1Kykyaqilxtzunju' aj Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j ex Kalaad, b'aj kyb'u'yi'n kyib' twitz Qman Dyos toj Mispa.
2Kykyaqilju' nejenel kye junjun tnej tyajajil Israel ate'toq, ex b'aj kyb'u'yi'n kyib' kab'naq lajmutx' (400,000) xjal te q'oj ttanam Qman Dyos qe'.
3Kyb'iju' tyajajil B'enjamin qa matxitoq b'aj kyb'u'yi'n kyib'ju' txqantl tnej tyajajil Israel toj Mispa. Ex xikyqani'n aj Israel te' aj Leb'i se'ntaq'wi tb'ajiju' il lu.
4Xitma'n aj Leb'i tchmilju' qya b'aj yaju'n ex kyim kjalu:
—In pone' tuk'i'lju' nqyaye' toju' nintnam Kib'ea, kytanam tyajajil B'enjamin, tu'n nkyajtene' te qonik'an atzu'.
5Aye'tzu'n xjal toju' nintnam lu b'aj pon kyb'u'yi'n kyib' ti'ju' ja jatoq ta'qo'ye' teju' qonik'an lu, tu'ntoq nkub' kyb'yo'ne', ex eb'jo'k tzaqpaj jwolte nqyaye' ex majx kyim kyu'n.
6Tzaj wiq'i'ntzuntze' kyimnitl, b'ajkub' waq'pu'ne', ex xi' nsma'ne' jun piẍ toj kytx'otx' junjun tnej tyajajil Israel, tu'ntzun kyb'inte kykyaqil aj Israel il lu taq'wixi'x.
7Tojtzun kyq'ob'e' tyajajil Israel ta' ja'lo tu'n kymanteye' titi' tu'n tb'inchet, chij.
8Kykyaqilxtzunju' tnam xjal junx kyxim, e'kub' we' ex kyma:
—Mix-a'lo' junqe tu'n tanj tja.
9A kqb'incha'ju' kxelqse'n tu'me'l tu'n tel tnik'tzil alkyeqe' tu'n kyq'ojin ti'j Wib'ea.
10Junjun ti'j lajoj (10) xjal te kykyaqilju' tnej qyajajil, kxe'l jyol kywaju' xjal te q'oj; aye'tzu'n txqantl che kxe'l q'olte tu'me'l t-xel kye aj Wib'ea tu'nju' il taq'wixi'x xkyb'incha kyxol aj Israel, chechij.
11Kykyaqilju' aj Israel e'muje, junx kyxim tu'n kyq'ojin ti'ju' nintnam.
12Exi' kychq'o'n sanjelal toj tkyaqilju' tx'otx' kye tyajajil B'enjamin q'malte kye ikjalu: ¿Tiqu'n xb'aja'ju' il lu taq'wixi'x kyxole'?
13Kyq'onqe'tze' xjal tx'yanqe' ate' toj tnam Wib'ea tu'n kykub' qb'yo'ne', tu'ntzun tnajsetju' il lu qxol, chechij.
Aye'tzunkye' tyajajil B'enjamin mixti' exi kyb'i'n txqantl aj Israel kytzik,
14ape' kyb'inchaju' b'aj kyb'u'yi'n kyib' te kykyaqilju' nimaqtnam toj Wib'ea, tu'n kyxi' q'ojil kyi'ju' jte'tl aj Israel.
15Oxmutx' jo'k'al (26,000) kyb'aju' xjal te q'oj e'tzaj kyoj kykyaqil nimaqkytanam tyajajil B'enjamin, myaqe'tzuntlu' junk'al o'lajnaq (700) ichan sk'o'nqe' aj Wib'ea.
16Kyxoltzu'n kykyaqilju' ichan lu ate'toq junk'al o'lajnaq (700) b'a'ntoq che xon tu'n kynayaj, majx in yab'o'k jun xya'n kyu'n ex mixti' jumaj inwt txalpuj kyu'n.
17Ikxkye' txqantl aj Israel b'aj kyb'u'yi'n kab'naq lajmutx' (400,000) xjal q'ojil ik'ni kywitzlalil b'a'nxi'x.
Q'oj kyi'ju' tnej tyajajil B'enjamin18Exi' aj Israel B'etel, xi' kyqani'ntzuntz te Qman Dyos tu'n kyb'inte alkye tnej kyyajajil kq'ojil nejtl kyi'ju' tyajajil B'enjamin. Tzaj ttzaq'we'n Qman Dyos kye qa a Juda kq'ojil nejtl.
19Primtzun kyb'jaw we' aj Israel ex e'kub'ten twitzju' tnam Wib'ea.
20E' b'aj pon lq'e kyk'etzju' tyajajil B'enjamin, ex e'kub'ten twitz Wib'ea, txoli'nkyib' tu'n kyq'ojin.
21Aye'tzunkye' tyajajil B'enjamin e'etz toju' nintnam, ex e'kyim kab'mutx' o'lajk'al (22,000) aj Israel kyu'n toju' q'ij lu.
22-24Qu'mtzun exi' aj Israel toj B'etel oq'el twitz Qman Dyos tzmaxi'j qok yupj, ex xikyqani'n qa ati tu'n tanj jumajtlkyi'j q'ojil kyi'ju' kyitz'in tyajajil B'enjamin. Tu'ntzunju' tchaq' Qman Dyos tu'n kyq'ojin jumajtl, tentl kyipumal, exi' jumajtl q'ojil te juntl q'ij kyi'ju' tyajajil B'enjamin jaxju' epona' nejtl.
25Aye'tzunju' tyajajil B'enjamin eb'je'tz jumajtl toj Wib'ea q'ojil kyi'j, ex e'kyim kab'mutx' jo'k'atl (18,000) aj Israel te q'oj kyu'n.
26Kykyaqiltzunju' xjal aj Israel te q'oj ex kykyaqilju' tnam exi' jumajtl B'etel oq'el twitz Qman Dyos. Mixti' e'wan tb'aj q'ij, ex kub' kyq'o'n chojb'il k'ok'sb'il ex chojb'il te mujb'ab'l twitz Qman Dyos.
27-28Atoqtzu' ta'ju' kax k'ub'lteju' yol kyejni b'entti'j tu'n Qman Dyos toj B'etel toju' tq'ijlalil lu, toj tq'ob'u' pale Pinees tk'wal Eleasar ex tchman Aaron ta'ya'toq. Xi'tzun kyqani'ntl aj Israel te Qman Dyos ikjalu: ¿Ma kqo q'ojil jumajtle' kyi'ju' qitz'ine' tyajajil B'enjamin, mujqa ẍe tenku'j? chechij. Tzajtzun tma'n Qman Dyos kye: Kukyxi'ye' q'ojil, qu'n che kanb'alkye' najchi'j wu'ne', chij Dyos.
29Ekub'tzun jutze jte' xjal aj Israel te q'oj ti'jile Wib'ea,
30aye'tzu'n txqantl xi'toq kyxi' kyi'ju' tyajajil B'enjamin toju' toxi'n q'ij lu, ex b'aj kynk'u'nkyib' tu'n kyq'ojin twitz Wib'ea, kse'nx kyb'incha toju' kamaj nejtl.
31E b'je'tztzun jumajtlju' tyajajil B'enjamin najchaq ti'ju' nintnam tu'n kyq'ojin kyi'ju' aj Israel. E'b'ajlo junaq lajoj (30) aj Israel kyu'n toj tb'eyil B'etel ex Kib'ea, ex kyoj kojb'il,
32Toj kynab'l qa intoq che oqu' aj Israel kywitz, exqa matxitoq kub'kyi'j kse'n toju' kab'e' maj nejtl. Wichiqa intoq che el lq'e aj Israel najchaq ti'ju' nintnam, tu'n kyxilpeju' ajq'oj kyi'j tzmax kyoju' b'e.
33E'etztzun aj Israeltz jatoq jutzla'qe' ex kub' kytxoli'n kyib' tu'n kyq'ojin toj B'aal-tamar; ex ikx eb'je'tzju' jutzlqe'toq toj k'ul ti'jile Wib'ea
34ex e'oktzaqpaj q'ojil ti'ju' nintnam. Junmutx' jo'k'al (10,000) kyb'aju' nimaq q'ojil aj Israel e'oktzaqpaj q'ojil ti'j Wib'ea. Kuwtoqju' q'oj, ex mixtoqti' b'i'n kyu'n tyajajil B'enjamin qa xi'toq tkub'kyi'j.
35E'kanb'an aj Israel tu'n Qman Dyos kyib'aj tyajajil B'enjamin, oxmutx' kab'k'al o'lajnaq (25,100) xjal te q'oj tyajajil B'enjamin e'kyim kyu'n aj Israel toju' q'ij lu.
36Eltzun kynik' tyajajil B'enjamintz qa matxitoq kub'kyi'j.
E b'je'x lq'eju' aj Israel najchaq nejlqe'toq kywitzju' tyajajil B'enjamin, qu'n q'uqlitoq kyk'u'j kyi'ju' ichan jutzlqe'toq tu'n kyq'ojin ti'j Wib'ea.
37Naqxi'x myanim kyok tzaqpaju' ichan lu q'ojil ti'j Wib'ea ex eb'aj kub' kyb'yo'n kykyaqilju' xjal toju' nintnam Wib'ea.
38B'entnitoqtzun ti'j kyu'nju' jutzlqe'toq tu'n kyok tzaqpaj q'ojil ti'ju' nintnam kyuk'i'lju' txqantl aj Israel tu'n kymante tqanil tu'n txqan sib' ajttzyetju' nintnam kyu'n.
39Tojwittzunloju' kmoj naku'j eb'aj kub' oqju' aj Israel aj t-xi' kyka'yi'nju' sib', tu'nwtlo tanjkyi'j q'ojil kyi'ju' tyajajil B'enjamin.
E' kyimx junaq lajoj (30) aj Israel kyu'n tyajajil B'enjamin, tu'ntzun ja'lu qe kyk'u'j, toj kynab'l qa matxitoq kub'kyi'j kyu'n, kse'n toj tnejel q'oj;
40o'kx tjaw sib' toju' nintnam, tetzunj kyanjtz ka'yinju' tyajajil B'enjamin kyi'jxi', nxi'x jaw tqan taq' q'aq', ex majxtoq in japun t-sb'elu' nintnam twitz kya'j.
41Anjtzun jumajtlkyi'ju' aj Israel q'ojil kyi'j, aye'tzu'n tyajajil B'enjamin e'kub'numj tej kyka'yinte qa matxitoq tzaj tilj kyib'aj.
42E'kub' oqtzuntz kywitzu' aj Israel toju' b'e nxi' toj chq'ajlaj, mixtzunti' b'ent kyoq, qu'n e'mqet kyu'nju' eb'je'tz toj nintnam ex majxtoq nche kub' kyb'yo'n.
43B'aj kytxoli'n kyib'u' aj Israel kyi'ju' tyajajil B'enjamin, exilpe kyi'j ex e'kub' kyb'yo'n txi'x Menua ex ponx toj tjawetzq'ij te Wib'ea.
44Iktzu'n ekyima' kab'mutx' jo'k'al (18,000) xjal te q'oj tyajajil B'enjamin.
45Aye'tzu'n txqantl anjtzkyi'j ex eb'ajx oq toj chq'ajlaj, tu'me'lju' pik Rimon, ex kab'lajk'al lajnaq (5,000) e'kyim kyoj b'e. Exilpe aj Israel kyi'j, ex eb'aj kytoqi'n, e'kub' kyb'yo'n jo'k'al (2,000) ichan.
46E'kyim oxmutx' kab'k'al lajnaq (25,000) xjal te q'oj kuwxi'x che q'ojin kyxol tyajajil B'enjamin toju' q'ij lu.
47Ate'tzun junk'al lajnaqtl (600) tyajajil B'enjamin anjtzkyi'j ex eb'ajx oq toj chq'ajlaj, ex e'kyajten kyaje' xjaw toju' pik Rimon.
48E'oktzaqpaju' aj Israel q'ojil kyi'ju' txqantl tyajajil B'enjamin ex eb'ajkub' kyb'yo'nju' ichan tu'n qesb'il tojile junjun nimaqtnam, eb'aj kub' kyb'yo'n alu'mj ex tkyaqilju' b'je'l yal kyu'n toj kyb'e, ex b'jo'k kyq'o'n kyq'aq'alju' nimaqtnam.
Who We AreWhat We EelieveWhat We Do
2025 by iamachristian.org,Inc All rights reserved.
