Os 14 - Mam Ostuncalco Bible

Txokb'il tu'ntanjtzkyi'j aj Israel tuk'i'l Dyos

1¡Kutanjtz kyi'je' Israel tuk'i'l Qman Dyos,

mache kub' tz'aqe' tu'n tpaj kyile'!

2Kutanjtz kyi'je' tuk'i'l Qman Dyos.

Ex kymanxe' lu toj kyna'j Dyose':

Najsanku'ya tkyaqil qile'

ex k'moma ninb'il nxiqq'o'ne' teya tu'n tkyaqil tk'uja.

3Lay qo kletqe' tu'n Asirya

expe' lay b'ent qojqe' ti'j chej.

Lay che okqq'o'ntlqe' qb'inchb'aj tu'n qq'ob'e' te Qdyose',

qu'n o'kx tuk'i'la Nman Dyos,

nkneta' q'uqb'ab'l tk'u'j meb'a, chechiku'ye'.

Tma Qman Dyos tu'n tk'i'wlante Israel

4Chi Qman Dyos:

Kche nq'ana'ye' toj kypi'sile';

Kche nk'u'jla'ye' maskye myab'a'n qe'ye' weye',

qu'n matxi' tz'el ntx'u'jile' kyi'j.

5Chin okyele' kyeye' Israel kse'n ẍmu's,

atzunkye' kche b'echile', kse'nqe' b'ech liryo.

kche okyelu' kylok'e' kuw

kse'n witz Lib'ano;

6okxi'x che ch'iyel tq'ob'

tb'anilqexi'x kse'n tq'ob' tze olib'

ex iky tk'ok'jal kse'n k'ute toj Lib'ano.

7Che najaltle' tjaq' kolb'ilkyeye' wu'ne';

kche ch'iyeltzuntze' kse'n triy,

kche b'echale' kse'n tqan lob'j ub'a

ex che okyele' b'a'n kyolinjtze' kse'n b'in toj Lib'ano.

8Kkyma'tzuntze' Eprayin kjalu: ¿Mixti'tlqe' tajb'en witzleb' qe?

¡Ayinwe' chin ka'yilte ex chin xq'uqilteju' ntaname'!

Ikyqinwe' kse'n junwi' tzaj kukx ttenju' cha'x,

ex atzuntzu' che witzalaju' ntaname' wu'ne'.

B'ajsb'il

9Aye' ati kynab'l ex k'atzqe'

tu'n telkynik' ti'ju' yol lu:

Tzinun qe'kye' tb'e Qman Dyos,

ex aye' tnik'alkyi'j nche b'et toj;

aye'tzunkye' b'inchal il nche' jaw tz'aq toj.