1Kyq'onx chjonteye' te Qman Dyos, qu'n majx b'a'nte,
qu'n tejumajxju' tk'u'jlalil.
2Kymanxe' aye'ye' matxi' che klete' tu'n Qman Dyos,
ex matxi' che klonjtze' tjaq' kykawb'il ajq'oj,
3aye'ye' ẍetzaj tb'u'yi'n kyoj nimaqtnam
toj tnayajkya'j ex tb'a'nq'ob'kya'j,
toj tjawetzq'ij ex tkub'exq'ij.
4Tzpetniqe'toqe' nche b'ete' toj tz'awun toj chq'ajlaj,
mixtoqti' nknet tb'eyil jun nintnam kyu'ne', jatu'n kyxa'ye' najal;
5intoq che q'aq'ane' ex intoq che k'wajtiye',
¡ch'inxtoq kykyime' tu'n we'yaj!
6Ekub'santzuntze' toj k'ixk'oj te Qman Dyos,
e'klettzuntze' tu'n toju' yajb'il.
7E'kub' q'o'ntzuntze' tu'n toj b'a'n b'e
tu'n kypone' toj jun nintnam, jatu'n kynajana'ye'.
8Kyq'onx chjonteye' te Qman Dyos tu'nju' tk'u'jlalil,
¡tu'nju' xtalb'il intb'incha'n kye xjal!
9Qu'n inqe tk'u'ju' nk'wajti tu'n
ex nim twaju' nwe'yajti nxitq'o'n.
10Najlqe'toqe' toj qlolj,
intoq che b'isune' ex jtz'o'nqe'toqe' tu'n xpatx'k'uxb'il,
11tu'n tpaju' min xikyb'i'ne' tchaq'b'il Qman Dyos,
tu'nju' b'je'l kysuchu'ne' t-xim Qman Dyos nim toklen.
12E'kub' q'o'ne' toj kuw aq'untl tu'n Dyos;
e'kub' tz'aqe' ex mix-a'lo' oninkyeye' tu'n kyjawe'ye'.
13Tojtzun k'ixk'oj ekub'sana'ye' te Qman Dyos,
e'klettzuntze' tu'n toju' yajb'il;
14E'b'je'tz iq'i'ne' tu'n toj qxopin,
ex e'tzaqpete' tu'n kyeju' xpatx'k'uxb'il.
15Kyq'onx chjonteye' te Qman Dyos tu'nju' tk'u'jlalil,
¡tu'nju' xtalb'il ntb'incha'n kye xjal!
16¡E'kub' tpa'nju' tjpel ja q'ank'uxb'ilqe'!
¡E'kub' ttoqi'nju' k'uxb'il xtanb'ilkye!
17Yab' qe'toqe' tu'n b'is
tu'nxju' kyb'inchb'ene' myab'a'n ex kyile',
18mixtoqti'tl nche wane';
¡ch'inxtltoq kypone' twitz kamik!
19Tojtzunju' k'ixk'oj ekub'sane' te Qman Dyos,
e'klettzuntze' tu'n toju' yajb'il;
20tzaj t-sma'n tyol kyeye' ex eb'anixe' tu'n;
¡eklete' tu'n teju' kamik!
21Kyq'onx chjonteye' te Qman Dyos tu'nju' tk'u'jlalil,
¡tu'nju' xtalb'il ntb'incha'n kye xjal!
22Kyajwali'nktze' te jun chojb'il twitz
ex kyolinqe'xju'ye' tb'inchb'en tuk'i'l tzalajb'il.
23Aye'ye' xk'aẍlel nche b'ete' tib'aj ninnjab',
txoli'n kytenju' kyb'arke' toj a'
24kyka'yiju'ye' taq'unb'en Qman Dyos tb'anilxi'x
tib'aj ninnjab'.
25Jawb'ent jun nin kyq'iq' tu'n tq'ojq'ojel twi' Qman Dyos
intoq jaw t-xon nimaq ttolob' ninnjab';
26Intoq che jaw xone' twitz kya'j
ex intoq che ku'x mulq'i'ne' t-xe ninnjab';
¡majx e'kub'numje' tu'n kyxob'ele'!
27Naqxtoq nche woqajlatle' naku'j tx'ujtenil;
¡mixti'x ajb'ena' kyojtzqib'le'!
28Ekub'santzuntze' twitz Qman Dyos toju' kyk'ixk'oje,
e'klettzuntze' tu'n toju' yajb'il;
29naq el lemementlju' q'ankyaq tib'aj a' tu'n,
ex e'kyaj nak'eju' ttolob' ninnjab'.
30Tetzunj kyka'yinteye' tkub' nak'eju' ttolob' ninnjab', eb'aj tzalaje',
exi' iq'i'ntzuntze' tu'n Dyos ttziju' ninnjab' jatu'n kypona'toqe'.
31Kyq'onx chjonteye' te Qman Dyos tu'nju' tk'u'jlalil,
¡tu'nju' xtalb'il ntb'incha'n kye xjal!
32¡Kynimanktze' toju' b'uyjtib'il te tnam!
¡Kyajwali'nktze' toju' b'uyjtib'il kye tijwnaq!
33Inche b'jawb'ent nin a' ex t-xiklil a' tu'n Qman Dyos
te chq'ajlaj ex tzqij tx'otx';
34intb'incha'n tb'anil tx'otx' te min ntq'o'ntl tawal,
tu'n tpaj kyilju' xjal najlqe' twitz;
35Inche jawb'ent chq'ajlaj tu'n te njab'
ex t-xiklil a' toj tzqij tx'otx';
36atzuntzu' nche kub'tq'o'na' nche we'yajti,
intzun kub' kyb'incha'n ninkytanamtz toj.
37Nb'aj kyaq'una'nju' tx'otx' ex nb'ajx kyawa'n kyawal toj
ex nim twitz kyawal njaw.
38Inche tzaj tky'i'wla'n Qman Dyos ex nchmet kyb'aj
ex nche chmet kywakyix.
39Qatzun mache kyim exqa mako'pju' kyajlal
tu'n tpaju' b'is,
k'ixk'oj ex yajb'ilkye,
40inche el tik'u'n Qman Dyosu' nchi yajlankye
nche kub'ttzpet-sa'n toj chq'ajlaj ex min nknetl kyb'e.
41Inche etztiq'i'n prow toj b'is;
¡inche tchmet-sa'n kyk'wal, kse'n jun ch'laj rit!
42Inche tzalaju' xjal tnik'alkyi'j ajkyka'yinte ja'lu,
aye'tzu'n b'inchal myab'a'n in jpet kytzi.
43Ati tu'n t-ximanju' xjal ati tnab'l,
ti'j ja'lu
ex tu'n tkaneju' tk'u'jlalil Qman Dyos toj twitz. Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
