Ez 34 - Mam Ostuncalco Bible

Tqanilju' tzul kyi'j k'ik'lel kyxol aj Israel

1Tzaj yolin Qman Dyos weye', tma:

2Ichan, yolina toj nb'iye' kyi'ju' k'ik'lel kye aj Israel, q'manxa kye: Lu ntma'n Qman Dyos: ¡Layqe'xwitju' k'ik'lel kye aj Israel, aye'x nkyxq'uqi'nkyib'! Aye'kye' rit tu'n kyxi' kyka'yi'n k'ik'lel.

3Inxi'x che k'wane' ti'ju' lech, nkyb'incha'n kyxb'alune' tu'n kysmal ex nche kub' kyb'yo'ne' rit q'u'sqe'xi'x, extzun min nche'x kyk'ayi'ne' rit.

4Min nche onine' kyi'ju' rit numjniqe', ex min nche kyq'ana'ne' yab'qe', ex min nok kyptzo'ne' toqjni tqan, ex min najtz kyanjsa'n ti'ju'ye' nche kyajtzpet, ex nche kyjyo'ne' nche'x tz'aq, kuwqepe'ye' kye.

5Matxi' che kyaju' nrite' mixti' k'ik'lel kyi'j ex matxi' che b'ajx sputj, ex matxi' che b'aj ch'yo'n kyu'n tojk'ul txkup.

6Mache b'ajx sputj kyojile k'ul ex kywi'yile nimaq witz, mache b'ajx tzpet toj tkyaqilju' tx'otx', ex mix-a'lo' nxitk'u'j kyi'j tu'n txi' jyolkye.

7Kyb'inkutzune' nyole' b'a'nxi'x, k'ik'lel.

8Axxi'x ayine' Dyos Manb'aj, ayinku'ye' chin q'malte: Kykyaqil chukchaq tojk'ul txkup ẍeb'ajx elq'ankye nrite' ex mache'x kych'yo'n, qu'n mixti' k'ik'lel kyi'j. Min nche'xju' nk'ik'lele' jyolkye rit. Inxi'x xikyka'yi'n kyib'ju' k'ik'lel, aye'tzu'n rit min nche'x kyka'yi'n.

9Qu'mtzun k'ik'lel, kyb'inku'ye' yol

10kxe'l nma'ne' kyeye', ayine' Dyos Manb'aj: Chin okyele' te kyajq'oje' k'ik'lel, ex chin xjelule' kyeye' kyi'ju' nrite'; k'elel wiq'i'ne' kyoklene' xq'uqilkye, tu'ntzun lalun tz'ok kyka'yi'ntl kyib'e' kyib'kyib'e'; che elel wiq'ine' nrite' kyeye', tu'ntzun lalun che b'aj kych'yo'ntle'.

Aju' b'a'n k'ik'lel

11Nxinma'ne', ayine' Dyos Manb'aj: Ayinxwe' chin xe'l ka'yinkyeju' nrite'.

12Kse'n k'ik'lel nb'ajx tk'u'j kyi'ju' trit ajkyxi sputj, ikxtzun weju'ye' kyi'ju' nrite'; che tzajel wiq'i'ne' jachaq sputi'nakyib' toj jun q'ij qxopin ex q'eqjab'.

13Che eletz wiq'ine' kyoju' najchaq tx'otx', che tzajel nb'u'yi'ne' ex xe'l wiq'ine' tojxju' kytx'otx'. Che xe'l wiq'i'ne' tu'n kywan kywi' witz toj Israel, ex ja ta'qe' a', ex kyoj kykyaqil najb'il toju' tx'otx'.

14Che kxe'l wiq'i'ne' jata' kywa tb'anil, toju' kywab'l tb'anil kywi' nimaq witz toj Israel. Atzuntzu' b'a'n kyojlana' ex tu'n kywan ti'j kywa tb'anilxi'x.

15Ayinku'we' chin k'ik'lel kye nrite', ayinxe' chin xe'l q'inkye ojlal. Ayine' Dyos Manb'aj nchin q'mante.

16Chin xe'le' jyolkyeju' rit ttzpetniqe', che tzajel wiq'i'ne' kyajniqe' tz'aq, che okyel nq'ana'ne' toqjni kyqan, che xe'lwoni'ne' numjniqe', che xe'lnka'yi'ne' q'u'sqe' ex kuwqe', che okyel nka'yi'ne' se'nxju' nojqelan.

17Ayine', Dyos Manb'aj, nchin yolin: kyb'inku'ye' nrit: Knb'incha'we' tnik'alilti'j kyxol qpoj tman rit ex qpoj tman chib'.

18¿Myatzun o'kx tu'n kywan tb'anil kywaye', ex ikx tu'n tb'aj kywab'e'ne' xkyajten? Inche k'wane' ti'ju' a' ẍtilun, atzu'n txqantl nb'aj kyxoq'le'ne' tu'n kyqane'.

19Aye'tzu'n nrite' nxikywanju' kywa matxi'toq b'aj kywab'e'ne' ex nkyk'wa'nju' a' matxitoq b'aj kyxoq'le'ne'.

20Qu'mtzun, nxinma'ne' kyeye', ayine' Dyos Manb'aj: Knb'incha'ye' tnik'alilti'j kyxolju' rit q'u's kyuk'i'lju' oknikyi'j.

21Matxi' che b'je'x kylmu'ne' numjniqe', matxi' che oktene' tokolkye ex matxi' che b'ajx oq kyu'ne'.

22Ayintzunwe' chin klol kye nrite'. Lay wajtle' tu'n kyxi' elq'a'n. Knb'incha'ye' tnik'alilti'j kyxolju' rit.

23Tzul jumajtlju' nmajine' Dab'i wu'ne', ex k'okyel nq'o'ne' o'kxte jun k'ik'lel, ex ate kxel ka'yinkye. Ate kk'ik'lelkye.

24Ayine' Dyos Manb'aj, che ajb'el weye', atzu'n nmajine' Dab'i nejenel kye. Ayine' Dyos Manb'aj nchin yolin.

25Kjel b'entti'j jun nyole' kyuk'i'l, tu'n kyanq'in toj nak'b'il. Che b'elnnajsa'ne' tojk'ul txkup toju' tx'otx', tu'ntzun kyanq'inju' nrite' toj nak'b'il kyoj kojb'il ex tu'n kykyaj wtan toj k'ul.

26Che kb'el nq'o'ne' nrite' ti'jileju' witz xjan weye', ex che nk'i'wla'ye'; nim jb'al tzul nq'o'ne' tojx tq'ijlalil.

27Che witzalju' tze toj kojb'il, kjawil tawalju' tx'otx', ex che anq'il b'a'n tojku' kytx'otx'. Ajntzaqpinteye' ntaname' kyeju' matxi' che kub'yajunkye, k'eleltzun kynik'tz qa ayine' Dyos Manb'aj.

28Lay che ultlkye' najchaq tnam iq'ilkye, ex lay che oktentl tojk'ul txkup ch'yolkye. Che anq'il toj nak'b'il, mix-a'lo' sak'pulkye.

29Kxe'l nq'o'ne' kyawb'il tb'anil tx'otx', ex lay che yajtitl tu'n we'yaj ex lay che xmayintl txqantl nimaqtnam kyi'j.

30K'eleltzun kynik'tz qa ayine' Dyos Manb'aj, atinqine' kyuk'i'l, ex a Israel ntaname'. Ayine' Dyos Manb'aj, nchin q'mante.

31Aye'ye' nrite', ate'ye' toj nch'laje'. Ayine' Dyos Manb'aj nchin q'mante, chi Dyos.