1Kyb'intzju'ye' nyole', aj Israel;
kb'intzpeju'ye' b'itz b'isb'ajilx kxe'l nb'itzane' kyeye':
2Matxi' kub' tz'aq Israel, aju' tb'anilxi'x ex b'ajx kub' ttxa'jina'tib';
matxi' kub' tz'aq ex lay b'ent tjawe'tl.
Matxi' kub' tz'aq tojxju' ttx'otx',
ex mix-a'lo' jun kjawil wab'ante.
3Chi Qman Dyos ntma'n kye aj Israel kjalu:
Qama che'x chq'o'n kab'k'al lajnaq (1,000) xjal toj q'oj tu'n jun nintnam,
naq jo'naqtl k'anjelkyi'j itz'qe';
qatzun mache'x chq'o'n jo'naq (100) tu'n jun nintnam,
naq lajojtl k'anjetz kyi'j.
4Chi Qman Dyos ntma'n kye Israel kjalu:
Chin kyjyome', ex che anq'ile'.
5Lalun che'xe' jyolte B'etel,
lay che'xe' Kilkal
ex lay che ik'e' B'erseb'a,
qu'n che kxe'l q'i'nkye' xjal te Kilkal toj junxi'tl tnam,
atzunte B'etel kb'el xitu'n.
6Kuktzaje' tk'etz Qman Dyos, ex che anq'ile';
qatzun min ktzajel tq'o'n q'aq' tib'aju' kawb'il te Israel,
ex mix-a'lo' jun kb'entel tyupinte toj B'etel.
7¡Qab'anx kywitze', aye'ye' nok kyq'o'ne' tnik'alilti'jte k'a
ex makub' kyxonju'ye' kyoklene' twitz tx'otx'!
8-9A Qman Dyos b'inchankye che'w wotz exju' q'i'nb'il,
tu'nte noka' qonik'an te q'ijtl,
ex tu'nte noka' q'ijtl te qonik'an qloljxi'x;
nche tzaj ttxko'n a' toj ninnjab',
ex ntzaj tchto'ntzuntz twitz tx'otx';
ate ntzaj q'onte xitb'il tib'aju' kuw,
ex ntzaj tq'o'n tib'a'ju' kuwsa'n.
A tb'iju' Qman Dyos.
10¡Qab'anx kwitze', aye'ye' nche' q'ojine' kyi'ju' kyajb'il tu'n kb'inchante tnik'alilti'j,
ex inxi'x nelkyik'u'nye' t-stiyil tnik'alti'j!
11Qu'n nkub' kyaju'nju'ye' prow
ex nelkyiq'i'ne' chojb'il ti'ju' ttriy,
lay che najankye' kyoju' ja ab'j matxi' jaw kb'incha'ne',
ex lay che k'wane' ti'ju' ta'l ub'a matxi' b'aj kyawa'ne'.
12Wojtzqi'nwe' txqan kb'inchb'ene' myab'a'n
exju' txqan il nkb'incha'ne':
nkub' kyjtz'o'nju'ye' xjal tnik'alti'j, ex nkyk'mo'ne' pwaq ti'j myab'a'n,
ex nkjyo'ne' tu'me'l tu'n lalun txi' oksla'nju' prow twitz ajkawil.
13Qu'mtzun alkyete ati tnab'l mixti' nyolin,
qu'n myab'a'nju' tq'ijlalil.
14Kjyomiye' b'a'n ex myaju' taq'wix, oktzun che anq'iltze';
kq'ancha'lixeltzuntz qa axju' nkma'ne':
qa ati Qman Dyos kyuk'ile', aju' Dyos nimtipumal.
15¡Kyik'umile' myab'a'n! ¡Kyk'u'jlame' b'a'n!
Kq'onk tilile' tu'n tb'inchetju' tnik'alilti'j kyoju' kawb'il;
qape'tzunlo ktzajel q'aq'an tk'u'j Qman Dyos nimtipumal kyi'ju' aj Israel ẍeb'aj kyej anq'in.
16Chi Qman Dyos, aju' Dyos nimtipumal, kjalu:
Kche oq'el xjal kyoj kykyaqilju' plas,
ex kche ẍch'il xjal kyoj kykyaqil b'e.
Che tzajel kytxko'n xjal nche aq'unan toj kojb'il tu'n kyb'isun kyuk'i'l,
ex che tzajel ktxko'nju' xjal ax kyaq'unju' tu'n kxi' oq'el kyi'j kyimni.
17Che oq'el kyoj kykyaqil tqan awal ub'a
ajwule' tz'e'ysal kwitz.
Iku' ntma'n Qman Dyos.
18¡Qab'anx kwitzju' kyajb'il tu'n klonte q'ij ajtulju' Qman Dyos!
¿Ma b'i'ntzun kyu'ne' ti' kb'ajel kyi'je' toju' q'ij lu?
Jun q'ijte' te qlolj, ex mya te spik'un.
19Iknate' kse'n qama qokub' oq twitz jun b'alun
o'kx ajqok takpujtl twitz jun oso,
mujqa kse'n qama qo' okx tuja,
ex ajtpon qq'ob' twitz ttapi,
nqo' oktx'a'n tu'n jun kan.
20Axxi'x, ate' q'ij ajtul Qman Dyos qloljte', ex mya spik'un.
qxopin b'a'nxi'x, ex mixti' ch'i'n spik'un.
21Nche elwik'u'nju'ye' ninq'ij nkub' kyik'sa'ne';
ex nche elwik'injuye' b'uyjtib'il nim toklen nkb'incha'ne'.
22Minti' wajb'iltlwe' chojb'il k'ok'sb'il nkub' kq'o'ne' te ninb'ilweye',
expe'ju' oyaj k'ok'e' kytwitz awal;
ex lay che nk'amju'ye' q'u's tman wakx nkub' kq'o'ne' te chojb'il te mujb'ab'ltib'il.
23¡Lalun che b'itzantle' nwitze'!
¡Mixti' wajb'iltle' tu'n txi' nb'i'ne' tq'ojq'ojel kychinab'e'!
24Awe' wajb'il tu'n tqojli tnik'alilti'j kse'n a',
ex tu'n kb'ete' tojxi'x ttxolilti'j kse'n a' min b'aj.
25Aj Israel, ¿Ma kub'tzun kyq'o'ne' chojb'il ex oyaj nwitze' kyoju' kab'naq (40) ab'q'i toj chq'ajlaj?
26Atzu'n ja'lo, kjawil kyiqa'n tilb'ilal kynimaqkawile' Sikut, exju' tilb'ilal che'w Kyiyun, aye'ju' dyos e'kub' kb'incha'ne'.
27Kche elix nxla'ja'ne' toj chq'ajlaj, tzmax ti'jxi' Damask. Chi Qman Dyos, a tb'iju': Dyos nimtipumal.
Who We AreWhat We EelieveWhat We Do
2025 by iamachristian.org,Inc All rights reserved.
