Dn 8 - Mam Ostuncalco Bible

Yek'b'il toj witzik' ti'j rit ex chib'

1Tojtzunju' toxi'n ab'q'i nkawin B'elsasar, ayine' Danyel, tzaj yek'u'n juntl weye' toj witzik' ti'jxi'tlu' ojetoq kub' nwitzk'ane'.

2Toju' nwitzik'e', kutzunj tinqintoqe' toju' nintnam Susa, toju' tx'otx' Elam, nqayin ttziju' nin a' Ulay.

3O'kx txi' nka'yine' jun rit atitoq ttzi tnimal a' najchaq. Atitoq kab'e' tuk'a nimaqqe', yajxi' tetz ch'iyju' jun ex nimxtoq ch'i'ntl pona' kse'nju' juntl.

4Xinka'yine' intoq tokyinju' rit lu toj tkub'ex q'ij, toj tnayajkya'j ex toj tb'a'nq'ob'kya'j, ex mix-a'lo'toq juntl alu'mj tu'n twe' twitz ex tu'n tklontetib' te. Intoq tb'incha'n tkyaqilju' tajb'il ex atl junjun maj kuwxi'xtoq.

5Inxtoqtzun chin ximane' ti'ju' oknka'yine', o'kx txi' nka'yine' xitoq ttzaj jun chib' toj tkub'exq'ij, ojqelxi'xtoq tel ex mitoqjunti' nche kub'ju' tqan twitz tx'otx'. Aju' chib' atitoq jun tuk'a nimin kxolju' twitz,

6tetzunj tpon tk'etzju' rit kab'e' tuk'a, aju' xinka'yine' ttzi tnimal a', okten tokolte tu'n tkyaqil tipumal

7majx elttoqi'nju' kab'e' tuk'a, ex mixti'x tipumalju' rit ten tu'n ttokyin tuk'i'l. Kub' tz'aqju' rit twitz tx'otx' tu'n chib' ex okten wab'ilte, mix-a'lo'te klonte.

8Xi'toq tten tipumalju' chib' atl junjun q'ij, tetzunj ttenxi'x tipumal, eltoqju' tuk'a nimin, ex eb'je'tz ch'iy kyaje'tl tuk'a te t-xel, nche ka'yinx tu'me'lju kyaje' t-xe kya'j.

9Ti'jtzun junju' tuk'a el anq'in juntl tuk'a b'o's, ex ch'iy tu'me'lju' tnayajkya'j, toj tjawetzq'ij ex tu'me'lju' tb'anil tx'otx'.

10Ch'iy b'a'nxi'x ex majx japun kanun kyi'ju' ate' toj kya'j, ex ku'tz t-xon jte' che'w ex majx jaxwe' kyib'aj,

11expe' okten ik'lelteju' nejenel kye ate' toj kya'j, ex e'kub' tnajsa'n chojb'il nkub' tkyaqil q'ij ex kub' ttxa'ju'n ja te k'u'lb'il.

12Nimxi'x taq'wixil b'aj tb'incha'n, e'kub' tq'o'n t-xjal te q'oj jatoq nb'incheta' chojb'il, kub' t-xonju' ax twitz tx'otx'. Tb'incha tkyaqilju' b'a'n toj twitz ex tkyaqil b'ajb'ent tu'n.

13Yajxi'tzuntl xi'nb'i'ne' xit-xjelu'n jun anjl te juntl: ¿Jtojtzun b'aj ttxa'nju' nb'inchanjtz ti'ju' q'olb'eb'l teju' chojb'il nkub' tkyaqil q'ij? ¿Jte'lo q'ijtl ktenb'elju' il taq'wix lu, tu'n txiq'o'n tja Qman Dyos exqe' nche niman te tu'n kyb'aj wab'i'n? chij.

14Xi'tzun ttzaq'we'n juntl anjl te: Tzmaxi'j ajtjapun jo'k'al o'lajnaq (2,300) qale ex prim. Tb'ajlenxi'tzun ja'lu, kxjansetilju' ja xjan, chij.

15Intoqtzun chin ka'yine' ti'j, ayine' Danyel, toju' witzik' lu ex wajb'iltoqe' tu'n tkane toj nwitze', o'kx myanim tjaw b'ent jun tilb'ilal naku'j ichan,

16xi'tzun b'i'ne' toj twi' jun xjal iktoqju' ttzaj tu'me'l nin a' Ulay, intoq tma'n: Kab'ryel, chik'b'anxa xyek'et teju' ichan lu, chij.

17Tzaj lq'etzuntz nk'etze'. Atzunwe' tzaj xob'el wi'je', ex nkub' mejeye' twitz majx ku'pon nplaje' twitz tx'otx', atzunte tzaj tma'n weye': Tz'elx tnik'a tiju' xtila, xi' nyolina' ti'ju' mankb'il tq'ijlalil tzul, chij.

18Tetzunj intoq yolintz weye', majx nkub'numje' ex nkub' tz'aqe' twitz tx'otx'; atzunte njaw tiq'i'ne' ex nkub' twab'ane',

19tzaj tma'ntzuntz weye':

Kxe'l nchik'b'a'ne' teya ti'ju' kb'ajel ajtjapun b'aj ju' ttx'u'jil Qman Dyos, qu'n atzu' nyolina'ju' xtila ti'ju' mankb'il tq'ijlalil.

20Aju' rit kyuk'i'lju' kab'e' tuk'a, xi' nyolina' kyi'ju' nimaqkawil aj Medya ex aj Persya.

21Aju' chib' aju' nimaqkawil te Kresya, atzunju' tuk'a niminju' ati kxolju' twitz, aju' tnejel nimaqkawil.

22Aye'tzunju' kyaje'tl tuk'a ẍeb'je'tz ch'iy te t-xelju' nimin xjaw toqj, xi' nyolina' qa che eletz kyaje'tl kawb'il toju' nintnam lu, naqtzun aju' lay pon kyipumal kse'nju' tnejel.

23Ajtzun tjapun b'aj kykawb'ilju' kawil lu

ex aj tchmexi'xtl kyil,

k'okyeltzun jun nimaqkawil toju' kawb'il mixti'x tnab'l ex k'atz

24Ktenb'el nimtipumal,

nimaq xitb'il ktb'incha'

k'elelb'a'n te tkyaqilju' ktb'incha'.

Che b'elt-xitu'n xjal nim kyipumal ikxqe' ttanam Qman Dyos,

maskye mya tu'nku' tipumal.

25Kkanb'al tu'n ttx'yamal,

ex tu'n t-sb'ub'l.

Kjawil tnima'ntib',

ex naqx myanim ajkykub' tb'yo'n txqan xjal

nche anq'in toj nak'b'il.

K'okyel tq'o'ntib' q'ojil ti'ju' Nejenel kye nejenel,

layxtzun kanb'an qu'n majx kb'el xitu'n tu'n.

26Matxi' txi' yek'u'n teya kyi'ju' qale ex kyi'ju' prim, ex axte'; naq o'kx e'wanku'ya, qu'n kjapumelte' ajtik' b'a'npun tq'ijlalil, chij.

27Ayintzunwe' Danyel, nkub'numje' ex b'a'npun q'ij nyab'tiye'. Yajxi'tzuntel njawe'ye' ex naq'wi jumajtle' aq'unal toju' ninkawb'il te nintnam. Majxtzun nkyej ximane' ti'ju' nwitzik'e' qu'n mitoqjunti' nkane toj nwitze'.