Ez 18 - Mam Ostuncalco Bible

Til yilex junjun

1Tzaj yolin Qman Dyos weye', ex tma:

2¿Tiqu'n kukx tq'manjtz yolju' nq'umli toj Israel kjalu: Aye' manb'aj nche'x lo'nteju' ub'a tx'am, aye'tzu'n kyk'wal nche tzaj ch'yon kywitzte tu'n?

3Axxi'x kxe'l nma'ne', ayine' Dyos Manb'aj, lay kyma junmajtle' yol nq'umli lu toj Israel.

4Weqe'we' tkyaqil xjal twitz tx'otx', e'manb'aj ex k'walb'aj. Kkyimelte' nb'inchan il.

5Ate b'a'n xjalju' ntb'incha'n tnik'alilti'j ex toj ttzinunal:

6min nxi' toju' nimaqwan kywi' witz ninb'ilkye witzleb', ex min nokqe tk'u'j kyi'ju' mya dyosqe' toj Israel; min neltiq'i'n t-xu'jil twnaqil, ex min nkub' kẍe tuk'i'lku' t-xu'jil kse'n akxtoq nkb'u'l ttx'ajin;

7min nokten yajlalte juntl, inpe' anj tanjsa'n ti'ju' ntk'mo'n tprentil k'as teju' k'asb'enal te; min nalq'an ti'j juntl; inxitq'o'n twaju' nb'aj tu'n we'yaj ti'ju' twa ex nxitq'o'n t-xb'alunju' mixti' ti'j;

8min nxitq'o'n medi ch'ex tk'i' tub'chil; min nb'inchan taq'wix ti'j juntl; toj tnik'alti'j nkub'a' tnk'u'n jun q'oj kyxol kab'e' xjal;

9ntb'incha'n kse'nx ntma'n nkawb'ile' ex nche japunile nchaq'b'ile' tu'n. Axxi'x toj tzinun ta'ju' xjal lu, qu'mtzun k'anq'il. Ayine' Dyos Manb'aj nchin q'mante.

10Qatzun ati jun tk'walju' ichan lu tx'u'j ex b'yolxjal, ntb'incha'n alkyexku' ti'xti' lu

11ju' min nche tb'incha'ntoqju' tman, nxi' wal kyoju' nimaqwan kywi' witz ninb'ilkye witzleb', ex neltiq'i'n t-xu'jil juntl xjal,

12qa tok yajlalkye prow exqe' ati nojqelan kye, qa in alq'an kyi'j txqantl, qa min nanjtanjsa'n ti'ju' ntk'mo'n tprentil k'as teju' k'asb'enal, qa q'uqlok tk'u'j kyi'ju' mya dyosqe' ex nche tb'incha'n ti'xti' ik'o'nqe' wu'ne',

13qa nq'on medi ch'ex tk'i' tub'chil; lay tz'anq'inju' ichan lu. Kyb'ajlenxi' tb'incha'n tkyaqilju' ti'xti' lu myab'a'n toj nwitze', kkyimel ex mixti'tl q'a'nb'ilte, kkyimel tu'nx tpaj til.

14Qajpe' ati jun tk'walju' ichan lu, matz'ok tka'yi'n tkyaqilju' il xb'aj tb'incha'n tman, ex min xxilpe toju' tqanb'en tman;

15qa min xxi' toju' ninwan nok kywi' witz te ninb'il kye witzleb', ex min nokqe tk'u'j kyi'ju' mya dyosqe' toj Israel; qa min neltiq'i'n t-xu'jil juntl xjal,

16qa min nokten yajulte juntl xjal; qa min neltiq'i'n prenil jun k'as maqaninjtz te; qa min nalq'an ti'j juntl, inpe' xitq'o'n twaju' naj tu'n we'yaj ti'ju' twa, ex nxitq'o'n t-xb'alunju' mixti' ti'j;

17qa min nb'inchan taq'wix ti'j juntl, qa min nq'on medi che'x tuk'i'l tub'chil; qa nche japun nkawb'ile' tu'n ex ntb'incha'n kse'nx nkyma'n chaq'b'ile': lay kyimte' ichan lu tu'n tpaj til tman. Axxi'x k'anq'il.

18Atzunte' tman qama yajun ex matz'elq'an, ex matb'incha taq'wix toju' ttanam, kkyimel te tz'e'ysb'il twitz tu'n tpaj til.

19Qajpe'lo kyxjelu'ye': ¿Tiqu'ntzun lay tchoj k'walb'aj til tman? Qu'n ttzinunal nate' k'walb'aj xtb'incha ex tnik'alilti'j, ex mache tb'incha tkyaqilju' nkawb'ile': qu'mtzun axxi'x k'anq'il.

20O'kxte' xb'inchan il kkyimel. Lay tchojte' k'walb'aj til tman, ex lay tchojte manb'aj til tk'wal. Ktk'ma'te' tnik'alti'j chojb'ilteju' tnik'alilti'j xtb'incha; atzu'n b'inchal il ktz'e'ysetel twitz tu'n kypaju' til.

Tnik'alilti'jte Qman Dyos ntb'incha'n(Ez 33.3-20)

21Qatzun makyej tq'o'n b'inchal myab'a'n tkyaqilju' il matxi' b'aj tb'incha'n, ex ma japun tkyaqilju' nkawb'ile' tu'n ex matb'inchaju' ttzinunal ex tnik'alilti'j, axxi'x k'anq'il ex lay kyim.

22Lay tzaj nnantle' tkyaqilu' taq'wix xtb'incha, ex k'anq'il tu'nju' matb'incha ttzinunal.

23Mya wajb'ile' tu'n tkyimju' b'inchal taq'wix, a wajb'ile' tu'n tanjtzti'j tanmi ex tu'n tanq'in. Ayine' Dyos Manb'aj nchin q'mante.

24Qatzun makyej tq'o'n tnik'alti'ju' tchwinqlal b'a'n, ex matxi tb'incha'ntlju' taq'wix ex ik'b'ilqe'xi'x kse'nx tb'inchb'aju' b'inchal il, ¿Ma oktzun k'anq'il toj kywitze'? Lay tzajnna'ntlwe' tkyaqilju' b'a'n tb'incha: kkyimel tu'n tpajju' min xjapun tu'n nwitze' ex tu'n kpaju' til.

25Oklo kyma'ye' qa mya tnik'alilti'ju' nb'incha'ne'; b'inkupe'ya, tnam Israel, ¿ma myab'a'nju' nb'incha'ne' toj kywitze'? ¿Ma myatzunlo aye'ye' taq'wix nkyb'incha'ne'?

26Qa min xitb'incha'ntl tnik'alti'ju' b'a'n ex matxi tb'incha'ntlju' taq'wix, kkyimel tu'n kypaju' tb'inchb'aj taq'wix.

27Qatzun aju' b'inchal myab'a'n makyej tq'o'n b'inchaj taq'wix ex matb'inchaju' b'a'n ex tnik'alilti'j, kkletel.

28Qama tz'el tnik' ex makyej tq'o'n tkyaqilju' il matxitoq b'aj tb'incha'n, axxi'x k'anq'il ex lay kyim.

29Oktzun tma'te' tnam Israel qa mya tnik'alilti'ju' nb'incha'ne'. ¿Myatzun tnik'alti'ju' nb'incha'ne'? ¿Myatzun aju' tnam Israel min ntb'incha'n tnik'alilti'j?

30Teyile junjunkye' che okyele' toj xjel wu'ne', aj Israel, kse'nxju' kyb'inchb'aje'. Ayine' Dyos Manb'aj nchin q'mante. Kytzaqpinkje' tkyaqilju' kyb'inchb'aje' myab'a'n tejumajx, tu'ntzun lan che kyime' tu'n kypaj kyb'inchb'aje' myab'a'n.

31Kypa'milkyib'e' ti'j tkyaqilju' myab'a'n matxi' kyb'inchaye' nwitze', ex kukyoke' junx kyanmiye' ex jun kyxewe' ak'a'j. ¿Tiqu'n kkyimela'ya, tnam Isarel,

32myana' wajb'ilwe' tu'n tkyim junkye'? Kytzaqpinkje' myab'a'n, che anq'iltzuntze'. Ayine' Dyos Manb'aj nchin q'mante.