Esd 9 - Mam Ostuncalco Bible

Kyilju' tnam ex tna'j Dyos Esdras

1Tb'ajlenxi'tzun ja'lu, e'ul lq'eju' kynejel pale q'malte weye' ikjalu: Mya pa'nkyib'ju' aj Israel, exqe' pale kyuk'i'l aj Leb'i, kyi'ju' xjal najlqe' toju' tx'otx' lu, aye' aj Kanaan, itit, peresey, jeb'usey, amonit, aj Moab', aj Ejipt ex amorey, tu'npetzu'n taq'wixi'x kyb'inchb'aju' xjal na'j.

2Matxi' che b'ajmje exqe' kyk'wal kyuk'i'l kymyalju' xjal lu; qu'mtzun, matxi' b'aj kysmo'n kyib'ju' ttanam Dyos kyuk'i'lju' xjal te junxi'tl tnam. Aye'ku'pe' nejenel exqe' kawil ẍekub'nej b'inchalteju' il lu, chechij.

3Tetzunj nb'inteju'ye' yol lu, kub'nlaqu'ne' wi'je', kub' ntzuqi'ne' nwi'ye' ex nxmatziye' te yek'b'il k'ixk'oj, ex nkub' qeye' numjniqinxi'xe'.

4Kykyaqilju' intoq che xob' teju' tz'e'ysb'il witzb'aj tu'n Qman Dyos, tu'n tpaj kyilju' ojetoq che ul jumajtl, b'aj kyb'u'yi'n kyib' nk'etze'; ayintzunwe' q'uqlqinxtoqe' numjni qine' tzmax tponju' kmuj tu'n kykub'q'et chojb'il te qale.

5Atzun kmoju' okjumajtl wipumale', noktene' k'ulul te Qman Dyos tuk'i'lxi' wi'je' ẍla'q,

6xinma'ne' te Dyos: Nman Dyos, nchin ch'ixwi'ye' ex min nkane toj nwitze' tu'n nyoline' tuk'i'la. Matxi' chmet txqan qile' nimxi'x, exu' qpaje' njapun toj kya'j.

7Matxi' b'et-xi' ab'q'i ex ljo'nx qanq'ine' ja'lo toju' il. Oje qo'x q'o'ne' tjaq' kykawb'il nimaqkawil kye txqantl tx'otx', tu'n tpaju' qb'inchb'ene' myab'a'n, e'qile' ex kyilu' qnimaqkawile' exqe' pale qxole'. Matxi' qo' b'aj k'ixb'iye', maqo' ex iq'i'ne' toj qtx'otx'e', matz'el iq'i'n tkyaqil qe'ye' ex maqo'el ik'u'ne', ex ato'xe' ja'lo toju' yajb'il qe'ye' lu.

8Atzu'n ja'lo, Nman Dyos, tu'nju t-xtalb'ila maq'onjtz tzaqpib'l kye jun k'loj quk'i'le' ex matzaj q'o'n anb'il qe'ye' tu'ntkun qb'incha'ne' qjaye' toju' tx'otx' xjan; matzaj tq'o'na ak'a'j spik'un kye, matzaj tq'o'na ch'i'n ojlab'l toju' yajb'il qe'ye'.

9B'a'ntzunqa maqo oke' k'a'yi'nmajin, min sik qna'le' tu'na tjaq'ju' yajb'il qe'ye'; matyek'u'ya t-xtalb'ila qeye' kywitzju' nimaqkawil aj Persya, matzaj tq'o'na qchwinqlale' tu'n tjaw qb'incha'n jumajtle' tjaya te k'u'lb'il kyoju' tik'len, ¡maqo tkola toj Juda ex toj Jerusalen!

10Atzu'n ja'lo, Taye, ¿titi' kxel qma'ne' tib'ajxi' tkyaqilju' matxi' b'aj qb'incha'ne'? Na'mx kyjapunju' chaq'b'il qu'ne'

11e'tchaq'a toj kytziju' t-sanjelala, ajb'elqe' teya. Tzajpena' toqxena'na qe'ye' qa aju' tx'otx' ja qo'pomila'toqe' ex ja qtzyu'ya'toq qtx'otx'e', nojnitoq tu'n kyb'inchb'aju' xjal taq'wixi'x, ju' najlqe'toq atzu', tu'nju' kyb'inchb'en myab'a'n matxi'toq noj twitzju' tx'otx' lu tu'n kytz'ilil.

12Ex tmaya qe'ye' tu'n miche kub'a' qmujb'a'ne' qmyale' kyuk'i'lju' kyk'wal ex kymyal kyuk'i'lju' qk'wale', ex tu'n lalun qo onine' kyi'j tu'nwt kyten toj nak'b'il ex toj b'anil, tu'ntzun tten qipumale kukxju', tu'n qanq'ine' kyi'ju' ntq'o'nju' tx'otx' ex tu'n tkyaj qq'one' te kyetzb'ilju' qyajajile' che ul yajxi'tl tejumajx.

13Tib'ajxi'pe' tkyaqilju' yajb'il matxi' tzik'x qu'ne' tu'n tpaju' qb'inchb'aje' myab'a'n ex txqan qpaje', mixpenati' xkub' ttz'e'ysa'na qwitze' kse'nxtoqju' qile', mape' qokub' tq'o'na toj tzaqpib'l,

14¿ma ktzunlo k'elel qik'o'n jumajtle' tchaq'b'ila ex tu'n tokqq'o'n jumajtl qib'e' kse'nqe' xjal mixyab'a'n nkyb'incha'n? ¿Ma laytzun tzaj ttx'u'jila qi'je' ex tu'n qkub' tb'ajsa'na qkyaqile'?

15Nman Dyos, majx tnik'altati'j qeye'; matb'inchaya tu'n qanq'ine' jun k'loj qb'aje', lu nqka'yi'ne' ja'lo. Axxi'x ayo'qe' ati qpaje' twitza; qu'mtzun lay b'ent qtene' twitza.