Est 2 - Mam Ostuncalco Bible

Sk'o'njtzu' Ster te t-xu'jil nimaqkawil

1Yajxi'tzuntel, tkub'lenxi' tk'u'ju' nimaqkawil Aswer, ulu' B'asti toj tk'u'j, jni'xu' tb'incha, exu' chaq'b'il matxi'toq b'je'x q'met ti'j.

2Xi'tzun kyma'nju' nche kawin tuk'i'l toju' tkawb'il te:

—In nojqelan tu'n kyjyet txin na'mx txi' tzyu'nkyi'j kyu'n ichan ex tb'anilqe' teya nimaqkawil.

3Nimaqkawil, q'onqe'ka xjal kyojile kykyaqilju' tnej tx'otx' ja nkawina'ya, ex oqxeninxa kye tu'n kytzaj kyiq'i'n toju' tja kawb'il kye qya ati toj nintnam Susa, ex tu'n kyxi' tka'yi'n Ekay, ju' ichan q'uqlixi'x tk'u'ja nimaqkawil ti'j ex xq'uqil kyi'ju' qya. Ex tu'n kyb'jo'k tq'o'n Ekay toj jun b'inchab'l tu'n kyjb'e'l tb'anil txinqe',

4atzunju' txin ma'xi'x kub' toj twitza nimaqkawil, atzun tu'n tokq'etju' toj toklen te t-xu'jila te t-xel B'asti, chechij te nimaqkawil.

B'a'n ela'ju' nab'l lu toj twitzju' nimaqkawil, ex b'inchet iku'.

5Najlitoq jun aj Juda toju' nintnam Susa, Mardokyey tb'i, tk'wal Jayir, kyyajajil Simi ex Kyis, kyxolju' tnej tyajajil B'enjamin.

6Atoq jun Kyis kyxolju' txqan eb'je'x tiq'i'n nimaqkawil Nab'ukodonosor aj B'ab'ilon toj Jerusalen junx tuk'i'l Jekoniy, nimaqkawil toj Juda.

7Atitoq jun tmyal ttzik mo titz'in tman Mardokyey, kyej meb'a kyu'n tma'n ex ttxu, oktq'o'n naku'j tmyal tej kykyimju' tman. Adasa tb'i mujqa Ster, majxtoq tb'nailxi'xju' txin lu.

8Tetzunj tb'je'x tqanilju' chaq'b'il tu'n nimaqkawil ex nim txqan txin eb'aj b'u'yi'n toju' tja nimaqkawb'il toju' nintnam Susa ex e'kyaj q'o'n te Ekay xq'uqilkye qya tu'n kyxitka'yi'n, atitoqu' Ster kyxol.

9B'a'nxi'x e'la'ju' txin lu tojtwiz Ekay ex kyexi'x tilwi tu'n, qu'mtzun okq'o'n tu'n Ekay toj b'inchb'il tu'n tel tb'anilxi'x ka'yin ex tb'anil wab'ju' twa xitq'o'n; eb'jo'ktq'o'n wuq txin tb'anil ajb'elqe' toju' tja nimaqkawb'il te ajb'el te, xitq'o'ntzuntz kyuk'i'lxi' wuq txin lu kyoju' tb'anil ja toj tja nimaqkawb'il kye qya.

10Mixti'xte Ster xitma'n alkyeqe' toj kyja ex tyajil, qu'n ojetoq txitma'n Mardokyey te tu'n lalun txitma'n.

11Intoqtzun b'et Mardokyey atl junjun q'ij tpenju' tja kawb'il kye qya, tu'ntoq tb'inte qa b'a'n ta' Ster, ex se'ntoq tilwi.

12Kykyaqilxju' txin eb'aj b'u'yi'n, eb'jo'k jun ab'q'i toj b'inchb'il tu'n kyel tb'anilqe'. Intoq b'aj sunju' kyxmilal toj taseytil mir toju' tnejel qaq xjaw, atzu'n toju' qaq xjawtl tu'n k'ok'sb'il ex krema najb'en kyu'n qya. Tetzunj tb'aju' b'inchb'il kye, teyile junjunju' txin lu intoq che okx toj junjunali'n yek'ulkyib' te nimaqkawil Aswer,

13intoq xiq'o'n anb'il teyile junjun tu'n t-xitiq'i'n alkyexku' tajb'il toju' ja kye qya tu'n tpon tiq'i'n ajtokx toju' tja nimaqkawb'il.

14Intoq xi' toju' tja nimaqkawb'il te qoniky'an, ajtzun qsqix te juntl q'ij intoq xi' toj juntl ja kye qya, ju' ati toj tq'ob' Saaskas, ichan q'uqlixi'x tk'u'ju' nimaqkawil ti'j ex xq'uqilkye tqya nimaqkawil; tb'ajlenxi'tzun ja'lu mixti'tl npontl twitzju' nimaqkawil, naq o'kx qama kub' toj twitzu' nimaqkawil exqa matma tu'n ttzaj txko'n jumajtl.

15Tetzu'n tponju' q'ij tu'n txi' Ster, tmyal Ab'yayil ttzik mo titz'in tman Mardokyey, yek'ultib' teju' nimaqkawil, naq o'kxte xitiq'i'nju' b'ajx tma'n Ekay te, ju' ichan q'uqlixi'x tk'u'ju' nimaqkawil ti'j ex xq'uqilkye qya. Tu'ntzun ja'lu b'a'n ela' Ster toj kywitz kykyaqilju' eka'yinte.

16Pon iq'i'n Ster twitzju' nimaqkawil Aswer toju' tja te kawb'il, toju' tlajonji'n xjaw, axju' Teb'et, toj twuqi'n ab'q'i nkawin.

17Tetzujn tok tka'yi'n nimaqkawil Aswer, Oklaqj ti'ju' Ster, kub'xi'x toj twitz kyekyitzu' txqantl txin eb'jik' twitz, iktzu'n tkanb'aju' tk'u'jlalil nimaqkawil Aswer, xtalinjtzxi'xju' Ster tu'n kyekywitzu' txqantl txin e'ten tuk'i'l, jaxtq'o'n tkoron t-xu'jil nimaqkawil toj twi' ex oktq'o'n toklen te t-xu'jil nimaqkawil te t-xel B'asti.

18Kub'tzun tq'o'n jun ninwantz te ninb'ilte Ster, eb'aj tzaj ttxko'n kykyaqilju' nche kawin tuk'i'l exqe' nche onin toju' tkawb'i'l, kub' tq'o'n jun q'ij ojb'il kyoju' tnej tx'otx' tjaq' tkawb'il ex b'aj t-sipa'n txqan oyaj, kse'nxu' nkub' tq'o'n jun nimaqkawil.

Eltnik' Mardokyey ti'j kyxim jun k'loj xjal tu'n tkub' kyb'yo'n nimaqkawil

19Kyojtzu'n q'ij intoq che pon q'i'nju' txin toju' junjtl kyja qya, q'uqlitoq Mardokyey ttziju' tja nimaqkawb'il.

20B'ajxtoq txa'tma'n Ster alkyetoq tnamil ex alkyeqe'toq twitze'l, kse'nxu' ojetoq txitma'n Mardokyey te, intoq tb'incha'nju' b'ajxni tma'n Mardokyey te, kse'nx atitoq tk'etz.

21Tej q'uqlitoq Mardokyey ttziju' tja nimaqkawb'il, xitb'i'n intoq che yolin B'iwtan tuk'i'l Teres, kab'e' tmajin kawb'il kyxolju' xq'uqil ttziju' tja nimaqkawb'il. Inxi'xtoq che tx'u'jin, intoq kyxima'n tu'n tkub' kyb'yo'n nimaqkawil Aswer.

22Tetzunj tb'inte Mardokyey kyximju' xjal lu, xitma'n te Ster t-xu'jil nimaqkawil, ex xitma'n Ster te nimaqkawil aju' xitma'n Mardokyey te.

23Jyonjtztzun tqaniltz, tetzunj tel yal qa ax, jawjtz'o'n kyqulju' kab'e' tmajin kawb'il lu. Tchaq'tzun nimakawil tu'n tkub' tz'ib'a'nju' b'aj lu twitzku' toju' tu'jil tqanil nkyaj tz'ib'a'n ti'ju' tnam.