Ez 37 - Mam Ostuncalco Bible

Aye' b'aq tzqij

1Kub' tq'o'n Qman Dyos tq'ob' wib'aje', ex inetze' nojniqine' tu'n tipumal, ex nkub' tq'o'ne' toj jun b'ya' jaslamuna' txqan b'aq,

2Tb'incha Qman Dyos tu'n tb'aj nb'ete'ne' tkyaqil plaj; nojni toju' b'ya' tu'n txqan b'aq, nim ex tzqijqe'tl b'a'nxi'x.

3Tzaj tma'ntzuntz weye': ¿Ma jaku' tz'anjtxkyi'ju' b'aq lu tu'n kyanq'intl toj twitza? Xi'tzun ntzaq'we'ne' te: O'kxta ojtzqilte taye, nchije'.

4Atzunte Qman Dyos tzaj tma'n weye': Yolina toj nb'iye' kyeju' b'aq lu. Q'manxa kye: Tzqij b'aq, kyb'inku'ye' tyol Dyos lu.

5Intma'n Dyos kyeye': kxe'l nq'o'ne' kyxewe' tu'n kyjaw anq'ine'.

6K'okyel nq'o'ne' kyb'atx'ile', k'okyel nnojsa'ne' kychib'jile', k'okyel nq'o'ne' kytz'umale' ex kxe'l nq'o'ne' kyxewe' tu'n kyjaw anq'intle'. K'eleltzun kynik'tze' qa ayine' Dyos Manb'aj.

7Xinma'ne' kye kse'nx ojetoq tchaq' Qman Dyos weye'. Ex tej intoq chin yoline' kye, nb'iye' jun tq'ojq'ojel: jun kyajnajnab', aye'tzu'n b'aq e'aq'wi mujb'alkyib' jun tuk'i'l juntl.

8Ex wile' eb'aj tzajb'ent kyb'atx'il ex kychib'jil kyi'jile, ex b'aj ktxet kyi'j tu'n kytz'umal. Mixtoqtzunti'x kyxew.

9Tzajtzun tma'n Qman Dyos weye:

Yolina toj nb'iye' teju' xewb'aj te chwinqlal, q'manxa te: Axtma Dyos ja'lu: xewb'aj te chwinqlal, kuttzaj kyoju' kyaje' ttx'u'k kya'j ex q'onka kychwinqlalju' kyimniqe' lu, chiku'ya, chi Dyos.

10Nyoline' toj tb'i Qman Dyos, kse'nxju' tchaq' weye', ex ulju' xewb'aj te chwinqlal ex okx kyoj, e'jaw anq'intzuntz ex e'kub'we'. Nim txqan kyb'aj b'a'nxi'x.

11Tzajtzun tma'n Qman Dyos weye': Ikyqe'tzun aj Israel kse'nqe' b'aq lu, inkyma'n: Mache oktzqiju' qb'aqile'; mixti'tl oyb'il qeye', matxi' qonaje', chechij.

12Q'manxtzuna kye toj nb'iye' kjalu:

Axtma'n Dyos ja'lu: e' ntanam, kche njqa'we' muqb'il kyeye'; che eletz wiq'i'ne' kyoj ex k'anjelkyi'je' wu'ne' toj kytx'otx' aj Israel.

13Ajtzun kyjqetju' muqb'il kyeye' wu'ne' ex ajkyetz wiq'ine' kyoj, k'elel kynik'e' weye' ntanam qa ayine' Dyos Manb'aj.

14Kb'el nq'o'ne' nxewe' te chwinqlal kyoje', che anq'iltzuntze'. K'eleltzun kynik'tze' qa ayine' Dyos Manb'aj, inq'mante ex ma nb'inchaye'. Ayine' nchin qmante, chi Dyos.

Kymujb'atlkyib' aj Juda kyuk'i'l aj Israel

15Tzaj yolin Qman Dyos weye' ex tma:

16Q'intz jun tzeya, ex tz'ib'anku'ya twitz: Aju' tnam Juda kyuk'i'l aj Israel mujlqe'k tuk'i'l. Ex q'intza juntl tze, ex tz'ib'anka twitz: Aju' tnam Eprayin tyajajil Jse, kyuk'i'l kykyaqil txqantl aj Israel mujlqe'k tuk'i'l.

17Mujb'anqe'ktzuntza toj tq'ob'a, tu'nwtzunlo noq junqe'.

18Ajtzun kymante twanaqila teya: chik'b'antza qeye' titi' ntma'n ja'lu, qa chechi,

19q'manxa kye: Axtma Dyos ja'lu: Ktzajel wiq'i'ne' ttze Jse tzyu'n tu'n Eprayin ex kyu'n txqantl tnej tyajajil mujlqe'k tuk'i'l Israel, ex knmujb'a'ye' tuk'i'lju' ttze Juda tu'n tok naqjunx tze toj nq'ob'e', chi Dyos, chiku'ya.

20Tzyunqeku'ya kab'e' tze kywitz, ju' tz'ib'a'n kywitz tu'na.

21Q'manxtzuntza kye: chi Dyos kjalu: che anjetz wiq'ine' aj Israel kyoju' nimaqtnam ja matxi' che b'ajpona'; che tzajel nb'u'yi'ne' toj tkyaqil plaj ex che anjetz wiq'i'ntle' toju' kytx'otx'.

22Naq junx nintnam che okyela' wu'ne' toju' tx'otx' lu, kywi' witz toj Israel, ex noq junx kynimaqkawil. Lay kub'kypa'ntlkyib' te kab'e' nimaqtnam, ex lay kypa'ntlkyib' toj kab'e' kawb'il.

23Ex lay kytz'ilsatlkyib' tu'n kyk'ulun kye witzleb' ik'jb'ajilqe' ex lay kyb'inchatl chukchaq il. Che nkla'ye' te tkyaqil myab'a'n matxi' b'aj kyb'incha'n, ex che nẍtilsa'ye' teju' kyil. Che okyel te ntaname' ex che ajb'el weye'.

24K'okyel nmajine' Dab'i te nimaqkawil kye ex tjunal kk'ik'lel kyi'j kykyaqil, kche b'il weye' ex che japumel nkawb'ile' ex nnuk'b'ile' kyu'n.

25Che najal toju' tx'otx' xinq'o'ne' te nmajine' Jakob', jae'najana' ojtxi' kychman. Atzu' che najala' exqe' kyk'wal ex kykyaqil kyyajajil tejumajx, ex aju' nmajine' Dab'i k'okyel te kynejel kukxju'.

26Kjel b'entti'j jun nyole' kyuk'i'l tu'n tten kyanq'in toj nak'b'il. Jun yol kjel b'ent tejumajx. Knb'incha'ye' tu'n tchmet kyb'aj, ex kb'el nq'o'ne' njaye' xjan kyxol tejumajx.

27Chin najale' kyxol, che ajb'el weye' ex che okyel te ntaname'.

28Ajttenju' njaye' xjan kukxju' kyxol, k'elel kynik'ju' txqantl nimaqtnam qa oje jawnsk'o'ne' tnam Israel te we'ku'xi'xe', chi Dyos.