1Tzaj yolin Qman Dyos weye' ex tma':
2Kutxi'ya ex q'manxa toju' nintnam Jerusalen;
ẍch'inxa kye tu'n kyb'inte b'a'nxi'x kjalu:
¡Lu ntma'n Qman Dyos!
Na'n wu'ne' tej intoq nxmoxo'na, intoq nimana weye',
tej tok nq'o'na te nxu'jile', intoq chin tk'u'jla'na
tzaj lpeya wi'je' toj chq'ajlaj,
toju' tx'otx' min njaw tawal.
3Xjansa'nqe'toq aj Israel nwitze',
atoqte tb'anilxi'x twitz wawalju'ye'.
Qa atitoq jun naq'pon tq'ob' ti'j, intoq kub' ntz'e'ysa'ne' twitz
intoq tzaj nq'o'ne' yajb'il tib'aj.
Ayine' Dyos Manb'aj nchin q'mante, chiku'ya kye, chi Dyos.
4Kyb'intze' tyol Qman Dyos, tyajajil Jakob', kykyaqile' toj tja Israel.
5Lu ntma'n Qman Dyos kyeye':
¿Titi' myab'a'n elyal wi'je' kyu'n ojtxi' kyyajilb'ene',
tu'n elkypa'n kyib' wi'je'?
Eb'ajx lpe kyi'j dyos mixti'x kyajb'en,
ex aye'ku' e'ok mixti'x kyajb'en.
6Min b'ajx kyk'u'j tu'n kjyon wi'je',
extzun e'etzwiq'i'ne' toj Ejipt,
exi' wiq'i'ne' toj chq'ajlaj
toj tzqij tx'otx', nim xaq toj,
mixti' a' toj, xob'ajilx
mix-a'lo' najli ex mix-a'lo' nb'et toj.
7E'tzaj wiq'i'ne' toju' tb'anil tx'otx' lu,
tu'n kywan ti'ju' tawal njaw
ti'ju' tb'anil twitz awal njaw twitz.
Aye'tzunkye naqẍe ul tz'ilsalte ntx'otx'e',
matz'el wik'u'ne' ntx'otx'e' lu tu'n kypa.
8Min ejyonju' pale wi'je',
mixti' elkynik'ju' xnaq'tzal toj ntaname' weye',
jawkyi'nkyib'ju' nejenel wi'je',
toj tb'i B'aal e'yolina' nsanjelale'
ex ek'ulun kywitz witzileb' mixti' kyajb'en.
Tzyet q'oj tu'n Qman Dyos ti'j Israel9Qu'mtzun, ayine' Dyos Manb'aj:
Ktzyetel jun q'oj wu'ne' kyi'je' ex kyi'j kychmane'.
10Kupekyxi'ye' kyoju' swejtx'otx' toj ninnjab' tkub'exq'ij,
kychq'onx junkye' tu'n tkyaj ka'yilte b'a'nxi'x,
qa nb'inchet ikjalu:
11Qa ati jun nintnam nimal kye junxi'tl dyos matxi' tch'exb'e tdyos.
¡Extzun mya dyosqe'!
Atzu'n ntaname' matxi' chin kyej tq'o'ne', ayine' kyajwalil,
naqx tu'n kypaj witzileb' mixti' kyajb'en.
12¡Xob'xa kya'j te ja'lu!
¡Tzajx tchi ti'ja!
Ayine' Dyos Manb'aj nchin q'mante.
13Kab'e' il matxi' tb'inchaju' ntaname':
machin kyej kykolb'i'ne',
ayine' t-xiklil a' itz',
aye'x eku'x b'inchankye kyxoch
min b'ent tk'u'yit a' kyoj qu'n inex a' kyxe, chi Qman Dyos.
Tililju' kypi'sal aj Israel14Myana' lq'o'n majinte' Israel;
myana' tk'wal lq'on majinte'
¿Tiqu'ntzun xa'q'i'n tkyaqilju' ati te?
15¿Titiqu'n nche oka' tzaqpaju' ajq'oj kyi'j,
naku'j b'alunqe' nxi'x che tzanun?
B'ajkub' kyxitu'n ttx'otx'
b'jo'k q'o'n kyq'aq'alju' nimaqtnam
ex mix-a'lo'te kyejten kyoj.
16Kub' pa'n twi'ya,
kyu'n xjal aj Menpis ex aj Tapnes.
17Matzaju'lu ti'ja, tu'n tpaj ẍin kyej tkolb'e'na
ayine' Dyos Manb'aj, tib'aja
intoq nẍaqlu'na toj b'e.
18Tzun ja'lu, ¿ti'tzu'n tkanb'a'ya tu'nju' kxe'la Ejipt
k'wal ti'ju' nin a' Nilo?
¿Titi' ktkanb'a'ya tu'n kxe'la Asirya
k'wal ti'ju' nin a' Ewprates?
19Kb'el tz'e'ysa'n twitza tu'nx tb'inchb'ena myab'a'n
axju' tpi'sila kxe'l q'onteya toj q'aq'.
Ximanku'pe'ya, k'elil tnik'a ti'ju' myab'a'n ex yajb'il,
saj tu'nju' ẍinkyej tkolb'i'na
ex tu'n min xnimana weye',
ayine' Dyos Manb'aj tib'aja.
Ayine' Dyos Manb'aj te tkyaqil ipumalj nchin q'mante, chi Qman Dyos.
Kypi'sal aj Israel20Matxi' b'et q'ij jaw ti'ntib'a wi'je',
min taja tu'n nxitb'i'na.
Tmaya: Lay chin ajb'enwe', chija.
Matz'ajpajina nwitze'
Kywi' nimaq witz
ex kyjaq' tze pujin kyxaq.
21Ku'x wawa'na kse'n junwi' tb'anil lob'j ub'a,
kse'n tijajil lob'j ub'a tb'anilxi'x.
¡Atzunta matxi'xi'x kub' ẍk'ostiya,
min inetl nnik'e' teya!
22B'a'npetzunqa mattx'ajtib'a toj ta'l tza'j
exqa mache ajb'en chukchaq q'eq tu'na;
kukx ttente ttz'ilil tilju'ya nwitze'.
Ayine' Dyos Manb'aj nchin q'mante.
23¿Se'n taq'wi tu'n tmanteya: Mya tz'ilqinwe'
b'ajx chin k'uluna'we' kywitz mya dyos qe', chiwta?
Na'ntzpe'ju'ya tu'me'l se'n anq'ina'ya toj b'ya',
ximankupe'ya tkyaqilju' matxi' tb'inchaya
aya kamey ojqel b'eta
inel tpa'ntib'a ti'ju' tb'eya;
24toj k'ul ttxu b'ur naq'li toj chq'ajlaj
inxi'x xepjne naqwit ti' tu'n txitwan.
Kse'n qa nxky'aqlin, mix-a'lo' kb'entel tjk'u'jte.
Qama jyon jun b'ur ti'j, mixti' tu'n tel b'aj ti'j:
qu'n toju' tq'ijlalil t-xky'aqli'n k'okyil yala' tu'n.
25¡Israel, lalun tk'ixb'sa' tqana tu'n tojqelan mixti' t-xajab'a,
lalun ku'x tzqij toj tqula!
Atzunta tmaya: Lay, lay kyajte' wu'ne';
inchin laqjwe' kyi'ju' min ojtzqi'n kwitz ex chin xe'le' kyuk'i'l, chija.
B'a'n tu'n ttz'e'yset kywitz aj Israel26Ikse'n eleq' inel tch'ixaw ajtelyal,
iktzu'n k'elila' tch'ixaw Israel,
tkyaqilju' tnam, e'nimaqkawil, e'nejenel,
e'pale exqe' sanjelal;
27qu'n nxikyma'n te jun tze: Aya nmane', chechij,
atzu'n te jun ab'j: Aya ntxuye', chechij.
Atzu'n weye' nin nche tzaj ka'yin, naq kytze'lkyi'j ntzaj kyq'o'n.
Qatzun xi' ttzaj xob'ajil kyi'j, ntzaj kyma'n weye':
¡Kuttzaja klol weye'! chechij.
28Aj Juda, ¿jatzun ta'qe' kydyose' e'kub' kyb'incha'ne'?
¡Txqana' kydyose' kse'nx kyajlalju' nimaqtnam toj Juda!
¡Kuna'tzun kytzaj qa che kletile' kyu'n
aj tulju' taq'wixil kyi'je'!
29¿Ti'tzu'n nkyq'ojine' wi'je',
kykyaqilna'kye' majaw kyi'nkyib'e' wi'je'?
Ayine' Dyos Manb'aj nchin q'mante.
30Mixti'x oka' tz'e'ysb'il kwitz kyk'wale' kub' nq'o'ne',
qu'n min sok kynab'le'.
E'kub' kyb'yo'ne' sanjelal
naku'j tx'u'j b'alunqe'ye'.
31(Ex ikxqe'ye' najlqe'ye' toju' tq'ijlalil ja'lo,
kyb'intze' tyol Qman Dyos.)
Israel, ¿Ma ojetzun chin okxi'ye naku'j chq'ajlaj teya?,
¿mujqa te jun tx'otx' qxopin?
Ntanam ¿tiqu'n inkyma'ne':
Tzaqpi'nqo'qe'; milo najchi'j tu'n tanjqi'je' tk'etz? chechije'.
32¿Ma jakutzun tzik' kyna'l tachb'il jun qpoj qya tu'n?
Atzunte' ntaname'
matxi' b'et q'ij tik'len nna'le' tu'n.
33¡Majxpe'tzun tojtzqi'na b'e
ajt-xi'ya jyolkye ichan!
¡Xnaq'tzala toju' xnaq'tzb'il taq'wix!
34B'ajni txa'ju' ti'ja toj kychk'elju' prow ex mixti' kyil,
toj kychk'elju' min ẍe' elyal toj kyil tu'na.
35In petzun tma'ntla:
Mixti'we' wil. Min nq'ojintl te Dyos wi'je', chija.
Tu'ntzu'n ntma'na qa mixti' tila,
k'okyel toj xjel wu'ne'.
36¿Tiqu'n nxi'x oktilil tu'na tu'n tch'exb'enteya tuk'i'la?
Ikx k'elel tch'ixawa tu'n Ejipt
kse'n el tch'ixawa tu'n Asirya.
37K'anjetz ti'ja Ejipt toj tch'ixawa b'a'nxi'x,
qu'n matxi' che el wik'u'nwe' ja matxi' tz'oka' qe' tk'u'ja,
ex mixti'te' ktkanb'a'ya kyuk'i'l, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
