1Xi' Naas, nimaqkawil kye aj Amon kyuk'i'lju' t-xjal q'ojil tu'n tkub'ti'j nintnam Jab'es toj Kalaad kyu'n. Xi'tzun kyma'n xjal najlqe' Jab'es te kjalu:
—Qnk'ukj ti'j jun qyol, qo' ajb'eltzuntze' teya, chechij.
2Xi'tzun ttzaq'we'n Naas ju' aj Amon kye:
—Qnk'ukjna'ti'j jun nyole' kyuk'i'le', qama kub' toj kywitze' tu'n tetz wiq'i'ne' jun tb'aq' kywitze' toj kyb'a'nq'ob'e' teyile junjunkye', tu'ntzun tel kych'ixaw aj Israel, chij.
3Xi'tzun kytzaq'we'nju' tijwnaq aj Jab'es te:
—Q'ontz wuq q'ij anb'ila qeye' tu'n txi' qsma'ne' tqanil toj tkyaqilju' tx'otx' Israel; qatzun mix-a'lo' sul onilqeye', ktzunlo qq'a' qib'tze' tu'n qajb'ene' teya, chechij.
4E'pontzu'n xjal q'ol tqanil Wib'ea, janajla'toq Sawul, ex xikyma'n tqanil kye xjal. Kykyaqiltzu'n xjal e'aq'wi oq'el majx ex ch'on toj kyanmi.
5Intoqtzun anjtzku'ti'j Sawul toj kojb'il kyuk'i'lju' wakx, xitqani'n kye xjal:
—¿Titi'tzu'n nche iq'i'n xjal? ¿Tiqu'n nche oq'a'? chij.
Xikyma'n xjalju' tqanil kymaju' xjal e'tzaj Jab'es q'malte kye.
6Tetzunj tb'inte Sawul ja'lu, ulju' t-xew Qman Dyos tib'aj; ex tzaj ttx'u'jil b'a'nxi'x.
7Tzajtzun tiq'i'n jun muj tman wakx ex eb'aj kub'tpẍu'n, ex exi' tchq'o'n jte' sanjelal txolilte toj tkyaqilju' tx'otx' Israel. Aye'tzu'n sanjelal intoq kyma'n: Ikyche setila' kywakyixju' minti' xkyaq'kyib' tu'n kyxi' tuk'i'l Sawul ex Samwel kse'n ja'lu, chechij. Kykyaqiltzu'n xjal b'aj kyb'u'yi'n kyib' ex kymujb'a kyib' kyuk'i'l, qu'n majx e'tzaj xob' b'a'nxi'x.
8Tetzunj kyb'aj tajla'n Sawulju' xjal toj B'esek, matxi'toq b'aj kyb'u'yi'n kyib' junaq wuqlajoj mutx' lajk'al (300,000) ichan aj Israel, atzun oxmutx' o'lajk'al (30,000) aj Juda.
9Xi'tzun tma'n Sawul kyeju' xjal exi' q'olte tqanil:
—Kymanxe' kyeju' xjal najlqe' Jab'es qa che kletel najchi'j te wanq'ij qu'ne', chij.
Exi'tzun sanjelaltz q'malte tqanil kyeju' xjal najlqe' Jab'es, aye'tzunkye ojexi'x che tzalaj,
10xikyma'ntzuntz te Naas.
—Qq'a'qib'e' tuk'i'la najchi'j, tu'n tb'inchanteya titi' tajb'ila qi'je', chechij.
11Tetzu'n juntl q'ij eb'aj tnk'u'n Sawulju' t-xjal te q'oj toj oxe' tnej, na'mxtoqtzun qsqix eb'jo'kx kyxolju' ajq'oj jab'u'yi'na'toq kyib', eb'aj kub' kyb'yo'n txqan aj Amon tzmax tjapun wanq'ij. Aye'tzu'n e'kyaj anq'in eb'ajx sputj ex mixti' e'kyajten kab'e' junx.
12Ate'tzun junjun xjal toju' tnam, xikyma'n te Samwel:
—¿Alkyeqe'tzu'n xjal eq'mante qa myab'a'n Sawul te nimaqkawil qib'aj? Kyq'onqe'tze' xjal lu tu'n kykub' qb'yo'ne', chechij.
13Atzunte Sawul mixti' taj ex tma:
—Mix-a'lo'te' kkyimel toju' q'ij ja'lo, qu'n matxi' kletju' tnam Israel tu'n Qman Dyos, chij kye.
14Xitzun tma'n Samweltz kye kykyaqil xjal:
Qoqe'ye' Wilwal tu'n ttzaj qeju' kawb'il atzu', chij kye.
15Tkyaqiltzunju' tnam eb'ajx Wilwal, atzuntzu' oka' kyq'o'n Sawul te nimaqkawil twitz Qman Dyos. Ex kub' kyq'o'n chojb'il te b'inchb'il twitz Qman Dyos, ojexi'x eb'aj tzalaj kykyaqil aj Israel tuk'i'l Sawul.
Who We AreWhat We EelieveWhat We Do
2025 by iamachristian.org,Inc All rights reserved.
