1Kyb'intze' aj Israel
aju' ntma'n Qman Dyos.
Matxi' tzyet tq'ojin
kyi'ju' najlqe' toju' tx'otx' lu,
qu'n mixti'tlte ax kyxolju' xjal tza'lu,
min nlaq kyk'u'j ex min nelkynik' te Dyos.
2Inpe' tzajkyna'n tb'i Dyos ti'j jun ti'xti' mya ax ex nche chanyol
nche b'yonwnaq ex nche elq'a'n,
nche ajpajin ex nche b'iyun,
naqx nche b'yonxjal kukxju'.
3Qu'mtzun, toj b'is ta'ju' tx'otx';
mixti' kyipumalju' najlqe' toj;
ex kyuk'i'l tojk'ul txkup exqe' pich'
nche kyimaju' kyiẍ toj ninnjab'.
Nche' tpoqo'n Qman Dyos Pale4Chi Qman Dyos kjalu:
¡Mix-a'lo'x jun tu'n tpoqon ex tu'n ttzak'un ti'j juntl!
O'kxtzu' ta'we' nq'oj ti'ja, aya pale.
5Kb'el tz'aqa te q'ijtl ku'xi'x,
ex kb'el tz'aqju' t-sanjelal Dyos tuk'i'la te qonik'an,
ex kb'el nxitu'ne' ttxuya.
6Mixti' tojtzqib'lju' ntaname',
qu'mtzun xkub' xituna'.
Atzunta pale, matz'eltik'u'na ojtzqib'l,
K'elel wiq'i'na toju' toklena te pale.
Mana' b'jik'kyna'lju' nxnaq'tzb'ile' tu'na ayine' Tdyosa,
Ex k'ik'el kyna'lwe' tyajajila wu'n.
7Tej pena' ẍe jaw chmet pale, majx ẍe b'inchanxi'xtl il nwitze';
qu'mtzun kjawil nmiltz'u'ne' ninb'il kye te kych'ixaw.
8Xi' nche anq'ina' kyi'ju' il nkyb'incha'n ntaname';
qu'mtzun kyajb'il tu'n kyb'inchan xjal il.
9Kb'el ntz'e'ysa'n kywitzju'ye' xjal exqe' pale, tu'n tpaju' kyb'ichb'en myab'a'n,
10Mina'jon nche ajb'entl weye' ayine' Dyos Manb'aj,
Che wal ex lay che noj b'a'nxi'x;
Che okyel ajpajil ex lay tzul kyk'wal.
E'k'ulun aj Israel kwitz witzileb'11In naj qnab'l
tu'n ajpaji'n, ex tu'n k'waj b'in.
12Nche xjelunju' ntaname' kye kywitzleb' tzeqe,
ex nkyjyo'n kyi'j tu'n jun piẍ tze.
Tzpetniqe' toj ajpaji'n,
myab'a'n tb'eju' ntaname' ljo'n:
nche ajpajin ex nelkypa'n kyib' wi'je' aniye' Kydyos.
13Nche'x tz'e'ysal sturak ex nkub' kyq'o'n chojb'il
kywi' nimaq witz ex kywi' ttxa'nwitz
ex kyjaq' kyxlekumal k'ol, chjaj ex b'ansi.
qu'mtzun matxi' che okju' kymyal te ajpajil,
ex nche ajpajinju' kylib'.
14Laytzun kub' ntz'e'ysa'we' kywitzju' kymyale' tu'nju' nche ajpajin
ikxqe' kylib'e' tu'nju' nche ajpaji'n,
qu'n aye'ku'ye' nchex kyuk'i'l qya ajpajil;
ajtkub' kyq'o'ne' chojb'il
nok kymujb'a'n kyib'e' kyuk'i'lju' qya ajpajil naku'j jun k'u'lb'il.
¡Ikytzu'n nxa' tzpeta' jun tnam mixti' tnab'l.!
15Qama tz'oka Israel te ajpajil,
tu'npe' o'kx Juda laywit b'inchan il.
¡Lalun che'xe' toj Kilkal
mixti' tu'n kyjaxe' toj B'et-ab'en
ex lalun tzaj kyna'ne' tb'i Dyos tib'aj jun ti'xti'!
16Pi'sju' tnam Israel
naku'j jun tal wakx nt'ikpuj;
¿ma oktzun che kxe'ltka'yi'n Qman Dyos tu'n kykub' tq'o'n toj tb'anil kytwa,
naku'xwitloj tal b'o's a'la'jqe'?
17-18Matxi' txit-xontib' Eprayin toj witzleb'i'n.
¡Kykyaqil matxi' che b'ajkub' tz'aq naku'j txqan tx'ujtenil!
Ex kukxu' kyu'n nche b'aj ajpajin
ex kyajb'ilxi'x tu'n tel kych'ixaw kyetwitz tu'n kyjaw nima'n.
19Che kxe'l iqa'n tu'n kyq'iq',
ex che b'elch'ixwi ti'ju' kywitzleb'i'n.
Who We AreWhat We EelieveWhat We Do
2025 by iamachristian.org,Inc All rights reserved.
