Pr 29 - Mam Ostuncalco Bible

1Minab'enx kb'ajelte' mib'a'n b'in kawb'il

ex layx b'ant tklet.

2Qa tnik'alkyi'ju' nche' kawin, tzalajb'ilte' kye tman

qatzun aye' b'inchal myab'a'n, inche yajti tman.

3Ate' k'walb'aj ati tnab'l, tzalajb'il teju' tman;

qatzun naq kuky'i'l qya eqch nb'eta', kyb'ajil tyaji'nju' tpwaq.

4Aju' nimaqkawil tnik'alti'j, b'a'n telu' ttanam tu'n

atzunte naq chojb'il ntqani'n, kyb'oljil tu'n.

5Ate' xjal kukx tjaw tnima'n tamiw,

napelo' jun xpatxab' tu'n tjaw tz'aq.

6Ate' b'inchal myab'a'n tojxu' t-xpatxab' kb'el tz'aqa

atzunte' tnik'alti'j b'a'n nanq'ina' ex ntzalaj.

7Max tok toklenju' prow tu'n tnik'alti'j

atzunte' b'inchal myab'a'n mixti'xte' nxi' tk'u'j kyi'j.

8Majx nche jawtilju' nimaqtnam kyu'n qil twitz jun q'oj;

aye'tzu'n ati kynab'l nb'ent txi' che'w toj kyu'n.

9Qama wuli'n jun xjal ati tnab'l tuk'i'l jun xnak

ktzajel ttx'u'jil, naq kxmayinjtzel, mixti'xte' kb'entil tu'n, qu'n layx tz'ok toj twi'.

10Aye'ju' b'yolwnaq

ntx'a'lti'j kyk'u'j b'a'nxi'x kyi'ju' b'a'n xjal.

11Min nik'xte' xnak ttx'u'jil tu'n

atzunte' ati tnab'l chab'a nxi' tka'yi'n se'n tu'me'l.

12Qa jun nimaqkawil nxi' tb'i'nju' chajyolil

tkyaqilju' tkawb'il che b'aje'l chalyol.

13Ate' prow tuk'ilju' nyajlante

axte' Dyos q'olte kychwinqlal.

14Kqrineb'el tkawb'ilju' nimaqkawil

qa nkawin toj tnik'alti'j

15Tu'n tzak'b'il ex asyal noka' qnab'l

atzunte' k'walb'aj naq chu'chi'n twitz, nel tch'ixaw ttxu tu'n.

16Nim il nchmet ajkykub' puqli b'inchal myab'a'n;

aye'tzu'n b'a'nxjal k'okyel kyka'yi'n ajkykub' b'o'lj.

17Tzak'unxa tk'wala, b'a'ntzun k'anq'ilatziya,

ktzalajila ex k'ojlala.

18Jamixti'x jun b'a'n kawil, min nkane toj kywitzju' tman ti'ti' kyb'incha';

¡Tzalajb'il teju' tnam njapun tkawb'il Dyos tu'n!

19Layx tb'ite' loq'aj majen qa naq tu'n yol

qu'n nkane toj twitz ex minti' nxi' tb'incha'n.

20B'a'nxpelo ch'i'ntlju' xnak tka'yink

kyetwitzju' naq nel tlanu'n kyol.

21Qa naq nka'yina te jun lq'o'n majen toj tch'inil

yajxitzuntl tzul toj tk'u'ja.

22Ate' xjal kuw ttx'u'jil

naqxi'x ntx'u'jin ex ati kmuj noq nel tlani'n tyol.

23Ate' noq tnima'ntib' nel tch'ixaw,

atzunte' me's njaw nima'n.

24Aju' noktuk'ila'ntib' kyuk'i'l eleq',

min ntk'u'jla'n tib'; qu'n qama che tzyet ax juntlte kytxkonjtzel.

25Aju' xob'le'n nakuj jun xpatxab',

atzunte' xjal q'uqlok tk'u'j ti'j Dyos b'a'ntel.

26Nimte' nkjyo'nju' xtalb'il kyeju' ajkawil,

noqtzun o'kxte' Qman Dyos q'olte xtalb'il.

27Aye'kye' tnik'alkyi'j nche el kyik'o'n b'inchal myab'a'n,

exqe' b'inchal myab'a'n kylab'qeju' tnik'alkyi'j.