2 S 7 - Mam Ostuncalco Bible

Tzaj ttziya'n Qman Dyos tu'n tk'iwlante Dab'i(1 Cr 17.1-27)

1Tetzunj matxi'toq b'ent tten nimaqkawil Dab'i toju' tja te kawb'il ex matxi'toq kub' q'o'n toj nak'b'il tu'n Qman Dyos kyuk'i'l kykyaqilju' tajq'oj nqaku' ta'qe',

2xitma'n te Natan, aju' t-sanjelal Dyos:

—Ma b'a'ntzulo, najlqinwe' toj jun ja te kawb'il k'ute, atzunju' tkax Qman Dyos naq toj pach xb'alun, chij.

3Atzunte Natan xittzaq'we'n te:

—B'inchama tkyaqilju' makub' t-xima'na, qu'n atite Qman Dyos tuk'i'la, chij.

4Textzu'n qonik'an lu, tzaj yolin Qman Dyos te Natan, ex tma:

5Kutxi'ya yolil tuk'i'l nmajine' Dab'i, ex q'manxa te kjalu: Ayine' Dyos Manb'aj ẍin q'mante, ma myatzuloya kjawil b'inchante jun ja te k'u'lb'il ja chin tenb'ila'ye'.

6Atxi'x tej kyetzwiq'i'ne' aj Israel toj Ejipt, tu'n tul kanunx ja'lo, b'ajxa' chin tena'ye' kyoj ja te k'u'lb'il, naqx nchin b'etjeye' kyoj pach xb'alun.

7Toj tkyaqilju' tq'ijlalil tej ẍin b'ete' kyuk'i'l, b'ajx txa'nma'ne' te junju' kynejel, aye' eb'jaw nsk'o'ne' tu'n kykawin tib'aju' ntaname' Israel, tu'n tjaw tb'incha'n jun ja te k'u'lb'il k'ute ttzeyil.

8Qu'mtzun, ayine' Dyos Manb'aj nimwipumale', matz'el wiq'i'na ti'j k'ik'lej rit, tu'n toka nejenel te ntaname' Israel;

9matxi' chin tenxi'ye' tuk'i'la jaxjaku' nb'eta'ya, matxi' che b'aju' tajq'oja xjaw kyi'nkyib' ti'ja wu'ne', ex matxi' txinq'o'ne' toklena kse'nkye nimaqxjal twitzju' tx'otx' lu.

10Expe' matxi' tz'el npa'ne' kytx'otx'ju' ntaname' Israel, ex matxi' che kub' nq'o'ne' atzu', tu'n kynajan tojku' kytx'otx', ja lay che oka' ik'le'n ex tu'n lalun che yajlanjtz kyu'n b'inchal myab'a'n kse'n ojtxi',

11tej kyoknq'o'ne' nejenel tu'n kykawin tib'aj ntaname' Israel. Ktenb'ela toj nak'b'il wu'ne' kyuk'i'l kkyaqil tajq'oja. Ex majx nxi' nma'ne' teya qa che tzajel nq'o'ne' tyajajila,

12ajtzun tjapun tchwinqlala ex tku'x mqu'na kyk'etz tyajilb'ena, kjawil nsk'o'ne' jun tyajajila ex kxe'l nq'o'ne' kawb'il toj tq'ob'.

13Ate kjawil b'inchante jun ja te k'u'lb'il weye', ex knkuwsa'ye' tkawb'il tejumajx.

14Chin okyele' te tman, atzunte k'okyil te nk'wale'. Qatzun matb'incha jun taq'wix, kb'el ntz'e'ysa'ne' twitz ex kb'ajel nq'ob'ane' toj asyal kse'n nkyb'incha'n manb'aj kye kyk'wal,

15ex lay tz'el wiq'ine' nxtalb'ile' te kse'n sel wiq'i'ne' te Sawul, tu'n toka te t-xel.

16Che nxq'uqi'we' tyajajila exju' tkawb'ila kukxju', ex ktenb'elte' tkawb'ila tejumajx, chi Dyos, chiku'ya te, chij.

17Xi'tzun tma'n Natan tkyaqil ja'lu te Dab'i, ikxi'xu' kse'n til ex tb'i.

18Atzunte nimaqkawil Dab'i okx yolil twitz Qman Dyos, ex tma: Nman Dyos, ¿alkyeqine' exqe'ju' toj njaye' tu'nju' saj tq'o'na woklene' nim?

19¡Nman Dyos, naq ch'i'nte' lu toj twitza, matxi'pe'na' tzaj tma'na titi' ktb'incha'ya kyi'ju' nyajajile' tjax chix! ¡Mix-a'lo' jun xjal kse'n aya, Taye!

20¡Mixti'tl tu'n txinma'ne' teya, Nman Dyos, qu'n ojtzqi'n qina'we' tu'na b'a'nxi'x!

21Matb'inchaya tkyaqilju' ti'xti' te lab'te'n lu, kse'nxju' tzaj ttziya'na ex kse'n b'a'n toj twitza, tu'n tel nnik'e' kyi'j;

22qu'mtzun, ¡nimta toklen, Nman Dyos! Mix-a'lo' juntl kse'n aya ex mixti' juntl dyos ti'jxi'ya, b'i'n qu'ne'.

23Naqpena' ttanama Israel, ¡mixti' juntl kse'nte, naq o'kxte toj tkyaqil twitz tx'otx'! Tzaqpet tu'na Nman Dyos, tu'n tok te ttanama, jaw tnimsa'na tej tb'inchanteya nimaq ti'xti' toj ex b'inchb'en te lab'te'n. Mache eltiq'i'nju'ya txqantl tnam kyuk'i'lxi' kydyos twitzju' ttanama kolpet tu'na toj Ejipt,

24qu'n matxi' jaw t-sk'o'na Israel tu'n tok te ttanama tejumajx, ex tu'n toka Nman Dyos, te Tdyos.

25Qu'mtzun, Nman Dyos, kukxwit tten tyolju'ya tzaj ttziya'na weye' ju' tmajena ex kyeju' nyajajile', ex japunxwit kse'n xtmaya.

26¡Jawxwit nima'nju' tb'iya kukxju', tu'ntzun tq'manjtz qa aya Dyos Manb'aj nimtipumal! ¡Che tenxwitju' nyajajile' twitza kukxju'!.

27Nman Dyos nimtipumala, matxi' tzaj tma'na weye' qa kukxju' che kawilju' nyajajile'; qu'mtzun, maskye naq tmajinqina, inxi' nkub'sa'ne' lu teya.

28Taye, tkyaqilju' tyola ax qe', qu'n Dyos na'ta, ex matxi' tzaj ttziya'na txqan b'a'n weye';

29qu'mtzun b'inchama xtalb'il, k'iwlanqeku'ya nyajajile' tu'n kyten kukxju' twitza. Matxi'na' tzaj ttziya'nta Nman Dyos, tu'nju' tk'i'wb'ila, k'i'wla'nqe'kye' nyajajile' tejumajx, chi Dab'i.