1-2Toj tnejel ab'q'i ntoq kawin Dariy, tk'wal Aswer, aj Medo, kyib'aj kaldey; ayine' Danyel, intoq chin xnaq'tzane' toju' tuj Jeremiy t-sanjelal Dyos ja nyolina' kyi'ju' oxnaq lajoj (70) ab'q'i tu'n tjapun tab'q'iyilju' xitb'il tib'aj Jerusalen, kse'nxju' tzaj tma'n Qman Dyos teju' t-sanjelal.
3Naq'witzuntze' na'l Dyos, kub'sal twitz Qman Dyos, nmewayine' ex oknq'o'n wi'je' jochin, ex nkub' qeye' toj tza'j.
4Nk'ulune' te Qman Dyos Ndyose' ex xinma'ne' te:
Nman Dyos, nim toklena ex nimtipumala, njapun tu'na kukxju' aju' nttziya'na ex ntyek'u'na tk'u'jlalila kyeju' nche k'u'jlanteya ex njapun tchaq'b'ila kyu'n.
5Matxi' qo b'inchan ile'; matxi' qb'inchaye' taq'wix twitza; matxi' qb'inchaye' myab'a'n; matxi' qo anq'inxi'ye' tu'nx qnab'le' ex min na'na qu'ne'; matxi' che kyej qkolb'ene' tchaq'b'ila exqe' tnuk'b'ila.
6Min ẍe'x qb'i'nju'ye' tmajena aye' t-sanjelala e'yolin toj tb'iya kye qnimaqkawile', qnejele', kye ojtxi' qchmane' ex te tkyaqilju' tnam Israel.
7Nman Dyos, tnik'altati'j, ayo'tzunqe' aj Israelqo'ye' matxi' tz'el qch'ixawe'; aye' najlqe' toj Jerusalen exqe' txqantl aj Israel, najchaq mujqa naqaku' ta'qe', najlqe' kyoju' tx'otx' jachaq ẍepona' tchto'na tu'n tpaj jawkyi'nkyib' ti'ja.
8Nman Dyos, matxi' tz'el qch'ixawe' kyuk'i'l qnimaqkawile', qnejele' exqe' ojtxi' qchmane', qu'n matxi' qo b'inchan ile' twitza.
9Atzunta Nman Dyos, nq'aq'anta tk'u'j ex nkub' tnajsa'na qile'. Majaw qi'nqib'e' ti'ja
10ex min xiqb'i'na, Nman Dyos, min ẍe'x qnima'nju'ye' t-xnaq'tzb'ila saj tq'o'na qeye' kyu'nelju' tmajena ex t-sanjelala.
11Tkyaqilju' tnam Israel min xitoksla'n t-xnaq'tzb'ila, ex min kyaj tu'n kyb'inchante tchaq'b'ila; qu'mtzun matxi' kub' tz'aqju' qanb'en taq'wix qib'aje' exju' kytziya ojtxi' qchmane' tu'n tb'inchet, tz'ib'a'n toj tkawb'il Moyses tmajena, qu'n matxi' qo' b'inchan ile' twitza.
12Matxi' japunju' tyola tmaya qib'aje', ex kyib'aju' kawil, qu'n matxi' tzaj tq'o'na jun ninyajb'il qib'aje'; aju' b'ajx tzaja' twitz tx'otx' kse'n matxi' tzaj tib'aj Jerusalen.
13Tkyaqilju' taq'wixil lu matzul qib'aje' kse'nx tz'ib'a'n toj tkawb'il Moyses; ex mixti'x nqo' jyone' ti'ja Nman Dyos, ex mixjun nkyej qtzaqpi'ne' qb'inchb'ene' myab'a'n, ex mixti'x xiqljo'ne' ax.
14Qu'mtzun, Nman Dyos, makub' t-xima'na xitb'il lu ex matzaj tq'o'na qib'aje'; qu'n tz'aqlixi'x tkyaqilju' ntb'incha'na Nman Dyos, ayo'tzunqe' mixti' xqaje' tu'n txi' qb'i'na.
15Tyek'uta tipumal Nman Dyos tej tetz tiq'i'na ttanama toj Ejipt, atxi'xtzun tojtzqinjtz tb'iju'ya nim toklen ikx ja'lo, ayo'tzunqe' matxi' qo' b'inchan ile' twitza ex matxi' qb'inchaye' myab'a'n.
16Nman Dyos, b'i'n qu'ne' qa nlaqj tk'u'ja qi'je'. B'inchama xtalb'il iq'imilju'ya ttx'u'jila ex lalun q'ojintla ti'j Jerusalen, qu'n a ninttanamju'ya, ex a witzju' xjan teya. Kykyaqil xjal kyoj nimaqtnam nqaku' ta'qe' nche xmayin ti'j Jerusalen ex kyi'ju' ttanama, naqx tu'n tpaju' qile' ex kyil ojtxi' qchmane'.
17Nman Dyos, b'intzju'ya nna'j Dyose' ex nkub'sb'ile' ayine' tmajena; Nman Dyos, naqx tu'nelju' tb'iya, q'aq'antz tk'u'ja ti'ju' tjaya b'isb'ajilx xkyeja'.
18Nman Dyos, qotka'yintza ex qotb'intza; ka'yintza yajb'ilqeye' exju' xitb'il teju' ninttanama ja intoq ajwalita' tb'iya. Nchin kub'sane' teya mya tu'nwtju' tnik'alqi'je', naqna' tu'nte' nimta tq'aq'b'il tk'u'j.
19¡Taye, Nman Dyos, qotb'intza! ¡Najsanku'ya qile'! ¡Nman Dyos, qo' tb'itza ex qlana onilqeye'! ¡Naqx tu'nju' toklena Nman Dyos, ex naq tu'nelju' ninttanama, nkub'san toj tb'iya, lwix kuttzaja! nchije'.
Tqanil ti'ju' oxnaq lajoj (70) sman20Inxtoqtzun chin na'n Dyose' ex intoq jatz npa'ne' wile' ex kyilju' ntaname' Israel, ex intoq chin kub'sane' twitz Qman Dyos ti'ju' witz xjan.
21Tetzunj intoq chin na'n Dyose', ul lipanju' anjl Kab'ryel jatinqina'toqe', aju' ojetoq kub' nwitzk'a'ne'. Ch'inxtltoq tpon kmuj tu'n tkub' q'et chojb'il te qale twitz Qman Dyos.
22Tzaj tma'ntzuntz weye':
Danyel, machin nule' chik'b'alkyeju' lu teya.
23Tej xtzyet tna'n Dyosa, matzaj tzaq'we'na tu'n Dyos. Matzun chin nule' q'olte tzaq'web'l teya, qu'n nlaqj Dyos ti'ja. Qu'mtzun b'intzju'ya lu b'a'nxi'x, tu'ntzun tkane ja'lu toj twitza.
24Oxnaq lajoj (70) sman yajb'il k'ik'el
kyi'ju' t-xjalila exju' xjan ninttanama
tu'n tkub'najsetju' il exju' taq'wixil,
tu'n tul kanunju' najsb'il il ex tu'n tten tnik'alilti'j tejumajx,
tu'ntzun tjapunju' yek'b'il ex tqanil q'ma'ntl
ex tu'n tkub' ky'i'wla'nju' Xjanxi'x toklen.
25Ati tu'n tb'inteya ex tu'n tkane toj twitza;
Texju' kmuj ajtetz q'o'n chaq'b'il
tu'n tjaw b'incha'n jumajtlju' Jerusalen,
tzmax ajtulju' Nejenel Xjansa'n,
k'ik'el wuq sman,
aye'tzu'n b'e exqe' tapi che kjawil b'incha'n jumajtl
naq oxnaq kab'e' (62) sman che tenb'il,
tojtzu'n tq'ijlalil lu nim k'ixk'oj ex yajb'il kb'ajel.
26Tb'ajlenxi'tzu'n oxnaq kab'e' (62) sman
kb'el b'yo'nju' Nejenel Xjansa'n.
Kb'el xitu'n tnam Jerusalen tuk'i'lju' tja Dyos
kyu'n t-xjal jun nimaqkawil tzul.
Tzulte' b'ajsb'il tq'ijlalil, kse'n tnimal a'
ktenb'elte' q'oj ex xitb'il
tzmax ajtpon b'ajsb'il q'ij.
27Tojtzun jun smantl,
kjel b'entti'j jun tyol kyuk'i'l txqan xjal,
tojtzun nik'jan sman kb'eltq'o'n jun chaq'b'il
tu'n lalun kub' q'o'ntl chojb'il ex oyaj.
Ex kb'inchanjtzil jun nin taq'wixil;
twitzju' q'olb'eb'l te chojb'il,
tzmax ajtulju' xitb'il q'ma'ntl
tib'aju' kb'inchalte ti'xti' lu, chij weye'.
Who We AreWhat We EelieveWhat We Do
2025 by iamachristian.org,Inc All rights reserved.
