Is 55 - Mam Ostuncalco Bible

Intzajtoyi'n Qman Dyos tk'u'jlalil kye kykyaqil

1Kukytzaje' k'wal a' kykyaqile' nche k'wajtiye';

kukytzaje' aye'ye' mixti' kypwaqe',

kknetel wab'j naqkukx kyu'ne', che wanqe'ye';

kknetel ta'l ub'a ex lech kyu'ne' naqkukx.

2¿Tiqu'n nkub'a' kynajsa'n kymediye' ti'ju' mya wab'j?

¿Tiqu'n nb'aj kynajsa'ne' twikyk'u'je' ti'ju' min nche noje' tu'n?

Chin kyb'itze' b'a'nxi'x ex che wale' ti'ju' tb'anil wab'j,

kche wale' ti'ju' tk'ok'jalxi'x.

3Kukytzaje' nk'etze' ex chin kyb'inku'ye',

chin kyb'itze' ex che anq'ile'.

Kjel b'entti'j jun nyole' tejumajx kyuk'i'le',

che japumeltzun nyoltze' kyej b'entti'j toj tk'u'jlalil tuk'i'l Dab'i.

4Oknq'o'ne' Dab'i te tziyal kye kykyaqilju' nimaqtnam,

te nejenel ex xnaq'tzal kyeju' tnam.

5Che tzajel ttxko'na tnam min tojtzqi'na kywitz;

ojqel che pomel tnam tk'etza min ojtzqi'na kyu'n,

qu'n matxi' jaw nnima'na,

ayine' Dyos Manb'aj, Xjan kye aj Israel.

6Kyjyome' Qman Dyos atixku' tu'me'l tu'n tknet kyu'ne',

kytxkonxe' atixku' nqaku'.

7Tzaqpinkj tb'eju' b'inchal myab'a'n,

exju' pi's xjal tu'n tkyajttzaqpi'nju' t-xim;

kutanjtz kyi'je' tk'etz Qman Dyos, ktzajel q'aq'ante' tk'u'j kyi'je';

kutanjtz kyi'je' tk'etz Qman Dyos, nimte tk'u'jlalil tu'n tkub' tnajsa'n qil.

8-9Qu'n mikxa'we' nxim kse'nkye',

ex mikxa'we' nb'incha'n kse'n nkyb'incha'ne'.

Kse'n ta'ya' kya'j tib'aju' tx'otx',

iktzu'n ta'we' nxim ex nb'inchb'aj tib'ajxi'tlu' kye'.

Chi Qman Dyos ntma'n.

10Kse'n jb'al ex txun che'w nche tzaj twitz kya'j,

min nanjtlkyi'j qa na'mxtoq tb'aj kyak'sa'n twitz tx'otx',

inkyb'incha'n tu'n ttzaj tawal ex tu'n ttzaj poq'li,

injaw ij twitz tu'n txi' awet

ex wab'j te k'a'chb'il,

11ikytzun nyolju'ye' in nma'ne'

lay tz'anjtzti'j wuk'i'le' qa min saq'unan nejtl,

inpe' tb'incha'nju' wajb'ile'

intb'incha'nju' chaq'b'il nxinq'o'ne' te.

12Che eletzkye' na'tz tuk'i'l tzalajb'il,

che ul jumajtle' toj nak'b'il toju' kytx'otx'e'.

Okxi'xpetzun che b'itzalju' witz ex k'ul

tu'n tzalajb'il ajkyka'yinte

ex kykyaqilju' tze toj k'ul che poq'chal toj kyq'ob'.

13Che tzajel ch'iy tzaj te kyxel ch'i'x,

ex che tzajel ch'iy ktxab' te kyxel la;

kjawil nima'n tb'i Qman Dyos tu'nju' lu;

k'okyel ju'lu te techlal tejumajx, ex milo kb'ela' xitu'n.