Jue 4 - Mam Ostuncalco Bible

Kub'ti'j Sisara kyu'n Deb'ora ex B'arak

1Tkyimlenxi' Eud, e'aq'wi jumajtl aj Israel b'inchal taq'wix twitz Qman Dyos,

2qu'mtzun e'xitq'o'n Qman Dyos toj tq'ob' Jab'in, jun nimaqkawil aj Kanaan intoq kawin toju' nintnam Asor. Atoq Sisara nejenel kyeju' t-xjal te q'oj, najlitoq Aroset-koyim.

3Atitoq kab'k'al jo'naq (900) tkarwaj Jab'in k'uxb'ilqe', ex winqi'n ab'q'i e'kub' tyaju'n aj Israel kuwxi'x, tzmaxi'j kykub'san twitz Qman Dyos tu'n tonin kyi'j.

4Atoq Deb'ora t-sanjelal Dyos, t-xu'jil Lapidot, nkawin kyib'aj aj Israel toju' tq'ijlalil lu.

5Naq'litoq Deb'ora nkub' qe tjaq' jun tut (ju' ojtzqi'ntoq ttut Deb'ora), kywi'witz te Eprayin, kyxol Rama ex B'etel, aye'tzu'n aj Israel intoq che pon tuk'i'l tu'n tnk'etju' kyq'oj.

6Jun q'ij, tchaq' Deb'ora tu'n t-xi' txokb'aj jun ichan B'arak tb'i, tk'wal Ab'inoam, najlitoq Sedes, jun kytanam tyajajil Neptali, ex xitma'n te:

—In chq'onjtza tu'n Qman Dyos tu'n t-xi'ya twi' witz Tab'or, ex chmonqe'ma junmutx' jo'k'al (10,000) ichan atzu' kyxol kyyajajil Neptali ex Sab'ulon.

7Knb'incha'ye' tu'n tul Sisara, nejenel kye t-xjal Jab'in te q'oj, ttzi a' Kyison q'ojil ti'ja kyuk'i'l tkarwaj exqe' t-xjal te q'oj, atzunte Qman Dyos che kb'eltq'o'n toj tq'ob'a, chij.

8Atzunte B'arak xittzaq'we'n: chin xe'le' qama txi'ya wuk'i'le', qatzun min xxi'ya wuk'i'le' lay chinxe', chij.

9Atzunte Deb'ora xittzaq'we'n: Chin xe'lwe' tuk'i'la, naq o'kx myaya kjawel nimet toju' q'oj ktb'incha'ya lu, qu'n toj tq'ob' jun qya kb'el tz'aqa' Sisara tu'n Qman Dyos, chij.

Xi'tzun Deb'ora tuk'i'l B'arak atzu' Kyedes.

10Atzuntzu' e'ttxoka' B'arak kyyajajil Sab'ulon ex Neptali, ex eb'aj tb'u'yi'n jun tnej xjal te q'oj te junmutx' jo'k'al (10,000) ichan tjaq' tchaq'b'il. Intoq xi' Deb'ora tuk'i'l.

11Atitoq jun ichan aj kyenit, Eb'er tb'i, ojetoq tz'el tpa'ntib' kyi'j txqantl twitze'l, tyajajil Ob'ab'qe', ju' tji Moyses, tkub'toqu' t-xmuj nqayin tk'etz tnam Sedes, tk'etzju' tze b'ansi toj Saanaym.

12Tetzunj tb'inte Sisara qa matxitoq jax B'arak twi' witz Tab'or,

13e'tzaj tb'uyi'n kab'k'al jo'naq (900) tkarwaj k'uxb'il ex kykyaqilju' t-xjal te q'oj, xi'tzuntz kyuk'i'l tzajx Aroset-koyim tu'n kypon tzmax ttzi a' Kyison.

14Xi'tzun tma'n Deb'ora te B'arak kjalu:

—¡Qo'tzuna, qu'n matxi' ponju' kmoj tu'n tkub' tz'aq Sisara toj tq'ob'a tu'n Qman Dyos! ¡Nejlite Qman Dyos kywitzju' t-xjala te q'oj! chij.

Ku'tz B'arak twi' witz Tab'or kyuk'i'lju' junmutx' jo'k'al (10,000) t-xjal te q'oj,

15atzunte Qman Dyos tzaj tq'o'n xob'ajil kyxolju' tkarwaj ex kyi'ju' t-xjal Sisara te q'oj toju' kmoj tu'ntoq kyq'ojin tuk'i'l tk'uẍtx'e'nb'il B'arak; aku'pena' Sisara ku'tz tib'aju' tkarwaj ex xi' oq tu'n tqan.

16Atzunte B'arak xilpe kyi'ju' xjal te q'oj ex kyi'ju' karwaj tzmax Aroset-koyim. Mixti' jun t-xjal Sisara te q'oj kyej anq'in toju' q'ij lu: kykyaqil eb'aj kyim.

17Atzunte Sisara xi' oq ewal tja Jael, t-xu'jil Eb'er, qu'n b'a'n toqna' kyten Jab'in, nimaqkawil toj Asor, kyuk'i'lju' toj tja Eb'er aj Kyenit,

18etzju' qya Jael k'molte ex xitma'n te:

—Atzu' tzalu, atzu' tzalu taye, lalun xob'a, chij.

Okxtzu'n Sisara tuja ex kub' e'wa'n tu'n Jael tjaq' jun xb'alun;

19xitzun tqani'n Sisara ch'i'n tk'wa' a', qu'n inxi'xtoq k'ok'on. Jawtjqo'n Jael jun tz'u'n tkb'el k'wab'j jak'u'na' lech tu'n ex xitq'o'n tk'wa'; ex jaxtktxu'n jumajtl.

20Xitzun tma'n Sisara te Jael: tenku'ya ttzija, qa ati jun matzul exqa matzaj tqani'n teya qa ati jun xjal tuja, mix-a'lo', chiku'ya, chij.

21Siktnixi'xtoqtzun Sisara, majx ik'wtan b'a'nxi'x. Atzunte Jael tzaj tiq'i'n jun pojb'il ex jun stak, aye' nche ajb'en te tu'n tjk'etju' pach xb'alun, xilq'etzuntz chab'a ja ta'toq Sisara, kux tpoji'ntzuntz ttx'u'k twi' twitz tx'otx'. Iktzu'n kyima' Sisara.

22Tetzunj tkanun B'arak jyolte Sisara, etz Jael k'molte ex xitma'n te: kuttzaja, luju' ntjyo'na kxel nyek'u'ne' teya, chij.

Okx B'arak tuja ex xitka'yi'n woqli Sisara twitz tx'otx', kyimnitl pjo'nku'x stak toj twi'.

23Ikytzu'n kub'a' ti'j Jab'in, nimaqkawil aj Kanaan, tu'n Qman Dyos kywitz aj Israel toju' q'ij lu.

24Atxi'xtzu'n e'okten aj Israel yajulte Jab'in atl junjun maj kuwxi'x, tzmaxi'j tb'aj kyu'n.