1Nman Dyos, lalun chin ttzak'uya tuk'i'l ttx'u'jila
expe' lalun kub' ttz'e'ysa'na nwitze' toj tq'oja.
2Qu'n matxi' chin k'ixb'iye' kyu'n tal t-smaja;
¡makub' talal tq'ob'a wib'aje'!
3Tu'n ttx'u'jila wi'je' tu'n tpaju' wile',
yab' tkyaqil toj nwinqile'.
¡mixti' jun nb'aqile' b'a'nwt ta'!
4Inchin yajtiye' kyu'nju' wile';
jun iqtz tokx wib'aje' ex lay k'is wu'ne'.
5Tu'n tpaj nxnakyile',
nche q'ayju' nk'ixb'lene' ex nche tzu'wix.
6Tkyaqil q'ij nchin b'isune',
tzipin wele' ex inchin numje'.
7Inxi'x q'aq'lixju' tze'lwi'je' tu'n kyeq;
¡tkyaqil nxmilale' yab'!
8Matxi' chin b'ajtx'uyje' ex mixti'tl wipumale';
¡inchin uxine' tu'n k'ixk'oj toj wanmiye'!
9Nman Dyos, tojtzqi'n teju'ya tb'is nk'u'je',
¡mya ewaj nchin jiq'chana'ye' twitza!
10Inxi'x lipan wanmiye',
ex mixti'tl wipumale',
¡exqe' nche kub' sjumjixju' nwitze'!
11Min nche oklq'eju' wamiwe' kyetoq qtene' kyuk'i'l exqe' nwitze'le' nk'etze',
tu'n tpaju' tx'a'k wi'je'.
12Aye' kyajb'il tu'n nkub' kyb'yo'ne', inkub' kyq'o'n xpatxab' toj nb'eye';
exqe' kyajb'il tu'n kyxitun wi'je', nche yolin tu'n nb'o'lje' kyu'n
tkyaqil kmuj nkyxima'n myab'a'n wi'je'.
13Atzunwe' nkub' nẍkyinsa'n wib'e', naku'j min nchin b'ine';
ex min njqo'n ntziye', naku'j me qine'.
14Ikqinju'ye' kse'n jun xjal chkyin
ex min jqet ttzi tu'n tklontetib'.
15inchin ayone' ti'ja Nman Dyos,
awta txi' tzaq'wente kye.
16Naq o'kx in nqani'nju'ye' tu'n lalun che tze'n wi'je',
tu'n lalun che b'itzan b'itz te kanb'ab'l aj nkub' tz'aqe'.
17Axxi'x, naqch'inxtl nkub' tz'aqe';
mixjun nq'jen junkmuju' k'ixk'oj wi'je'.
18¡Kjawitz npa'nju'ye' wile',
qu'n matxi' tzaj nb'ise' tu'n tpaj!
19Matxi' che chmetju' wajq'oje;
nimqe'ju' ntx'a'lti'j kyk'u'j wi'je' ex mixti' wile' kye.
20Myab'a'nju' tu'me'l t-xel nkyq'o'n weye' tu'nju' b'a'n nb'incha'ne' kye;
qu'n nche okmiltz'uj wi'je' tu'nju' lepchqinkye' ti'ju' b'a'n.
21Nman Dyos, ¡lalun chin kyej tq'o'na njunale'!
Taye, ¡lalun tz'el tpa'ntib'a wi'je'!
22Nman Dyos ex klol weye', ¡lwix ku'tzaja onilweye'!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
