Is 50 - Mam Ostuncalco Bible

1Intma'n Qman Dyos kjalu:

¡Lan kymaye' qa nnel wik'u'ne' Israel kytxuye',

kse'n jun xjal inel tik'u'n t-xu'jil,

mujqa exink'a'yi'ne' te majen

kse'n jun xjal ati tk'as te juntl!

Exi' k'a'yi'nkye' qu'n eb'inchan ile';

el ik'u'nte' kytxuye' Israel

qu'n e'okye' pi's.

2¿Tiqu'n mix-a'lo' knet wu'ne' tej wule'?

¿Tiqu'n mix-a'lo'te tzaj tzaq'wi tej ntxokone'?

¿Ma laytzun che klete' wu'ne' toj kywitze'?

tu'npena' jun nyole' ajnmanteye', tu'n tkub' tzqiju' ninnjab'

ex tu'n kykub'tzqiju' nin a';

tu'n kyb'ajkyimju' kyiẍ tu'n k'waj

ex tu'n kykub'q'ayj tu'n tpaj mixti' a'.

3In nktxu'ne' kya'j toj qxopin

ex in nktxu'ne' naku'j toj xb'alun te b'is, chij.

Q'uqb'ab'l tk'u'j tmajin Dyos toj yajb'il

4Matxi' chin tzajt-xnaq'tza'ne' Qman Dyos

tu'n nq'uqb'ante kyk'u'jju'ye' siktenilqe'

tuk'i'l yol te tzalajb'il.

Tkyaqil prim nchin jaw tk'asune'

tu'ntzun txi' nb'i'nju'ye' tyol.

5Matxi' tzaj tq'o'n Qman Dyos nnab'le',

ex min xkub' npi'si'n wib'e' te

ex min xxi' nmiltz'u'n nwitze' te.

6Xinq'o'ne' tze'lwi'je' tu'n nb'aj asyali'ne'

ex ku nchije', b'je'tz xb'oqi'n nxmatziye'.

Min kub' wewa'n nwitze'

kyeju' nche ilink ex nkytzub'i'n toj nwitze'.

7Ate Qman Dyos nnonin weye':

qu'mtzun min nche'xju' yajb'ilweye' toj nwinqile';

qu'mtzun wa'lqine' b'a'nxi'x kse'n jun pik,

b'i'nxi'xna' wu'ne' lay tz'el nch'ixawe'.

8Axtzu' ta'ju' kolol wi'je' nk'itze':

¿Ma ati jun ati tq'oj wi'je'?

¡Qo'qe'na' junx twitz ajkawil!

¿Ma ati jun ati toklen toj twitz tu'n tpoqonte?

¡Kuna'tzaj ex q'mantz weye'!

9Ana'te' Qman Dyos nnonin weye';

¿alkye kb'ajsalweye'?

Che b'elnajkye' kykyaqilju' wajq'oje

kse'n xb'alun nb'aj tu'n pok'.

10Aye'tzunkye' nche nimane' te Qman Dyos

ex nxikyb'i'ne' tyolju' tmajen:

qama che b'ete' toj qxopin,

ex mixti'x ch'i'n spik'un toj kyb'eye',

qek kyk'u'je' ti'j Qman Dyos;

kyq'onxkyib'e' toj tq'ob' Qman Dyos.

11Kykyaqiltzunkye' nche txqon q'aq'

ex nche b'inchan tal kysmaj tuk'i'l tqan taq' q'aq',

aye'x che b'ajel tojxju' kyq'aq',

tu'nxju' talsmaj nk'ant xkub' kyb'incha'n.

Atzun tz'e'ysb'il kywitzju'ye' ktzajel tq'o'n Qman Dyos

ex che kjel lantz'aj toju' k'ixk'oj.