Pr 25 - Mam Ostuncalco Bible

Tkab' tnej yol q'ma'n tu'n Salomon

1Ati jte'tl q'unb'en tu'nx Salomon, tz'ib'a'nqe' kyu'n ajb'el te Esekyiy, nimaqkawil aj Juda:

2Injaw nimet Qman Dyos tu'nju' e'wa'n tu'n,

aye'tzu'n nimaqkawil tu'nju' noktilil kyu'n tu'n tchik'e jun ti'xti'.

3Ale'xju' twitz kya'j,

ex toj tk'u'j tx'otx',

ex ikxju' kyxim nimaqkawil.

layx che kane toj qwitz.

4Qama b'je'l ttz'ililju' saqpwaq,

kb'antel jun tb'anil ti'xti' tu'n aq'unal ti'j saqpwaq;

5Qama tz'el iq'etju' b'inchal myab'a'n toju' ajb'eb'l te nimaqkawil,

kb'antel jun kawb'il tnik'alti'j.

6Lalun tnima tib'a twitzju' nimaqkawil,

ex lalun kub' qeya toj kyq'a'jtzu' xjal nim kyoklen;

7Ate' b'a'nju' qama jawx txko'na tu'n,

kyetwitz tu'n txiq'ma'n teya tu'n txitq'o'na tq'uqb'ila te juntl nimaqxi'x toklen.

Qama tila jun ti'xti' kyu'nku' twitza.

8lalun txi'naja q'malte lwiyxi'x twitz kawb'il,

qu'n jaku' pon juntl tziyal chik'b'alte se'nxi'x tu'me'l

jaku'tzun naq jawka'ylajtla.

9Yolina tuk'ilju' xjal ati jun myab'a'n kyxole' tuk'i'l, tu'n lalun txi' toj nim,

ex lalun txi' tyoli'na nxitjask'u'n juntl teya;

10qu'n kb'injtzela kyu'n kykyaqil xjal,

qa layx b'ent tewanteya jun ti'xti' ex k'elel ik'o'na tejumajx.

11Jun yol tojxi'x tu'me'l toju' kmuj ja nojqelana',

nok kse'n mansan q'anpwaq, saqpwaq ka'yin.

12Ikyte tzak'b'ilju' kse'n u'wj q'anpwaqxi'x,

teju' xjal b'a'n tk'monte.

13Aju' b'a'n sanjelal

nok kse'n jun chewsb'il ti'j qanmi toj q'ijal,

majx ntzalaju' tajaw ti'j.

14Aju' xjal in tla'ji'n tib' qa noyin extzun naqxtak'u'n,

ikxi'xu' kse'n txqan muj ajttzaj tenenen mixti'xte' jb'al.

15Qati qpasensi nkub'ti'j jun kawb'il qu'n;

exju' yol toj ttxolilti'j, chab'ax nkub' qk'u'j tu'n.

16Qama tz'okyal ta'lkab' tu'na, lalun tz'ok k'e'ya ti'j,

qu'n jaku' xab'tla tu'n.

17lalun txi'ya q'achq'al tja tamiwa,

jaku' sikti ex k'elel ik'una tu'n.

18Aju' nchan yol ti'ju' tamiw,

¡majx nk'ixb'san kse'n jun mans, qesb'il ex kse'n jun smaj ch'ut twi'!

19Tu'n tqe qk'u'j ti'j jun xjal ẍmu toj tq'ijlalil yajb'il,

ikju' kse'n nqo' b'et toqjni qqan

mujqa kse'n nch'yon jun qwitzte.

20Myab'a'n tu'n tkub' tal chnab' te jun xjal nb'isun

ikju' kse'n ta'l atz'an nok twitz k'ixb'ni

mujqa kse'n qama qokub' ẍb'iqe toj tq'ijlalil txun che'w.

21Qa nq'aq'an tajq'oja, q'onxa twa;

exqa nk'wajti, q'onxa tk'wa';

22qu'n qama tb'inchaya ikju', kb'el kyeqax tu'n tch'ixaw twitza,

atzunte' Dyos kq'olte tu'me'l t-xel teya.

23Qa ntzaj kyq'iq' toj qnayaj ntzaj jb'al,

ex tu'nju' jk'ujyolil ntzaj qtx'u'jil.

24B'a'npete' tu'n qnajan toj jun ja xoq'l t-xe,

kyetwitz tu'n qnajan toj jun nin ja tb'anilxi'x tuk'i'l jun qya txinwi'.

25Iky nela' jun b'a'n tqanilju' kyi'j najchaq tx'otx'

kse'n tb'anil che'wa' qa nqo k'wajti.

26Qa njawje jun tnik'alti'j twitz jun xjal b'inchal myab'a'n

iky noka' kse'n t-xiklil a' xoq'l twitz ex tz'il.

27Myab'a'n qa nb'aj txqan ta'lkab' qu'n,

ate tu'me'lju' qa ch'uẍ nkub'a' ti'j jun ti'xti' qu'n.

28Ikyte xjalju' min nb'ent tjk'unte tib',

kse'n jun nintnam mixti' nintapi ti'jile.