Sal 104 - Mam Ostuncalco Bible

B'itz teju' B'inchalte tkyaqil

1¡Kjawil nnima'na Nman Dyos tu'n tkyaqil nk'u'je'!

¡Nimxi'x toklena Taye, Nman Dyos!

Matxi' tz'ok toksa'na tajwalila tb'anilxi'x;

2Matz'ok tktxu'na spik'un ti'ja naku'j jun xb'alun.

¡Xit-slik'u'na kya'j naku'j jun xb'alun!

3¡E'kub' twab'a'nju'ya tqan tjaya

tib'aju' a' tzmaxtzu' jawnixi'!

In ajb'enju' muj tu'na te tkarwaja;

¡in b'eta tib'aj t-xik'ju' kyq'iq'!

4Aye' t-sanjelalju'ya kyq'iq',

aye'tzu'n tqan taq' q'aq' nche ajb'en teya.

5Kub' tq'o'na tx'otx' kyib'aju' tq'uqlil

tu'n lalun yukchi.

6Ktxu'n toqju' tx'otx' tu'n ninnjab' nim t-xe

naku'xwitloj t-xb'alun.

Ktxu'nqe'toqju' witz tu'n a'.

7Tetzunj txi' ttzak'una, ik' oq;

lwiy ik' oq tej txi' tb'i'nju' toj twi'ya nxi'x tinun.

8Jax kywi' witz

ex ku'tz kyoju' b'ya',

xi'tzuntz toju' najb'il b'incha'ntl tu'na te,

9kyej tq'o'nju'ya tnaqach tu'n lalun tzik'tz jlajintl,

tu'ntzun lalun tzulkanun jumajtl ktxulteju' tx'otx'.

10Inche jawb'entju' kyxiklil a' tu'na

exqe' a' nche b'et kyxol witz.

11Ti'jtzu'n a' lu nche k'wana' tojk'ul txkup;

inel k'waj kyi'ju' toj k'ul chej tu'n.

12Inkyb'incha'n pich' kyja

kytziju' nin a'

¡atzuntzu' nche oq'a' kyxolju' tq'ob' tze!

13Aya ntzaj chitunte jb'al kyib'aju' k'ul

tzmaxtzu' toj kya'j jata' tjaya;

inb'aj tak'sa'nju'ya twitz tx'otx' tu'n nin jb'al intzaj twitz kya'j.

14In tch'isa'nju'ya k'ul te kywa alu'mj,

ex tawal xjal

tu'n tjawju' twa twitz tx'otx',

15aju' twa nq'onte tipumal,

exju' tk'wa' ta'l ub'a ntzalajsante

ex nqoptz'ajxi'xju' twitz tu'n kyetwitz tu'n aseyt.

16Inel k'waj kyi'ju' tze,

e' k'ute awa'nqe' tu'n Qman Dyos toj Lib'ano.

17Kywi' tze lu nkyb'incha'na' kyja tal pich' b'o'sqe',

ex kywi' tzaj najlqe' nimaqpich' naku'j garsqe'.

18Kywi' nimaq witz ta'qe' tojk'ul chib',

aye'tzu'n tojk'ul ẍiky najlqe' kyxol pik.

19Kub' tb'incha'na xjaw tu'n techitju' tq'ijlalil;

b'i'n tu'nju' q'ij alkye kmoj tu'n tex.

20Ajttzaj tq'o'na qlolj te qonik'an,

inche b'je'tztzun talu'n k'ultz.

21Inche tzanunju' b'alun tu'n tpaj kychi';

inxikyqani'n te Dyos tu'n txiq'o'n kywa.

22Ajtzun tjawu'l q'ij, in nanjkyi'j

ex nche b'ajx paqeb'il toj kyjul.

23Inextzun xjaltz aq'unal

ex nnaq'unan tzmax ajqok yupj.

24¡Taye, nim ti'xti' matxi' che tb'inchaya!

Tkyaqil kub' tb'incha'na tuk'i'l nab'l;

¡nojni twitz tx'otx' kyu'n kykyaqilju' kub' tb'incha'na!

25Luju' ninnjab' nim twitz min nb'aj qka'yinte,

ja najlqe' txqan txkup layx b'ent kyajlet,

e'nimaq ex k'ok'e';

26atzu' nche b'eta' b'ark, ex atzu' ta' nin txkup Leb'yatan,

ju' nin txkup kub'ni tb'incha'na tu'n t-ẍchan toj.

27Kykyaqilju' txkup lu nche ayon ti'ja

inxitq'o'na kywa aj kyq'aq'an.

28Inche tk'a'cha'na, ex nche wan;

intzaj tjqo'na kye ex nche noj b'a'nxi'x

29qatzun matxitewa'n twitza kye, inche jaw b'isun;

qama tz'el tiq'i'nju'ya kyxew inche kyim

ex nche kub' quqix.

30Qatzun ntzaj tq'o'na t-xewa te chwinqlal, inche poq'on,

ikytzun ntch'exb'e'n twitz tx'otx'ju'ya.

31¡Tejumajxju' tajwalil Qman Dyos!

¡Intzalajte Qman Dyos ti'ju' tb'inchb'en!

32Injaw lu'lunju' tx'otx' ajttzaj ka'yin Dyos te;

¡inche jaw qusinju' witz ajkyok ttzyu'n!

33Kchin b'itzalwe' te Qman Dyos,

toj tkyaqil nchwinqlale'.

34Tzalajxwit Qman Dyos kyi'ju' nxime',

qu'n o'kxtzu' nkneta' ntzalajb'ile' tuk'i'l.

35¡Che kub'xwit naju' aj il twitz tx'otx'!

¡Mixwit che anq'ina'tlju' b'inchal myab'a'n!

¡Kjawil nnima'ne' Qman Dyos tu'n tkyaqil nk'u'je'!

¡Ajwalinjtzxwit! Chiju' b'itzal.