Jue 2 - Mam Ostuncalco Bible

Ponju' tanjl Qman Dyos B'okyim

1Etzju' tanjl Qman Dyos Wilwal ex pon B'okyim, tzaj tma'n kye aj Israel kjalu: Ayine' inetz q'inkyeye' Ejipt, ex mache tzaj wiq'i'ne' toju' tx'otx' lu xintziya'ne' kyeju' ojtxi' kychmane' tej t-xinma'ne' kye: Lalun kub' nxitu'nwe' nyol kyej b'antti'j kyuk'i'le',

2lantzun kyej b'antti'j jun kyyole' kyuk'i'lju' xjal najliqe' toju' tx'otx' lu, che kyxitunqeku'ye' kyq'olb'eb'l, nchije' kye. Aye'tzunkye' minti' xikyb'i'ne', ¡Axi'xtzun xkyb'inchaju'ye' lu!

3Qu'mtzun kxe'l nma'ne' kyeye' ja'lo: Lalun che ex nq'o'ne' tnam lu kywitze', kche okyel te xpatxab' kyeye' kyuk'i'lju' kydyos, chiju' tanjl Dyos.

4Tetzunj tb'aj yolinju' tanjl Qman Dyos, kykyaqil aj Israel e'aq'wi oq'el b'a'nxi'x.

5Qu'mtzun okkyq'o'n tb'iju' najb'il lu B'okyim, ex kub' kyq'o'n chojb'il twitz Qman Dyos atzu'.

Kyim Joswe(Jos 24.29-31)

6Tej kykyaj tq'olb'e'n Joswe aj Israel, teyile junjun xi' tzyulteju' ttx'otx' ojetoq txiq'o'n kye.

7Intoq che k'ulun aj Israel te Qman Dyos tej itz'xtoq Joswe; ex ikxtej i'tz'qe'xtoqju' tijwnaq e'kyajten tkyimlenxi' Joswe, ju' ojetoq che kyilju' nimaq ti'xti' tb'incha Qman Dyos kye aj Israel.

8Tetzunj tkyim Joswe, tetoq jo'naq lajoj (110) ab'q'i.

9Ku'x mqu'ntzuntz tojxju' ttx'otx' toj Timnat-sera, ju' ati toj tb'anq'ob'ju' witz Gaas, kywi' witz te Eprayin.

10Ex e'kyim kykyaqilju' aj Israel e'ten junx tuk'i'l Joswe. Aye'tzunju' e'itz'ji yajxi'tl mixtoqti' b'i'n kyu'n ti'j Qman Dyos ex kyi'ju' taq'unb'en b'a'n tb'incha kye aj Israel.

Kyej kykolb'e'n aj Israel Qman Dyos

11Taq'wixtzun ela' kyb'inchb'en aj Israel toj twitz Qman Dyos, qu'n e'aq'wi k'ulul kyeju' chukchaq tilb'ilal B'aal.

12Kyej kykolb'e'n Qman Dyos etzq'inkye ojtxi' kyyajilb'en Ejipt ex okten kywitz tu'n kyk'ulun kyeju' kydyos xjal najlqe'toq kyi'jile, tu'ntzu'n lu okkyq'o'n ttx'u'jil Qman Dyos.

13Kyej kyq'o'n Qman Dyos naqx tu'n kyk'ulun te B'aal ex kyeju' chukchaq tilb'ilal Astarte,

14tu'ntzun tpaju' lu tzaj ttx'u'jil Qman Dyos kyi'ju' aj Israel ex taj tu'n t-xi' elq'an tkyaqilju' ati kye kyu'n eleq', ex taj tu'n tkub'kyi'j kyu'nju' kyajq'oj najliqe' kyi'jile ex mixti' b'ent kywe' kywitz.

15Atltoq junjun maj ajkyxi' toj q'oj, in ok Qman Dyos ajq'oj kyi'j ex min nche kanb'an kse'nxju' ojetoq txi' q'ma'n kye.

Maskyepetzun ojetoq che kub' tq'o'n Qman Dyos aj Israel toj tch'uẍal,

16e'jaw t-sk'o'n nejenel kyxol te klol kye toj kyq'ob'ju' intoq che elq'an kyi'j.

17Aye'tzu'n aj Israel min e'okslan kyeju' nejenel lu, kyej kyq'o'n Qman Dyos ex ek'ulun kye junxi'tl dyos. Xikynima'n kyyajilb'en tchaq'b'il Qman Dyos; aye'tzunkye min exilpe ti'ju' b'a'n yek'b'il kyu'n kyyajilb'en.

18Atl junjun maj ajtjaw t-sk'o'n Qman Dyos jun nejenel kyxol, in onin ti'j, ex intoq che tklo'n aj Israel toj kyq'ob'ju' kyajq'oj toj tq'ijlalilju' nejenel kyxol, qu'n intoq tzaj laqj tk'u'j kyi'j ajtka'yinte inche oq' toju' yajb'ilkye.

19Ajtoqtzun tkyimju' nejenel, nche eltxalpuj junmajtl, majx taq'wixi'xtlju' kyb'inchb'aj kyekywitzju' kyman, intoq che k'ulun ex inche ajb'en kye junxi'tl dyos. Mixtoqti' in kyej kytzaqpi'nju' kychwinqlal taq'wix ex kypi'sal.

20Qu'mtzun tzaj ttx'u'jil Qman Dyos kyi'j aj Israel, ex tma kjalu: Aye'kye' xjal lu matxi' kub' kysaqchb'e'nju' nyole' kyej b'entti'j kyuk'i'lju' ojtxi' kychman, ex min kyajb'il tu'n kyniman weye'.

21Qu'mtzun, lay che exwiq'i'ne' tnam kywitz, aye' min e'ex tu'n Joswe tej na'mxtoq tkyim, chi Dyos.

22Tu'ntzun ja'lu tajb'iltoq Qman Dyos tu'n tka'yinte qatoq che kxe'l lpe aj Israel toj tb'eyil Qman Dyos, kse'nqe' ojtxi' kyyajilb'en mujqa lay.

23Qu'mtzun min e' exnaj tiq'i'n Qman Dyos tnam lu, ju' na'mxtoq kyxitq'o'n toj tq'ob' Joswe, ape' tb'inchaju' taq' anb'il tu'n kykyajten axtzu'.