Pr 27 - Mam Ostuncalco Bible

1Lalun b'ajx tk'u'ja ti'j ju' q'ij te najchi'j,

qu'n minti' b'i'n tu'na titi' tzultiq'i'n.

2Q'onxa anb'il kye txqantl tu'n tjaw nima'na kyu'n;

qu'n myab'a'n tu'n tjaw tnima'n tib'a.

3Al qekye' ab'j ex tz'awun,

mastzun alxi'xte' ttx'u'jilju' xnak.

4Kuwxi'xte' tx'u'jilj exju' ik'jtib'il yajb'il,

atzunte' tx'a'lti'j k'u'jb'aj majx xob'ajilxi'x.

5Nimxi'x toklenju' tzak'b'il axxi'x

kyetwitzju' tk'ujlali toj ewaj.

6B'a'nxi'x qama qo' tzak'unjtz tu'n qamiw

kyetwitz tu'n qoktz'u'li'n tu'n jun ajq'oj.

7ate' min q'aq'in, mipe'jun nxi'tlte' ta'l tab' tu'n;

atzunte' xjal inxi'x q'aq'an tkyaqilu' ti'xti' b'lo'n tu'n.

8Aju' xjal nxi' najchaq

ikyju' kse'n pich' nlipan najchaq ti'jxi' tpaqb'il.

9Ikyte nela' jun nab'lju' ntzalaj qanmi ti'j;

kse'n k'ok'sb'il npuk'chaj b'a'n nela'.

10Lalun naqka'yina kyi'ju' tamiwa

mo kyi'ju' tamiw tmana.

ex lalun txi'ya kyja ttzika

qama tzaj yajb'il ti'ja.

ape'te b'a'nju' xjalxi' nqaku' tk'etza

kyetwitz jun twitz'ela najchaq.

11Tenx tnab'la nk'yajul, tzalajb'ilte';

b'a'n nyoljintze' kyu'n xjal.

12Ate' ati tnab'l ajtkub' tq'o'ntib' jun ti'xti' toj tb'e, nel tpa'ntib' ti'j;

atzunte' xjal min ximan ljo'nte' tb'e; ajtna'nte matxitoq kub' yajti.

13Q'inkj jun ti'xti'ya ti'j jun xjal qama tz'ok tziyal ch'ex, qa min tojtzqi'na.

14Myab'a'nte' naq nxit-ẍch'i'na tamiwa na'mxtoq tjawe',

xi' ktzajela' tx'u'jil ti'ja.

15Ikyte jun qya qa noq nẍalb'i

kse'n jun ja kukxju' ntxatjne toj jb'alil.

16Qama txiqmyo'n, naku'j qajb'il tu'n qwab'ante kyq'iq'

mujqa qajb'il tu'n tten aseyt toj tq'ob'.

17K'uxb'ilte' njqunte twitzte juntl k'uxb'il,

atzun jun xjal nok tnab'l tu'n t-xnaq'tzb'il juntl xjal.

18Alkyete' b'a'n ka'yin lob'j iw, klo'l ti'ju' twitz;

ikxtzun xjalju' qama txi' tka'yi'n taq'un tnejel, ktk'ma' oklenj.

19Toj a' q'ancha'l tilb'ilalju' xjal,

ikxqe'tzun xjalju' atzu' nela' knik'tzil tu'nju' kynab'l.

20Mixti'x nqe kyk'u'ju' kamik exju' muqb'il

ikxtzun xjalju' mixjun qen tu'n tjyon.

21Aju' q'anpwaq exju' saqpwaq atzu' nela' tnik'tzil toj q'aq';

atzunte' xjal atzu' nela' tnik'tzil qa b'a'n tyolinjtz.

22Layx kyej t-xonte' xnak t-xnakyil

b'a'nqa makub' tz'e'yset twitz kuw.

23Ka'yinqexju'ya trita,

ex xq'uqimqe'ya qa b'a'nile,

24Qu'n aju' q'inumal exju' oklenj

min nten tejumajx.

25Aj ttzajb'entju' chuẍq'e'n, ex ajtb'aj ẍlajunix,

ex ajkyb'uyitju' k'ul ex itzaj,

26Kyi'ju' trita k'elil tlana tu'n tlq'et t-xb'aluna,

aye'tzunju' chib' tu'n tlq'et ttx'otx'a

27Ex k'elil nim lech kyi'ju' tchib'a

teya ex kye tkyaqilju' toj tjaya ex ajb'el teya.