Dn 11 - Mam Ostuncalco Bible

Aye' nimaqkawil toj tb'a'nq'ob'kya'j ex toj tnayajkya'j

1Ayinwe' nkuwsante ex oninte Dariy nimaqkawil aj Medya toj tnejel ab'q'i te tkawb'il.

2Atzu'n ja'lo kxe'l nchik'b'a'nju'ye' ax teya kjalu:

Kche kawil oxe'tl nimaqkawil toj Persya, kyi'jxi'tzuntl ja'lu tzul jun tkyaji'n nimaqkawil ktenb'elxi'xtl tq'inumal kywitzju' oxe'. Ajtzun tten tipumal tu'nju' tq'inumal kjawil ti'ntib' q'ojil ti'j nimaqtkawb'il Kresya.

3Yajxi'tzuntl k'okyel juntl nimaqkawil kuw ex twi' q'ojil, kxe'l mlenju' tkawb'il nimxi'x ex ktb'incha' ti'chaqxku' tajb'il.

4Ajtzun tkuwixju' tkawb'il, kb'el xitu'ntzuntz ex k'elel toj kyaje' tnej. Lay kyejten tkawb'ilju' nimaqkawil lu kyeju' tyajajil, ex lay tentl tipumalju' kawb'il lu kse'n tnejel, qu'n kna' kb'el aq'pu'nju' kawb'il ex junxi'qe'tlu' che kawil te t-xel.

5Nimtipumalju' nimaqkawil toj tnayajkya'j ktenb'el, kxoltzunju' nejenel toj tkawb'il k'okyil jun kuwxi'x kyetwitz, kxe'l mlenju' tipumal kyib'aj txqantl nimaqkawb'il.

6Ajtzun tb'aj jte' ab'q'i, kjel b'entti'j jun kyol: kxe'l tq'o'n nimaqkawil toj tnayajkya'j tmyal tu'n tmje tuk'i'l nimaqkawil toj tb'a'nq'ob'kya'j, naqx tu'n tten nak'b'il kyxolju' kab'e' nimaqkawb'il. Ex lay japunju' kyol kjel b'ent ti'j, qu'n kche kb'el b'yo'n tuk'i'lju' tal ex tchmil exqe' tmajen.

7Oktzun kjawil tiq'i'ntib' jun tojx kyja, ex k'okyel tzaqpaj q'ojil kyi'ju' t-xjal nimaqkawil te q'oj toj tb'a'nq'ob'kya'j, ex k'okyex toju' ja te kawb'il kuwsa'n, kche kanb'alju' t-xjal te q'oj.

8Expe' che kxe'l tiq'i'n kydyos toj Ejipt, exqe' kywitzileb' k'uxb'ilqe', kyuk'i'lxi' txqantl ti'xti' q'anpwaq ex saqpwaq tb'anilxi'x. Tb'ajlenxi'tzun jte' ab'q'i mixti' q'oj kyxolju' kab'e' nimaqtnam lu,

9k'okyeltilil tu'nju' nimaqkawil toj tnayajkya'j tu'n tkub'ti'ju' nimaqkawil toj tb'a'nq'ob'kya'j, ajtzun tka'yinte mixti'x tu'me'l k'anjetz ti'j toj ttanam.

10Aye'tzu'n tk'wal nimaqkawil toj tb'a'nq'ob'kya'j kb'ajel kyb'u'yi'n kyib' tu'n kyq'ojin ex che kb'ajel knk'u'n txqan xjal te q'oj. Juntzun kyxol k'okyel tzaqpaj q'ojil kyuk'ilju' t-xjal te q'oj kyi'ju' toj tnayajkya'j, ex majx kjel t-xitu'n tkyaqil, kse'n jun tnimal a' ajtex laqj; ex kpomelx toju' tkuwsb'il nimaqkawil.

11Okxi'x tzajel ttx'u'jilju' nimaqkawil toj tnayajkya'j ajkykanb'an t-xjalju' nimaqkawil toj tb'a'nq'ob'kya'j, k'eletz kyuk'i'l t-xjal q'ojil kyi'ju' kyajq'oj te tb'a'nq'ob'kya'j nim txqan kyb'aj ex majx che mankul kyu'n.

12Tu'ntzu'n ajtkanb'an kyi'ju' txqan tajq'oj, kjawiltzun tnima'n tib'tz, ex naq jte' q'ij ktenb'elju' tipumal.

13Atzunju' nimaqkawil toj tb'a'nq'ob'kya'j kb'el tnk'u'n jun tnejtl t-xjal te q'oj nimxi'xtl twitzju' tnejel, tb'ajlenxi'tzun jte' ab'q'i kxe'l jumajtl q'ojil kyi'ju' toj tnayajkya'j kyuk'i'lju' t-xjal te q'oj nim txqan kyb'aj, iq'i'mile kyq'ojb'il.

14Nim kjawil kyi'nkyib' toju' tq'ijlalil lu tiju' nimaqkawil toj tnayajkya'j. Kyxoltzunju' xjal lu che tenb'il jte' aj Israel myab'a'n kynab'l, ikxi'xu' kse'n kub' yek'u'n toju' witzik' ex lay japunju' kyxim.

15Tzulju' nimaqkawil toj tb'a'nq'ob'kya'j ex kjawil tb'incha'n jun t-xwe'l ti'j jun nintnam kuwsa'n, ex kb'elti'j tu'n. Lay b'ent tmqet kywitzju' ajq'oj kyu'n t-xjal nimaqkawil toj tnayajkya'j maskye kuw che q'ojin.

16Ktb'incha' nimaqkawil kkanb'al ti'xku' tajb'il kyi'ju' xjal makub'kyi'j tu'n, ex mix-a'lo' kmyolte twitz, ex kjelten twitzju' tx'otx' tb'anilxi'x ex kb'el t-xitu'n tkyaqilju' matz'elyal toj tb'e.

17Expe' ktb'incha' tib' tu'n tok te tajaw tkyaqilju' tx'otx' toj tnayajkya'j; tu'ntzun tkyejb'ent ti'j jun kyol tuk'i'lju' nimaqkawil lu ex kxe'l tq'o'nju' tmyal te t-xu'jilju' nimaqkawil, naqx tu'n tkub' t-xitu'nju' tkawb'il, extzun lay japunju' t-xim.

18Oktzun jawil tiq'i'ntib'tz kyi'ju' nimaqtnam toj mlaj, ex nim kb'elkyi'j tu'n; naqtzun jun nejenel kmqolte twitz, tu'n tel tch'ixawju' nimaqkawil toj tb'a'nq'ob'kya'j.

19K'anjeltlti'j nimaqkawil toj tb'a'nq'ob'kya'j kyoju' ja kuwsa'nqe' toj ttanam; ex kb'el tk'ulb'a'n jun ti'xti', majx kb'ajel, milo kb'injtzela'tl.

20K'okyeltzun juntl nimaqkawil te t-xel, kxe'l tchq'o'n jun peyil chojb'il tu'n tjaw q'inumaxju' tkawb'il; ajtzun tb'aj jte' q'ij kb'el b'yo'n, mya toj q'oj.

21Ti'jxitzuntel kkawil juntl ichan b'inchal myab'a'n, myatoq tu'n tok te nimaqkawil, kb'el tewa'n t-xim taq'wix, k'okyeltzuntz toju' kawb'il tuk'i'l sb'ub'l.

22Majx che kb'el tnajsa'nju' xjal te q'oj kjawil kyi'nkyib' ti'j, ex kb'el tb'yo'nju' nejenel kyejni b'entti'j jun yol tuk'i'l.

23Ex che kb'el t-sb'u'nju' matxi'toq kyej b'entti'j jun kyol toj b'anil tuk'i'l, kkanb'al maskye naqch'i'n kb'aju' t-xjal te q'oj.

24Naqx myanim ajtpon kyoju' tb'anilxi'x tx'otx' teju' tnam ex ktb'incha' kse'n minti' xkyb'incha tyajilb'en: kxe'l taq'pun ti'xti' ex q'inumal k'elel tiq'i'n toj q'oj, kyxolu' t-xjal te q'oj. Kb'ajel tnk'u'n nejtl aj txi' q'ojil kyi'ju' nimaqtnam kuwsa'nqe', maskye naq te jte' q'ij.

25Tu'ntzunju' toklen ex tipumal kxe'l q'ojil ti'ju' nimaqkawil toj tnayajkya'j, tuk'i'l o'nb'il kyu'nju' txqan xjal te q'oj. K'elitzju' nimaqkawil toj tnayajkya'j q'ojil tuk'i'l tipumal kyuk'i'l txqan xjal te q'oj; ex lay xkye tu'n tq'ojin kyi'ju' tajq'oj, qu'n aye'xju' t-xjal che okyel miltz'uj ti'j.

26Aye'xju' intoq che wan tuk'i'l ti'j tmes che kb'el xitunte, kb'elkyi'ju' t-xjal te q'oj ex nim che b'ajelkyim.

27Kykab'ilxju' nimaqkawil lu, che ximal naqx tu'n kyb'inchante taq'wix tekyib', che kb'el qe wal junx ti'j mes ex naq chajyolil kkyma' tekyib', mixtzun a'lo'te kkanb'al kse'nxju' kyxim qu'n na'mxtoq tjapun tq'ijlalil.

28K'anjelti'ju' nimaqkawil toj tb'a'nq'ob'kya'j toj ttanam kyuk'i'l txqan tq'inumal kb'elti'j tu'n toj q'oj, ex kjawil miltz'uj ti'ju' yol xjan kyejni b'entti'j, ktb'incha'ju' tajb'il, k'anjeltzuntz toj ttanam.

29Ajtzun tponju' tq'ijlalil q'ma'ntl, kxe'l jumajtl kyuk'i'l t-xjal te q'oj toj tnayajkya'j; tojtzunju' maj lu lay che kanb'an kse'n tnejel.

30Kche tzajel xjal te q'oj te tkub'exq'ij toj b'ark q'ojil ti'j, tu'ntzu'n t-xob'il kb'el oq. Ktzajel ttx'u'jil nimaqkawil toj tb'a'nq'ob'kya'j ti'ju' yol xjan kyejni b'entti'j ex ktq'a'tib' kyyk'i'lju' min nkynima'nju' yol kyejni b'entti'j, naqx tu'n kyajb'en te.

31Kb'ajel yaju'nju' ja te k'u'lb'il kyu'n t-xjal te q'oj exqe' ja kuwsa'nqe', lay kyajtl tu'n tkub' q'etju' chojb'il nkub' tkyaqil q'ij, aye'tl kywitzileb' che k'okyex kyq'o'n toju' ja te k'u'lb'il.

32Naqx tak'a'nju' nimaqkawil che kjawil tnima'nju' mache eltxalpuj ti'ju' yol kyejni b'entti'j tu'n Dyos kyuk'i'l, tu'n tkub'kyi'j tu'n. Aye'tzunju' k'u'jla'n Dyos kyu'n kche web'il toj kyokslab'l.

33Che okyel tenju' ati kynab'l toju' tnam xnaq'tzalkye txqan xjal, naqatzun xb'aj jte' q'ij che kb'el b'yo'n ex che b'elttz'e'ysa'n, ex kb'ajxe'l elq'a'n tkyaqilju' ati kye, ex che kxe'l q'i'n te lq'o'n majin toj juntl tx'otx'.

34Ajtzun tpon tq'ijlalilju' yajb'il, kche onil junjun kyi'j, ex nimqe' naqx kyak'a'n kkymujb'a' kyib' kyuk'i'l.

35Ex kb'elkyi'j junjunju' xnaq'tzalkye xjal, ajtzun kyok toj joyb'ilkyi'j, ẍtilunqe'tl ex tnik'alkyi'j, tzmax ajtpon mankb'il tq'ijlalil b'entnitlti'j.

36Ktb'incha' nimaqkawil toj tb'a'nq'ob'kya'j ti'qchku' tajb'il. Kjawil tnima'ntib' ex k'okyel tq'o'ntib' nimxi'x toklen kyekywitz kykyaqilju' dyos, ex kyolil taq'wix ti'ju' Dyos axi'x, tkyaqiltzunju' ktb'incha' kb'antel tu'n, tzmax ajttzaj q'o'n tz'e'ysb'il twitz tu'n Dyos; qu'n ktb'incha'te Dyos aju' xima'ntl tu'n.

37Lay tz'okslanju' nimaqkawil lu kyeju' kydyos tyajilb'en, ex kyeju' kydyos qya, ex lay tz'okslan te juntl dyos, qu'n k'okyel tq'o'ntib' nimxi'x toklen kyekywitzju' dyos lu.

38Xi'tzu'n kk'ulula' twitzju' kydyos tnam kuwsa'nqe', jamin e'k'uluna' tyajilb'en, okpe' kxe'l tq'o'n q'anpwaq, saqpwaq, tb'anil ab'j ex txqantl ti'xti' twi' wi'yal te.

39Kche okyil tq'o'n xjal te q'oj nche k'ulun te juntl dyos, klolkyeju' tnam kuwsa'nqe'; aye'tzu'n mache k'ulun te nimaqkawil lu, che jawil tnima'n, kche okyel tq'o'n toj nimaq kyoklen, ex kxe'l tq'o'n kytx'otx' te tu'me'l t-xel.

40Ajtzun tpon mankb'il tq'ijlalil, kxe'lju' nimaqkawil toj tnayajkya'j q'ojil ti'j nimaqkawil toj tb'a'nq'ob'kya'j; oktzun k'elitz nimaqkawil toj tb'a'nq'ob'kya'j k'lulte tu'n tq'ojin kyuk'i'l tchej, tkarwaj ex txqan tb'ark, majx kb'el noj tx'otx' tu'n nakuj kyq'iq' jb'al.

41Ex k'okyex toju' Tb'anil Tx'otx', nim xjal che kb'eltb'yo'n; o'qe'kxju' xjal toj Edom, toj Moab' ex jun nin tnej toj Amon che kletil toj tq'ob'.

42Kche pomelju' t-xjal te q'oj toj junjuntl tx'otx', expe'na' lay kletju' Ejipt.

43Che kxe'l tiq'i'n k'uwenj q'anpwaq, e'saqpwaq, ex kykyaqilju' ti'xti' tb'anilqexi'x ate' toj Ejipt; kxe'ltzuntz kyi'j Lib'ya ex Etyopiy.

44Tzultzun tqaniltz toj tjawetzq'ij ex toj tb'a'nq'ob'kya'j, majx kb'ajel xob' tu'n; k'eletztzuntz tuk'i'l ttx'u'jil tu'n kb'aj tb'yo'n txqan xjal,

45ex kb'eltq'o'n txmuj kyxolju' ninnjab' tuk'i'lju' witz xjan Tb'anilxi'x. Axtzuntzu' kb'ajela' toj twi', ex mix-a'lo'te k'onilte.