Is 10 - Mam Ostuncalco Bible

1¡Qab'anx kywitze', nkub' kyq'o'ne kawb'il mya tnik'alti'j

ex nb'aje'x kyq'o'ne' tpakb'al chaq'b'il kuw.

2Min nkyb'incha'ne' tnik'alilti'j kye prow

ex min nxikyka'yi'ne' kyoklen prow toj ntaname',

nb'je'l kyiq'i'ne' ti'xti' kye qya kyimni kychmil

ex nche elq'ane' kyi'ju' meb'a!.

3¿Ti'tzu'n kyb'incha'ye' ajkyoke' toj xjel

ajkyka'yinteye' xi' ttzaju' tz'e'ysb'il witzb'aj najchaq?

¿Alqe kxela' kyqani'n o'nb'ile'?

¿Ja kjela' kyq'o'ne' kyq'inumale'?

4Qa min ẍekub' me'ssa'ne' ex min ẍe'x q'i'ne' toj kars,

che kyimele' kyuk'i'lju' nche kub' b'yo'n.

Na'mxtzun tqjen ttx'u'jil Qman Dyos

kukx t-xob'sanju'.

Che ajb'el aj Asirya tz'e'ysal witzb'aj tu'n Dyos,

5K'ajb'elju' nimaqkawil aj Asirya

te ntzeye' tu'n ntx'u'jile',

a njunb'ilju'ye' k'ajb'el ajttzaj nq'oje.

6nxinchq'o'ne q'ojil ti'j jun tnam min nokslan weye',

ti'j jun nimaqtnam nok tq'o'n ntx'u'jile',

tu'n tb'je'l telq'a'n tq'inumal,

tu'n kyb'aj twab'e'n kse'n xoq'l tojile b'e.

7Atzunte' nimaqkawil aj Asirya mya t-ximju',

ex mya tajb'ilju' tu'n tb'inchante.

O'kxte t-ximju' tu'n t-xitun

ex tu'n kyb'aj txqan nimaqtnam tu'n.

8A ntma'n ja'lu: kykyaqilju' nimaqkawil nejenelqe' tjaq' nkawb'ile'.

9Junileqekye' nimaqtnam Kalno ex Karkyemis wewe',

junqe'x Amat tuk'i'l Arpad,

ex Samarya tuk'i'l Damask.

10Matxi' chin q'ojine' kyuk'i'l nimaqtnam nim txqan kydyos,

nimxi'x txqan kywitzleb' kyekywitz aj Jerusalen ex aj Samarya.

11¿Ma laytzun b'ent nb'inchanteye' kyi'j aj Jerusalen ex kyi'ju' kywitzleb',

kse'n xnb'inchaye' kyi'j aj Samarya kyuk'i'lju' kydyos?, chij, chi Dyos.

12Ajtzun tb'ant tu'n Dyos tkyaqilju' tu'n tb'inchante

twi' Syon ex toj Jerusalen,

kb'el ttz'e'ysa'n twitzju' nimaqkawil aj Asirya

tu'nju' nxi'x tnima'ntib',

ex tu'n jamjoni'n tok ti'j.

13Intma'n nimaqkawil aj Asirya kjalu:

Tu'n wipumale' xb'enta' lu;

ati nnab'le', ex mab'aj nxima'ne'.

Mab'aj nch'exb'e'ne' kynaqachil nimaqtnam,

mab'je'l wiq'i'ne' kyq'inumal,

makub' kyi'ju' nimaqkawil wu'ne', tu'nju' kuwqine'.

14Matz'el wiq'i'ne' kyq'inumal tnam;

b'ajkub' ntzyu'ne' tkyaqilju' kytx'otx'

kse'n ajkyjatzq'i'n jos kyajni kolb'e'n toj jun tja pich',

mix-alo'xte' klipal,

mix-a'lo'xte klab'tel mo tu'n tjaw ch'eqj, chij.

15¿Ma nimxi'x toklen k'uxb'il

kyetwitzju' si'wil?,

¿ma nimxi'x toklenju' job'l tze kyetwitzju' jol tze?

¡kuxi'xtej aju' xtok ẍaqlulteju' xjal,

extzun naq jun tzexi'!

16Qu'mtzun, k'elel tiq'i'n Qman Dyos nimtipumal

kyipumalju' xjal kuwqe'xi'x,

ex ktb'incha' tu'n kyjaw q'aq'lix kyxmilal tu'n ttantonil kyeq.

17Aju' Qman Dyos xjan, spik'un toj Israel,

kjawil b'ent te tqan taq' q'aq',

jun q'ijx kb'ajela' ttz'e'ysa'n

tkyaqil ch'i'x ex k'ul toj tkyaqilju' tx'otx'.

18Majx che b'ajel t-xitu'n

tb'anil k'ul ex tb'anil awal.

Che kjel tq'o'n kse'n jun yab' mixti'tl tipumal.

19Naqjte'xtl tze che kjelten toj k'ul,

naqpe' jun k'wal kb'antel tajlante.

20Tojtzu'n tq'ijlalil lu

lay tz'okqetl kyk'u'ju' jte'tl che kjelten toj Israel,

exqe' mache klet kyxol tyajajil Jakob'

kyi'ju' ẍeb'yonkye

qu'n xi'kqeb'ela'tl kyk'u'j axxi'x

ti'ju' Qman Dyos Xjan toj Israel.

21Che b'ju'l lq'eju' jte'tl tyajajil Jakob'

tke'tzju' Dyos min q'ancha'l.

22B'a'nqa nim tajlalju' tnam Israel

kse'n tz'awun ttzi ninnjab',

naq jte'xtlte' k'anjetz kyi'j.

Matxi' b'entten tu'n tkub' xitet

ktz'e'ysetel kywitz tu'nx tpaj kyil.

23Qu'n oje kub' t-xima'n Qman Dyos nimtipumal

tu'n tb'aj xitet

ex ktb'incha' toj tkyaqilju' tx'otx'.

24Intma'n Qman Dyos nimtipumal kjalu:

Ntanam, najlqe'ye' Syon,

lalun che xob'e' kye aj Asirya,

b'a'nqa mache yajtiye' toj kykawb'il

ex majawkyi'n kytze kyi'je'

kse'n kyb'incha aj Ejipt.

25Qu'n naq jte'xq'ijtl

tzulju' tz'e'ysb'il kywitze',

ex che b'ajel nxitu'ne' tu'n ntx'u'jile'.

26Ayine' Dyos Manb'aj nimwipumale' chin tz'e'ysalte kywitze'

kse'n tej tkub'kyi'j aj Madyan

twi' pik Oreb',

oktzunkyla' aj Asirya wipumale'.

kse'n nb'inchaye' kyi'j aj Ejipt.

27Atzun q'iju' lu k'elel wiq'i'ne'

iqatz b'jawni kyq'o'n ttze'lkyi'je',

ex k'eltoqitju' iqb'il kub'ni kyq'o'n tikyqule', chi Dyos.

Ljo'nkypon aj Asirya

Luqe' ajq'oj che ul Rimon,

28che ul toju' tnam Ayat,

che ik'el Mikron,

kjel kyq'o'n kyiqatz Mikmas,

29Che ik'etz toju' a' b'o's t-xe,

ex che b'elten Keb'a;

majx che b'ajelxob' aj Rama,

ex che oqel aj Kib'ea ttanam Sawul.

30¡Che ẍch'ine', aj B'at-kalim!

¡Kyb'intze', aj Laysa!

¡Kytzaq'wentze', aj Anatot!

31che elex oq aj Madmena,

exqe' najlqe' Keb'im che ewal.

32Che b'elwe' ajq'oj ja'lo toj Nob';

kxelkyse'n kyq'ob' tu'n kyq'ojin ti'j Syon,

ttxa'nwitz jata' Jerusalen.

33Kyka'yinxe', che b'jawil tb'ultx'i'n Qman Dyos nimtipumal

nimaq tze tuk'i'l tipumal xob'ajilx;

che b'jawil toqju' nimaq kywe'.

che kb'el tz'aqu' te'qe'kx tzmax jawl twitz tx'otx'.

34Majx che b'eltjuma'n nimaq k'ul tu'n jun k'uxb'il,

ex che kb'elb'aju' tb'anil tze toj Lib'ano.