Ez 8 - Mam Ostuncalco Bible

Yek'b'ilkye ti'xti' taq'wixi'x ntoq che b'inchanjtz toj Jerusalen

1Toj tjwe'yi'n q'ij te tqaqi'n xjaw teju' tqaqi'n ab'q'i, q'uqli qintoqe' toj njaye' kyuk'i'lju' tijwnaq aj Juda. Naq minab'enx kub' tq'o'n Qman Dyos tq'ob' toj nwi'ye',

2ex wile' jun naku'j jun ichan. Wile' naku'j q'aq'ju' tzajx jata' tk'elb'il ku'ponx kub'l, ex atlju' tzajx tk'etz tk'alb'il tojawl nqoptz'aj naku'j k'uxb'il.

3Tzaj tnuqpi'n ichanju' naku'j jun q'ob'aj ex kuttzyu'n t-xya'mal nwi'ye'. Njawtzun q'i'ntze' tu'n tipumal Qman Dyos toj kyq'iq', nxi'tzun tiq'i'ntze' Jerusalen naku'j toj witzik' b'incha'n tu'n Dyos ex nkub' tq'o'ne' toju' qokyex tojxi' nintnam, tu'me'l tb'a'nq'ob'kya'j, jata' witzleb' nokq'onte ttx'u'jil Qman Dyos.

4Atzuntzu' ta' tajwalil Qman Dyos janche ajb'ena' aj Israel, kse'nxu' ojetoq wile' toj witzik' toj plan tx'otx'.

5Ex tzaj tma'n weye': ka'yinxa toj tb'a'nq'ob'kya'j, chij.

Nxi'tzun ka'yine' toj tb'a'nq'ob'kya'j ex wile' witzleb' nq'onte ttx'u'jil Qman Dyos atitoq toju' qokyex janqo okxa' tk'etz q'olb'eb'l.

6Tzaj tma'ntzuntz weye': ¿Matila taq'wixqe'xi'x nche kyb'incha'n aj Israel, tu'ntzun tpaj ja'lu nchin ex kyxla'ja'ne' toju' njaye' xjan? kpena' ktka'yi'ya txqantl ti'xti' taq'wixqe'xi'x, chij.

7Inxi'tzun tiq'i'ntze' toju' qokyex twi' pe'n. Q'ancha'l jun xopa'j toju' nintapi.

8Tzaj tma'ntzuntz weye': Nimsanxa xopa'j toju' tapi, chij.

Xi'nnimsa'ne' xopa'j ex knet jun qokyex wu'ne'.

9Tzaj tma'ntzuntz weye'. Kutokxa ex che ktka'yi'ya ti'xti' taq'wixi'x nche kyb'incha'n atzu', chij.

10In okxe' ex wile' toj tkyaqilju' tnuqub' nintapi, b'incha'nk chukchaq kyilb'ilal txkup nche qitinje' ex txqantl txkup tz'ilqe' ti'j, ex tkyaqil chukchaq kywitzleb' aj Israel.

11Oxnaq lajoj (70) tijwnaq aj Israel, atitoq Jaasaniy tk'wal Sapan kyxol, intoq che k'ulun kye witzleb' lu. Teyile junjun q'i'n jun txq'aq'b'il, intoq jawtz b'uqchaj t-sb'el sturak naku'j muj toj.

12Tzajtzun tma'n weye': ¿Ma ntka'yi'na nkyb'incha'n tijwnaq aj Israel toj ewaj, teyile junjun ate'kx toju' tja twitzileb'? Toj kynab'l qa min nchin ka'yine' kye, exqa matxi' kyajntzaqpi'ne' kytanam, chij.

13Ex tzaj tma'ntl: Kpena' che tka'yi'ya nkyb'incha'n txqantl ti'xti' taq'wixi'xtl, chij.

14Inxitiq'intzuntze' ttzi tja Qman Dyos, ju' ati toj tb'a'nq'ob'kya'j. Ate'toq junjun qya q'uqliqe', nche oq' twitzju' dyos Tamus.

15Tzaj tma'ntzuntz weye': ¿Ma tilju'ya lu? Kpena' tka'ya txqantl ti'xti' taq'wixxi'x, chij.

16Inxitiq'i'ntzuntze' toj tpen tja Dyos ex wile' toju' qokyex toju' ja xjan, t-xolju' ttzija tuk'u'lju' q'olb'eb'l, ate'toqlo junaqjo' (25) ichan xinikyq'o'n kytze'lkyi'j tu'me'l ja xjan mejliqe'x tu'me'l tjawetzq'ij kupomni kyplaj twitz tx'otx', nche k'ulun te q'ij.

17Tzajtzun tma'n Qman Dyos weye':

¿Ka'nxtzuna la? ¡Ma min nqe tk'u'ju' tnam Juda tu'nju' ntb'incha'n ti'xti' lu taq'wixqexi'x tzalu, expe' matxi' chmet b'yojxjali'n kyu'n toju' tx'otx' lu! Kukx tok kyq'o'n ntx'u'jilju'ye', ex matxi' japun kyab'il toj ntxa'ne' kyu'n.

18Chin ultzunwe' tuk'i'l ntx'u'jile' kyi'j. Layx tzaj laqj nk'u'je' kyi'j. B'a'nqa mache ẍch'in tu'n kytxokon wi'je', layx che tzaj nb'i'ne', chi Dyos.