Pr 1 - Mam Ostuncalco Bible

Kyoklen q'unb'en

1Aye' q'unb'en ja'lu tma Salomon nimaqkawil aj Israel, tk'wal Dab'i.

2A kyajb'enju':

tu'n kyq'on nab'l, tu'n qelb'an,

ex tu'n tel kynik'tzilju' b'a'n nab'l.

3Tu'n qanq'i'n tuk'i'l nab'l,

ex tu'n qok tnik'alqi'j, tz'aqli ex tu'n lalun qo eltxalpuj.

4Tu'n tten kynab'lju' ku'xun na'mx ttenxi'x kynab'l,

tu'n kyel k'atz ex tu'n tb'ent kyximan b'a'nxi'x

5Alkyete ati tnab'l ex b'a'n t-ximante, che kxeltb'i'n,

ktenb'elxi'xtzun tnab'ltz ex k'elel tnik'.

6tu'n kykaneju' q'unb'en kyu'n ati kynab'l,

exju' kyyol, techlal, ex tu'n tpon toj kynab'l.

7Inten qnab'l qama qnima Qman Dyos,

inel kyik'o'nkye xnakju' nab'l ex xnaq'tzb'il.

Nab'l kye ku'xun

8Nky'ajul, b'inxa nab'l nxinq'o'ne' teya

ex lalun tzik'tna'lju' t-xnaq'tzb'il ttxuya tu'na,

9qu'n che okyelkye' te jun tuya

tb'anilqexi'x te achb'il tqula.

10Qa kyajb'ilju' b'inchal il tu'n tkub' sb'u'na kyu'n,

¡lalun taja nky'ajul!

11Qaj nkyma'nku' teya: Kuttzaja quk'i'le';

noqx qak'an qq'oku' xpatxab' toj b'e

tu'n tkyim jun b'a'nqa mixti' til.

12Che b'elexkye' xjal tnik'alkyi'j toj qlaq

kse'nqe' kyimni nche'x tb'elq'u'n kamik toj muqb'il.

13Ktenb'el txqan qq'inumal,

¡knojel tkyaqil toj qja tu'n qeleq'!

14Qlana, toka quk'i'le',

ex tkyaqilju' ti'xti' kb'ajel qsipa'n qxolilex, qa chechi.

15¡Laluntzun txi'ya kyuk'i'l nky'ajul!

Pa'mil tib'a ti'ju' kyb'e taq'wix,

16qu'n nnoktilil kyu'n tu'n kyb'inchan il;

¡nnoktilil kyu'n tu'n tkub' qojl chik'!

17Mixti'x tajb'en jun xpatxab'

qa q'ancha'l kye pich',

18aye'xkye' xjal lu nche kub' q'onte xpatxab' toj kyb'e

xob'ajilx ta'ju' kychwinqlal kyu'nx.

19Ikytzun nche b'aja' jamjolju':

axju' kyjamjoni'n nkub'yonkye.

Txokb'il tu'n nab'l

20Inkub'sanju' nab'l tk'i' tq'ojq'ojel twi'

kyoj ninb'e ex kyoj xky'ichb'e;

21npakb'an kytziju' tnam

jachaqja nkychmo'na' kyib' xjal toj nintnam.

22E' ku'xun mixti' b'a'n kyu'ne', twi'xmayil ex xnakqe'ye',

¿ma kukxtzun mache'xa'ju'ye' mixti' kynab'le',

ma kukxtzun kytzalaju'ye' toju' xmayb'il,

jtojtzun tz'ok kynab'le'?

23Kyb'intzpe'ju'ye' ntzak'b'ile'

atzun nq'onxwe' nxew kyeye';

ex kxe'l nyek'u'nju'ye' nxime' kyeye'.

24Oje che ntxokxi'ye', ex oje che nk'elxi'ye' tu'n kytzaje',

aye'tzunkye' min nkyb'i'ne'.

25Inpe' el kyik'o'ne' nab'l xinq'o'ne';

min nkyq'a' tzak'u' kyib'e' weye'.

26¡Kpomil tq'ijlalil chin tzele' kyi'je' ajkykub' b'o'lje'!

¡Chin jawiltzun xmayintze' kyi'je' ajkyb'aj ẍb'aje'ye' tu'n xob'il,

27ajttzaju' xob'el ex yajb'il,

b'isb'ajil ex k'ixk'oj,

kse'n jun saqchanpach, nb'aj t-xitu'n tkyaqil!

28Atzun q'iju' chin kytxka'ye', laytzun chin tzaq'wiwe';

chin kyjyo'tzuntze', layx chin knete' kyu'ne';

29qu'n nelkyik'u'nju'ye' nab'l

ex min kyajb'ile' tu'n kynimane' te Qman Dyos.

30Min kyajb'ile' tu'n kyk'monteju'ye' nab'l;

ex nel kyik'o'nju'ye' tzak'b'il.

31¡Aye'xe' cheb'o'ljel tu'n kyb'inchb'ene'!

¡ex aye'xe' che nik'b'elte kyxime' myab'a'n!

32Tu'nx kynab'lju' mixti' b'a'n kyu'n che kyimela',

exqe' xnak che kb'el b'o'lj tu'nju' min nok toj kywi';

33Atzunju' machin kub' tb'i'ne', k'anq'il toj nak'b'il

ex lay tzaj tchi jun xob'ajil ti'j. Chiju' nab'l.