolin, ex b'enti tkyaqil;
a q'mante, ex tkyaqil kyej b'enti.
10Ate Qman Dyos inkub' xitunte
tkyaqil kyximju' tnam nche niman kye txqantl dyos,
11aye'tzunkye tb'is tk'u'j Qman Dyos
kukx kytenju' tejumajx.
12Tzalajb'il ta'te' tnam nk'ulun teku' Qman Dyos,
aju' jawni t-sk'o'n te ttanam.
13In ka'yin te Qman Dyos kyib'aj kykyaqil xjal
tzmax toj kya'j;
14tzmax janajla'
nka'yin kyeju' najlqe' twitz tx'otx';
15Ate kub' b'inchanteju' kyanmi
ex in tka'yi'n tkyaqilju' nkyb'incha'n.
16Mixti'te nimaqkawil nklet kyu'n txqan t-xjal te q'oj,
ex lay kletju' xjal te q'oj tu'nx tipumal;
17mixti'x kyajb'entu' chej tu'n tklet jun xjal;
b'a'ntzun qa nim kyipumal, lay b'ent kykolon.
18Atzunte Qman Dyos kukx t-xq'uqinju'
kyi'ju' nche niman te ex q'uqlok kyk'u'j ti'ju' tk'u'jlalil,
19tu'n kyklet te kamik
ex tu'n tq'o'nte kychwinqlal toj tq'ijlalil we'yaj.
20Q'uqliqe qk'u'j ti'j Qman Dyos;
¡Ate onilqe ex xq'uqilqe!
21Intzalaj qanmi ti'j Qman Dyos;
q'uqli qk'u'j b'a'nxi'x ti'ju' tb'i xjan.
22¡Tenwtju' tk'u'jlalila quk'i'le', Nman Dyos
qu'n atzu' q'uqla' qk'u'je' ti'ja!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
