Rt 2 - Mam Ostuncalco Bible

Sakwin Rut toj ttx'otx' B'oos

1Atitoqtzun jun twitze'l Elimelek tchmil Noemi B'oos tb'i, nimaq q'inun ex nim toklen kyxol xjal.

2Jun q'ij xitma'n Rut te Noemi:

—Q'ontza anb'il weye' tu'n nxi'ye' sk'ol spiy, qaj mataj jun majen tu'n woklpeye' ti'j, chij.

—B'a'natzun wal, chi Noemi te.

3Xi'tzun Rut sakwilteju' t-spiyil seb'ad, ju' intoq kyej tz'aq kyu'nju' majin toj kojb'il. Wichaqa tojpelo ttx'otx' B'oos twitze'l qtzan Elimelek.

4O'kx tpon B'oos tzajnitoq B'elen ex eb'ajx tq'olb'e'n tmajin:

—¡Awt Qman Dyos ten kyuk'i'le'!, chij kye.

—¡Ex ikxta awt Qman Dyos ky'iwlanteya!, chechiju' tmajin te.

5Ex xitqani'n B'oos te kynejel majen:

—¿Alkyetzu'n txin lu?, chij.

6Xi'tzu'n ttzaq'we'n kynejel majen te:

—Aj Moab'te', matzaj tk'le'n Noemi.

7Matzaj tqani'n weye' tu'n toklpe kyi'ju' majen sakwil spiy, ex matxi' b'aj nik'jan q'ij tu'n naq'unan, ex tzma ja'lo sojlan ch'i'n, chij.

8Xi'tzun tma'n B'oos te Rut:

—B'intzpe'ya noy, lalun txi'ya sakwil toj juntl kojb'il. Kutkyeja tza'lu kyuk'i'lju' nmajine' qya,

9lpexa kyi'j, ja matxa' tka'yina'ya nche aq'unanju' majen. Matxi' txinma'ne' kye tu'n lalun che iplaj ti'ja. Qama tzaj k'waj ti'ja, qomil tk'wa'ya a' kyoju' ẍoq' nche jawtz kynojsa'n majin, chij te.

10Atzunte Rut kub' meje majx kub'joqe twitz tx'otx' te ninb'il, ex xitma'n te B'oos:

—¿Se'n taq'witzun saj q'aq'an tk'u'ja wi'je' ex majx b'a'na weye', extzun najchaq xjal qine'?, chij.

11Xitzun ttzaq'we'n B'oos te:

—B'i'nxi'x wu'ne' tkyaqilju' b'a'n matxi' tb'inchaya te tlib'a atxi'x tej tkyimu' tchmila, ex makyej tq'o'na tmana ex ttxuya ex ttanama noqx tu'n tula najal qxole', ju' junxi'tl xjalqo'ye' teya.

12¡Awt Qman Dyos txiq'onte tu'me'l t-xel teya! ¡Awt Qman Dyos, ja soka' qe tk'u'ja tu'n tkleta, txiq'onte tu'me'l t-xel teya tu'n tkyaqilju' matxi' tb'inchaya!, chij te.

13Xitzun ttzaq'we'n Rut te:

—Chjonte teya, mayolina weye' tuk'i'l tk'ujlalil, majx nqe nk'u'je' kyu'nju' tyola. Tu'npetzu'n mixti'we' woklen kse'n jun tmajina qya, chij te.

14Tetzunj tpon kmuj tu'n kyxi' wal, tzaj ttxko'n B'oos Rut ex xitma'n te:

—Kutzaja, tzyum jun piẍ twaya ex t'inunku'xa toju' ta'l b'inayr lu, chij te.

Atzunte Rut kub' qe junx kyuk'i'lju' majin, ex xitq'o'n B'oos wensi'n triy te twa. Wan Rut tzmax tnoj b'a'nxi'x, expe' atix min b'aj tu'n.

15Tetzunj t-xi' junmajtl Rut sakwil triy, xitma'n B'oos kyeju' tmajen:

—Ex kyq'onx anb'ile' te tu'n t-sakwin kyxolu' triy ch'umi'ntl. Lalun txi' kymyo'ne'.

16Expe' kyxonkj junjun spiye' ti'ju' kymanoje, tu'n tjaw t-sk'o'n. ¡Lalun txi' kyeku'ne'!, chij kye.

17Sakwin Rut toj ttx'otx' B'oos tzmax tok qale. Tetzunj tel tb'ju'nju' sakwet tu'n, kab'naq jwe' (45) lib'r b'ent tu'n.

18Anjtzun ti'jtz toj nintnam tuk'i'lu' triy, ex xityek'u'n teju' tlib'.

Ex jatztiq'i'n twa minb'aj ex xitq'o'n te Noemi.

19Xi'tzun tqani'n Noemi te:

—¿Ja saq'unana'ya ja'lo, ex ja tx'anja'ya sakwilte txqan tryiy lu? ky'iwlanjtzxwitju' xjal sonin ti'ja tu'n ja'lu, chij.

Xi'tzun tma'n Rut teju' tlib' ja sakwina'.

—Toj ttx'otx' jun ichan B'oos tb'i ẍin sakwina'ye' ja'lo, chij te.

20Xi'tzun tma'n Noemi te:

—¡Awt Qman Dyos ky'iwlanteju' ichan lu! Matxi' tz'okte Qman Dyos b'a'n qe ja'lo, kse'n tb'incha ojtxi' kye qtzan qchmil. Atixte' qoklen tuki'lju' wnaq lu, qu'mtzun atix tu'n qxi'tka'yi'n, chij te.

21Ex xitma'tl Rut:

—Expe' matzaj tma'n weye' tu'n nkyajtene' aq'unal kyuk'i'lju' tmajen tzmax ajtjaw b'aju' twitz awal, chij.

22Xi'tzun ttzaq'we'n Noemi teju' tlib':

—B'a'n toj nwitze' wal, tu'n tkyaj tena' kyuk'i'lju' tmajin ex lalun txi'ya toj juntl kojb'il, tu'ntzun mixti' kub' tk'ulb'a'na, chij.

23Axtzuntzu' sakwina' Rut triy kyxolju' tmajin B'oos tzmax tjaw b'aju' seb'ad ex triy. Ex axtoqtzu' najla' tuk'i'lju' tlib'.