Pr 21 - Mam Ostuncalco Bible

1Aju' tnab'l nimaqkawil naku'j tnimal a' toj tq'ob' Dyos,

ex inxitiq'i'n jaxja tajb'ila'.

2Tkyaqilju' te xjal intb'incha'n majx b'a'nile toj twitz,

o'kxte Dyos neltnik' ti'ju' t-xim xjal.

3B'inchamju'ya tnik'alilti'j,

qu'n tb'anilxi'x nela' toj twitz Dyos kyetwitz chojb'il.

4Aju' xjal in tnima'ntib' tk'i' tnab'l in q'ancha'lix tu'nju' twitz;

ex tkyaqilju' te intb'incha'n ilqe'kye'.

5Aye'ju' xim b'a'n xinb'enkye inche elb'a'n;

atzunju' inche kub' nk'et toj ojqelb'il minti' in che elb'a'n.

6Tkyaqil q'inumal nk'met tu'n chajyolil

noq jun kmuj te' tzalajb'il tu'n kyeju' inche jyonte tb'eyil kamik.

7Axju' kyb'inchb'en xjal b'inchal myab'a'n kb'el xitunkye,

tu'n tpaj min xkyaj tu'n kyb'inchante tnik'alilti'j.

8Tz'ilju' tu'me'l tk'i' tz'anq'inju' xjal b'inchal myab'a'n ex mya q'uqli tk'u'jlalil;

atzu'n xjal nanq'in toj tnik'alti'j ẍnu'l tchwinqlal.

9tb'anilxi'xte' tu'n qnajan toj jun ja xoq'l t-xe;

kyetwitz tu'n qnajan toj jun nin ja tb'anilxi'x tuk'i'l jun qya mixti'x tnab'l.

10Aju' in b'inchan myab'a'n o'kxtzu' in ximana' tu'n tb'inchan il;

ex min inche tk'u'jla'n twnaqil.

11Tu'n tz'e'ysb'il twitzju' pi's, nkaneya' toj twitzju' min nximan;

atzu'n xjal ati tnab'l nkane toj twitz noqx tu'n ajt-xi' chik'b'a'n te.

12Nximanju' tnik'alxi'xti'j ti'ju' taq'wixil ntzaj ti'ju' xjal aj il;

ajttzaj q'o'nju' yajb'il tib'aj.

13Alkyete min nxitb'i'n tkub'sb'ilju' prow

ex ikxte lay tzajb'i'n ajtqanin o'nb'il.

14Aju' xjal kuw ttx'u'jil

inkub' tk'u'j tu'n jun oyaj nxiq'o'n te toj ewaj.

15Intzalaju' xjal tnik'alti'j aj tb'inchetju' tnik'alilti'j,

atzu'n kyeju' b'inchal myab'a'n jun xitb'il nnul.

16Alkyete matz'el tpa'ntib' ti'j ju' tb'eyil nab'l,

atzu' kweb'ila' kxol kyimni.

17Alkyete' ntk'u'jla'n achb'il kb'el prowix,

exqe' nkyk'u'jla'n b'in e'k'ok'sb'il lay che jaw q'inumax.

18Kyajtelju' xjal b'inchal myab'a'n ex xmletz'

te t-xelju' xjal tnik'alti'j.

19Tb'anilxi'x tu'n qnajan toj chq'ajlaj

kyetwitz tu'n qnajan tuk'i'l jun qya mixti' tnab'l ex kuw t-tx'u'jil.

20Toj tjaju' xjal ati tnab'l ati nim q'inumal ex k'ok'sb'il,

atzunju' mixti' tnab'l mixti'xte ati te qu'n tkyaqil in kub' tnajsa'n.

21Alkyete noktilil tu'n, tu'n tok tnik'alti'j ex b'a'n xjal

in okyal chwinqlal tu'n ex oklenj.

22Nok tzaqpaju' xjal ati tnab'l ti'j jun nintnam jpu'nti'j,

majx nkub' tb'ajsa'n tkyaqilju' tipumal jaq'uqla'toq tk'u'j.

23Aju' xjal nximan tib'aju' tyol kxe'l tma'n,

lay txi'jk'u'n toj jun ti'xti' myab'a'n.

24Aju' xjal nimaltib', la'j ex xmayil

a tb'iju' xjal mixti' tnab'l.

25Aju' ky'ej nim ti'xti' tajb'il tu'n tten te,

aye'tzu'n tq'ob' mixjun nche aq'unan;

26tkyaqil q'ij npon tk'u'j ex nlab'ti.

Aye'tzunkye' tnik'alkyi'j nche tzalaj tu'n kyoyin.

27Nche tik'o'nte Dyos chojb'il kyu'n xjal b'inchal taq'wix,

qu'n inxi' kq'o'n tuk'i'l taq'wix nab'l.

28Aju' myab'a'n tziyal ati tu'n tkyim,

Atzunju' b'a'n tziyal ati tyol te kolb'il.

29Noktq'o'ntib'ju' b'inchal myab'a'n kuxi'xtej majx tnik'alti'j;

atzunte' tnik'alti'j q'uqlixi'x tk'u'j qa nanq'in b'a'n.

30Mixti'te nab'l, k'atztwi' ex b'a'n yol

majxwit nim toklen twitz Dyos.

31Aye'kye xjal inb'aj knk'u'n ju' kychej tu'n kb'jex toj q'oj,

atzunte Qajaw inq'onte kyipumal tu'n kykanb'an.